މި މަހު ބޭއްވި ރިޔާސީ އިންތިހާބު ކާމިޔާބު ކުރައްވައި ވެރިކަމުގެ ތިން ވަނަ ދައުރެއް ހޯއްދެވުމާ ގުޅިގެން މިސްރުގެ ރައީސް އަބްދުލް ފައްތާހް އަލް ސީސީ އަށް ރައީސް ޑރ. މުހައްމަދު މުއިއްޒު މަރުހަބާ ވިދާޅުވެއްޖެ އެވެ.
ރައީސްގެ ތަހުނިޔާގެ އެމަނިކުފާނު ވަނީ ދިވެހި ސަރުކާރާއި ރައްޔިތުންނާއި އަދި އަމިއްލަ ނަންފުޅުގައި ސީސީ އަށް ތަހުނިޔާ ވިދާޅުވެފައިވެ އެވެ. ރައީސް ވިދާޅުވީ ތިން ވަނަ ދައުރަކަށް ސީސީ ހޮވިވަޑައިގަތުމަކީ މިސްރުގެ ރައްޔިތުން އެ މަނިކުފާނުގެ ވެރިކަމަށް ކުރައްވާ އިތުބާރު ދޭހަވާކަ ކަމެއް ކަމަށާއި ސީސީގެ އާ ދައުރުގައި މިޞްރަށް ފާގަތިކަމާއި ކާމިޔާބީއަށް އެދިވަޑައިގަންނަވާ ކަމަށެވެ.
އަދި ރާއްޖެ އާއި މިޞްރާއި ދެމެދު އޮންނަ އެކުވެރިކަމުގެ ތާރީޚީ ގުޅުމަަށް އަލިއަޅުއްވާލައްވައި ރައީސް ވިދާޅުވީ އެއީ އިސްލާމީ އެއްބައިވަންތަކަމާއި، ދެ ފަރާތަށް އިޙުތިރާމްކުރުމާއި، ސަގާފަތުގެ މައްޗަށް ބިނާވެފައިވާ ގުޅުމެއް ކަމަށެވެ. މީގެ އިތުރުން ސަގާފަތާއި ތަރިކަ އާއި، އިގުތިޞާދީ އެއްބާރުލުމާއި، ތަޢުލީމާއި، ފަތުރުވެރިކަމާއި، އަދި އެ ނޫން ވެސް އެކި ދާއިރާތަކުން މިޞްރުގެ ފަރާތުން ރާއްޖެއަށް ވެދޭ އެހީތެރިކަމަށް ޝުކުރު އަދާކުރައްވާފައިވެ އެވެ.
ރައީސް މުއިއްޒު ވިދާޅުވީ މިސްރު ސަރުކާރާ ގުޅިގެން ދެ ގައުމުގެ ގުޅުން ބަދަހިކުރުމުގައި ދެމިތިބޭނެ ކަމަށެވެ.
މިދިޔަ މަހު ޔޫއޭއީގައި ބޭއްވި ކޮޕް ސަމިޓްގެ ތެރޭގައި ސީސީ އާއި ރައީސް ބައްދަލުވެވަޑައިގެންފައިވެ އެވެ.