ރައްޔިތުންގެ މަޖިލީހުގެ އިހަވަންދޫ ދާއިރާގެ މެމްބަރު މުހައްމަދު ޝިފާއު އަށް މަރުގެ އިންޒާރު ދިން މައްސަލަ ފުލުހުންނަށް ހުށަހަޅައިފި އެވެ.
އޭނަ އަށް އިއްޔެ މަރުގެ އިންޒާރު ދީފައި ވަނީ ރައީސް ޑރ. މުހައްމަދު މުއިއްޒު މަގާމުން އަޒުލުރުކުރަން އެމްޑީޕީގެ ޕީހީ ގްޕޫރަށް ހުށަހަޅުއްވާނެ ކަމަށް މަޖިލީހުގެ އިއްޔެގެ ޖަލްސާގައި ވިދާޅުވެފައި ވަނިކޮށެވެ. މަޖިލީހުގެ މެޖޯރިޓީ ޕާޓީ، އެމްޑީޕީގެ މެންބަރުންގެ ވޯޓުން އެކަނި ރައީސް ވަކިކުރެވޭ ގޮތަށް އިއްޔެ ވަނީ ފާސް ވެސް ކޮށްފަ އެވެ.
ޝިފާއުގެ މަރުގެ އިންޒާރު ދިނީ ސޯޝަލް މީޑިއާ މެދުވެރިކޮށެވެ. އެ މައްސަލަ ފުލުހުންނަށް ހުށަހެޅި އިރު، އިންޒާރުން ދިން މައްސަލަ އެމްޑީޕީން ކުށްވެރިކޮށް، ރޭ ބަޔާނެއް ވެސް ނެރުނެވެ. އެ ބަޔާނުގައި ބުނީ ޝިފާއު އަށް މަރުގެ އިންޒާރު ދީފައިވާތީ އެކަން ބަލައި ތަހުގީގުކޮށް ފިޔަވަޅު އެޅުމަށް ފުލުހުންނަށް ގޮވައިލާ ކަމަށެވެ.
އަދި ރައްޔިތުންގެ މަޖިލީހުގައި ސިޔާސީ އިދިކޮޅު ޕާޓީއަކުން ކުރާނެ އެންމެ މާތް އެއް ޒިންމާއަކީ ސަރުކާރު ޖަވާބުދާރީކުރުވުން ކަމަށާއި އެ ދުސްތޫރީ ޒިންމާ އަދާކުރުމުން މަރުގެ އިންޒާރުދީ އެފަދަ ލާއިންސާނީ ކުށެއްގެ ޝިކާރައަކަށް ރައްޔިތުންގެ މަޖިލީހުގެ މެމްބަރުން ވެގެން ދިއުމަކީ ކަންބޮޑުވާ ކަމެއް ކަމަށް އެމްޑީޕީން ބުންޏެވެ.
ބަޔާނުގައި ބުނީ މަޖިލީހުގެ މެމްބަރުންނަކީ އެ މެމްބަރުންނަށް ގާނޫނީ ގޮތުން ލިބިދޭ ހާއްސަ އިމްތިޔާޒުތަކުގެ ތެރެއިން ސަލާމަތާ ރައްކާތެރިކަން ފޯރުކޮށް ދޭން ޖެހޭ ބަޔަކަށްވާތީ، މަޖިލީހުގެ އެންމެހާ މެމްބަރުންގެ ރައްކާތެރިކަން ކަށަވަރުކޮށް ދިނުމަށް ސަލާމަތީ ޚިދުމަތްތަކަށް އެމްޑީޕީން ގޮވާލައި އެވެ.