މި ސަރުކާރު ހަވާލުވިއިރު މިސްކިތް އިމާރާތް ކުރުމަށް ހަވާލުކުރި ކުންފުނިތަކަށް ނުދީ ހުރި ފައިސާ މިހާރު ހަމަޖެހިފައިވާ ކަމަށް އިސްލާމިކް މިނިސްޓްރީން ބުނެފިއެވެ.
އިސްލާމިކް މިނިސްޓްރީން ބުނީ، މިސްކިތް އިމާރާތް ކުރުމަަށް ސަރުކާރުން ހަވާލުކޮށްފައިވާ މަޝްރޫޢުތަކުގެ ތެރެއިން 20 ކުންފުންޏަކަށް ފައިސާ ނުދައްކާ ހުރި ބިލްތައް މި ސަރުކާރާއި ހަވާލުވިއިރު ހުރި ކަމަށެވެ. މިގޮތަށް ފައިސާ ނުދައްކާ ބިލްތައް ހުރުމުން މަސައްކަތް ލަސްވެގެންދާ ކަމަށް މީގެ ކުރިންވެސް ސަރުކާރުން ވަނީ ފާހަގަކޮށްފައެވެ.
އިސްލާމިކް މިނިސްޓްރީން ބުނީ މިސްކިތްތައް އިމާރާތް ކުރާ ކުންފުނިތަކަށް ދޭން 22 މިލިއަން ރުފިޔާ މިހާރު ހަމަޖެހިފައިވާ ކަމަށެވެ. އަދި ރައީސް ޑރ. މުހައްމަދު މުއިއްޒުގެ އަމާޒަކީ ހުއްޓިފައިވާ މިސްކިތްތަކުގެ މަސައްކަތް ވީހާވެސް އަވަހަށް ނިންމުން ކަމަށް މިނިސްޓްރީން ބުނެއެވެ.
ސަރުކާރު ޙަރަދުގައި ރަށްރަށުގައި އިސްލާމީ މަރުކަޒުތަކާއި މިސްކިތްތައް އެޅުމަށް، ވަނީ ހަވާލުކުރެވިފައެވެ. މީގެ ތެރެއިން ބައެއް މަސައްކަތް ވަނީ ކުރިއަށް ނުގެންދެންވި ހުއްޓިފައެވެ.
އިސްލާމިކް މިނިސްޓަރ ޑރ. މުހައްމަދު ޝަހީމް އަލީ ސައިދު ވަނީ ދާދި ފަހުން އަމިއްލަ ފަރާތްތަކުންނާއި ވިޔަފާރިވެރިން ރަށްރަށުގައި މިސްކިތް އަޅަން ބޭނުންވާ ނަމަ އެކަމުގެ އިދާރީ އެހީ މިނިސްޓްރީގެ ފަރާތުން ދިނުމަށާއި، ބިން ހަމަޖެއްސުމުގައި އެހީތެރިވެދޭނެ ކަމަށް ބުނެފައެވެ.