އައު ޤަވާއިދާއި ގުޅޭގޮތުން ރާއްޖޭގެ ޔޮޓިން އަދި ކްރޫޒްލައިން އިންޑަސްޓްރީގެ އޮތް ކަންބޮޑުވުން އަޑު އެހީ މި ސަރުކާރުން ކަމަށް މޯލްޑިވްސް އެސޯސިއޭޝަން އޮފް ޔޮޓް އެޖެންޓްސް، މާޔާ މޯލްޑިވްސް އިން ބުނެފިއެވެ.
އެ ޖަމީއްޔާއިން ނެރެފައިވާ ނޫސްބަޔާނެއްގައި ބުނެފައިވަނީ، "ދިވެހި ރާއްޖެއަށް އަންނަ ބޭރުގެ ޓުއަރިސްޓް އުޅަނދުފަހަރު، ރާއްޖޭގެ ސަރަހައްދުގައި ދުއްވުމާއި ބަނދަރުކުމާއި ބެހޭ ޤަވާއިދު" މިދިޔަ ސެޕްޓެމްބަރު މަހު 14 ވަނަ ދުވަހު ޝާއިއު ކުރެވުމާއެކު، އޭރުވެސް ޔޮޓިންގް އިންޑަސްޓްރީއާއި ކްރޫޒް އިންޑަސްޓްރީ ހީނަރުވާފަދަ މާއްދާތައް އެ ޤަވާއިދުގައި ހިމެނޭކަން ފާހަގަވި ކަމަށެވެ. އަދި މިއީ މި އިންޑަސްޓްރީއާއި ގުޅިފައިވާ ރާއްޖޭގެ އެތަށް ވިޔަފާރިއަކަށާއި ދިވެހި ދައުލަތަށް އެކަމުގެ މާލީ ގެއްލުން އިންތިހާއަށް ކުރާނެ ކަމެއްގެ ގޮތުގައި ފެންނާތީ، އެ ޖަމީއްޔާއިން އިންޑަސްޓްރީގެ ހައްޤުގައި ނިކުތް ކަމަށެވެ.
މި ޤަވާއިދާއި ގުޅޭގޮތުން އޭރު އޮތް ސަރުކާރުގެ ޓުއަރިޒަމް މިނިސްޓަރ ޑރ. އަބްދުﷲ މައުސޫމްއާއިވެސް މަޝްވަރާ ކުރެވި ދިޔައީ މަސައްކަތްތަކެއް ކުރެވެމުން ކަމަށް އެ ޖަމީއްޔާއިން ބުނެއެވެ. ނަމަވެސް އެ މަސައްކަތުގެ އެއްވެސް އަލިމަގެއް ނުފެނިވަނިކޮށް ސީޒަން ފެށުނު ކަމާށާއި، ބޭރުގެ ބޮޑެތި ކްރޫޒްލައިންތަކުގެ މިސްރާބުން ރާއްޖެނައްޓައި ވާދަވެރި އެހެން ޤައުމުތަކަށް މިސްރާބު ޖެހި ކަމަށެވެ.
Actions speak louder than words! Witnessed the same today at @MoTmv with our new Minister @lasiaF969, Deputy Ministers & Legal Team. Oceans & Storms you are willing to sail through are as crucial as the calm you have just passed to reach your destination.@MMuizzu @presidencymv pic.twitter.com/eTJfFXyrXt
— mayamaldives (@mayamaldives) December 4, 2023
މިއާއެކު ޤަވާއިދުގެ ދަށުން ވަދެ ތިބި ކުދި ޓުއަރިސްޓް އުޅަނދުތަކަށް ގެއްލުންލިބި އެ އުޅަނދުތަކުގެ އޮޕަރޭޝަން ހުއްޓި އޭޖެންޓުންނަށް އިންތިހާއަށް ގެއްލުން ލިބުނު ކަމަށް މާޔަ މޯލްޑިވްސް އިން ބުނެއެވެ.
މިކަންކަމަށް ހައްލެއް ލިބޭނެ ކަމުގެ އުއްމީދެއް ލިބިގެން ދިޔައީ މި ސަރުކާރު އައި ފަހުން ހާއްސަކޮށް މިހާރުގެ ޓުއަރިޒަމް މިނިސްޓަރ އިބްރާހިމް ފައިސަލް އާއި މިނިސްޓްރީން އިންޑަސްޓްރީގެ ފަރާތްތަކާއި އެކު ބާއްވަމުން ގެންދަވާ ގާތް ގުޅުމުން ކަމަށް އެ ޖަމީއްޔާއިން ބުނެއެވެ. އަދި އެކަމަށް ވަޒީރަށާއި ރައީސްއަށް މާޔާ މޯލްޑީވްސް އިން ވަނީ ޝުކުރު ދަންނަވާފައެވެ.
އެ ޖަމީއްޔާއިން ބުނީ، އެ ޤަވާއިދަށް އެ ޖަމީއްޔާއިން ހުށަހަޅާފައިވާ އިސްލާހުތައް އަވަހަށް ގެޒެޓް ވެގެން ދިއުމަކީ ބޮޑު އެދުމެއް ކަމަށެވެ.