ހަފުތާގެ ހުރިހާ ދުވަހެއްގައި ކައިވެނިކޮށް ދޭނެ

އަންނަ އަހަރުން ފެށިގެން ހަފުތާގެ ހުރިހާ ދުވަހެއްގައި ކައިވެނިކޮށް ދޭނެ ކަމަށް ފެމިލީ ކޯޓުން ބުނެފި އެވެ.

އެ ކޯޓުން ވަނީ އެގޮތަށް ހަމަޖެއްސުމާ ގުޅިގެން ކޯޓްގައި ކައިވެނިކޮށް ދޭނެ ގަޑިތައް ވެސް މިއަދު އިއުލާންކޮށްފައިވެ އެވެ. އެގޮތުން ރަސްމީ ދުވަސްތަކުގައި ކައިވެނިކޮށް ދޭނީ ހެނދުނު 09:00 އިން 11:30 އަށް، މެންދުރު ފަހު 1:00 އިން 1:30 އަށް އަދި މެންދުރު ފަހު 3:00 އިން ރޭގަނޑު 9:00 އަށެވެ.

ކޯޓުން ބޭރުގައި ހަފުތާއެއްގެ ކޮންމެ ދުވަހެއްގައި ވެސް ކައިވެނިކޮށްދޭ އިރު، އެ ގަޑިއަކަށް ކަނޑައަޅާފައި ވަނީ މެންދުރު ފަހު 3:00 އިން ރޭގަނޑު 9:00 އަށެވެ.

ފެމިލީ ކޯޓުން ބުނީ ރިސޯޓު ނުވަތަ ސަފާރީ ފަދަ ތަންތަނުގައި ކައިވެނިކޮށްދޭ ގަޑި ހަމަޖައްސާނީ އެކަމަށް އެދި ހުށަހެޅުމުން، ހުށަހަޅާ ފަރާތްތަކާއި ކޯޓުގެ ވަގުތުތަކަށް ރިޢާޔަތްކޮށްފައި ކަމަށެވެ. އަދި އަންނަ އަހަރުގެ ރޯދަމާއި ޝައްވާލު މަހުގެ ފުރަތަމަ 7 ދުވަހު ކައިވެނިކޮށްދޭނެ ގަޑިތައް ކޯޓުން ފަހުން އިޢުލާން ކުރާނެ ކަމަށް ވެސް ފެމިލީ ކޯޓުން ބުންޏެވެ.