ކުރިއަށް އޮތް ތަނުގައި ކަރަންޓު ބިލަށް އަރާވަރު ފޯނުން ފެންނަ ގޮތް ހަދާނެ ކަމަށް ސްޓެލްކޯގެ މެނޭޖިން ޑިރެކްޓަރު ހުސެއިން ފަހުމީ ވިދާޅުވެއްޖެ އެވެ.
ކަރަންޓުގެ ޚިދުމަތަށް 74 އަހަރު ފުރުމުގެ މުނާސަބަތުގައި ދެއްވި ވީޑިއޯ މެސެޖެއްގައި ފަހުމީ ވިދާޅުވީ ޓެކްނޮލޮޖީ ބޭނުންކޮށްގެން ކަސްޓަމަރުންނަށް ލުއިފަސޭހަ ގޮތެއްގައި ހިދުމަތް ލިބޭނެ ގޮތްތައް ހެދުމަށް ސްޓެލްކޯ އިން މަސައްކަތް ކުރަމުންދާ ކަމަށާއި އެގޮތުން ކަސްޓަމަރުން ގޭގައި ތިބެގެން އެޕްލިކޭޝަން ހުށަހަޅައިގެން ހިދުމަތް ހޯދުމުގެ މަގުފަހިކޮށްދިނުމުގެ މަސައްކަތް މިހާރުވެސް ކުރިއަށްދާ ކަމަށެވެ.
ދުރުނޫން މުސްތަގުބަލެއްގައި ސްމާޓް މީޓަރު ޕްރޮޖެކްޓެއް ވެސް ހިންގާނެ ކަމަށާއި އެ ޕްރޮޖެކްޓާއެކު ކަރަންޓު ބިލަށް އަރާ ވަރު ފޯނުން ފެންނަ ގޮތް ހަދާނެ ކަމަށްވެސް ވިދާޅުވި އެވެ.
"ހިދުމަތް ލިބިގަންނަ ފަރާތްތަކަށް ވަރަށް ބޮޑަށް ބޭނުންވާ ކަމެއް އެބޭފުޅުންގެ ކަރަންޓު ބިލު ކުޑަކުރެވޭނީ ކިހިނެއްތޯ، އެ ބޭފުޅުންނަށް އެނާޖީ ސޭވް ކުރެވެނީ ކިހިނެއްތޯ، ދުވަހުން ދުވަހަށް ބިލަށް އަރަނީ ކިހާވަރެއްތޯ އެނގުން އެއީ ކަރަންޓު ބިލު ކުޑަކުރުމަށް ނުވަތަ އިގްތިސާދު ކުރުމަށް ލިބިދޭ ވަރަށް ބޮޑު ފުރުސަތެއް،" ފަހުމީ ވިދާޅުވި އެވެ.
ފަހުމީ ވަނީ ސްޓެލްކޯ އިން ބޭނުން ވަނީ އެންމެން އެކަތިގަނޑެއްގެ ގޮތުގައި މަސައްކަތްކޮށްގެން ކުންފުނި ކުރިއަރުވަން ކަމަށާއި ހުރިހާ މުވައްޒަފުން ވެސް ސްޓެލްކޯގެ ކުރިމަގު އުޖާލާކޮށްދޭން ވެސް އެދިވަޑައިގެންފަ އެވެ. އަދި މީގެކުރިން ސްޓެލްކޯގައި މަސައްކަތް ކުރި ފަރާތްތަކުން ދައްކުވައިދިން އިހުލާސްތެރިކަމަށް މުވައްޒަފުން ބަލަންޖެހޭ ކަމަށާއި އަންނަން އޮތް ޖީލަށް ދޫކޮށްލަން ވާނީ ރަނގަޅު މިސާލުތަކެއް ކަމަށްވެސް ވިދާޅުވި އެވެ.