ރާއްޖޭގައި މަސައްކަތްކުރަން އާދައިގެ ލޭބަރުން ތިން ގައުމަކުން މިހާރު ގެނެވޭނެ ކަމަށް ހޯމްލޭންޑް މިނިސްޓަރު ވިދާޅުވެއްޖެ އެވެ.
މިއަދު ބޭއްވި ނޫސް ކޮންފަރެންސްގައި މިނިސްޓަރު ވިދާޅުވީ އެ ތިން ގައުމަކީ ބަންގްލަދޭޝްގެ އިތުރުން އިންޑިއާ އާއި ނޭޕާލް ކަމަށެވެ. އިހުސާން ވިދާޅުވީ، މި ވަގުތަށް ނޭޕާލާއި އިންޑިއާގެ ލޭބަރުންނަށް ހުއްދަ ދިނުމަށް ފަހު، އެހެން ގައުމުތަކަށް ވެސް ކުރިމަގުގައި އެ ހުއްދަ ދޭނެ ކަމަށެވެ.
"އެހެން ގައުމުތަކަށް ވެސް އަޅުގަނޑުމެން ހަދަން ޖެހޭ އެސެސްމެންޓުތައް ހަދާފައި ނޯމަލް އޮޕަރޭޝަނަށް އާންމުކޮށް މި އޮންނަ ގޮތަށް ބަދަލުކޮށްލާނަން." އޭނަ ވިދާޅުވި އެވެ.
ތިން ގައުމަކުން ރާއްޖެ އަށް ލޭބަރުން ގެނެވޭ ގޮތަށް މި ހެދީ ބަންގްލަދޭޝްގެ ލޭބަރުން ގެންނަން އަލުން ހުއްދަ ދޭން މިނިސްޓްރީން ނިންމުމުން ފާޑުކިޔުންތަކެއް ވެސް އަމާޒުވެފައި ވަނިކޮށެވެ. ރާއްޖެ އަކީ ބިދޭސީ މަސައްކަތްތެރިންނާ ގުޅުން ހުރި މައްސަލަތައް ބޮޑު ގައުމެކެވެ.
ރާއްޖޭގައި ބިދޭސީން މަސަައްކަތްތެރިންގެ ބޮޑު އާބާދީއެއް ވެސް އުޅެ އެވެ. ހާއްސަކޮށް ބަންގްލަދޭޝް އެވެ.
މިނިސްޓަރު އިހުސާން ވިދާޅުވެފައި ވަނީ ރާއްޖޭގައި އުޅޭ ބިދޭސީންނާ ގުޅޭ ހުރިހާ މައުލޫމާތެއް އަހަރުގެ ދުވަހުގެ ތެރޭގައި އެއްކޮށް ސާފުކޮށް، ބިދޭސީންނާ ގުޅުން ހުރި މައްސަލަތައް ހަމައަކަށް އަޅުވާނެ ކަމަށެވެ.