ހުޅުމާލެ ފޭސް 3 ހިއްކުމުގެ މަސައްކަތް މި ހަފްތާ ތެރޭގައި ފެށުމަށް ހަމަޖެހިފައިވާ ކަމަށް އާބަންކޯއިން އިން ހާމަކޮށްފިއެވެ.
އާބަންކޯއިން ބުނީ ހުޅުމާލެ 03 ވަނަ ފިޔަވަހީގެ ބިން ހިއްކުމުގެ މަސައްކަތުގެ ދެވަނަފިޔަވަހީގެ މަސައްކަތް މިހަފްތާތެރޭގައި ކުރިއަށް ގެންދިއުމަށް ހަމަޖެހިފައިވާ ކަމަށެވެ. މިގޮތުން މިމަސައްކަތް ކުރުމަށް މި ސަރަހައްދުގެ ފަޅުތެރޭގައި އަޅާފައިވާ އުޅަނދުތައް ނެގުމަށް އާބަންކޯއިން ވަނީ އަންގާފައެވެ.
މިގޮތުން ހުސްކުރަންޖެހޭ ސަރަހައްދަކީ އެކުލަވާލެވިފައިވާ ޗާޓުގެ ސްޓޭޖް 2، ސައިޓް ބީ ނުވަތަ ފެހި ކުލައިން ފާހަގަކުރެވިފައިވާ ސަރަހައްދުގެ އިތުރުން ރަތް ކުލައިން ފާހަގަ ކުރެވިފައިވާ ސަރަހައްދެވެ. އެގޮތުން ސްޓޭޖް ދޭ ގައި ހިއްކަން ކަނޑައަޅާފައިވަނީ 29 ހެކްޓަރުގެ ބިމެވެ.
ހުޅުމާލެ 3 ވަނަ ފިޔަވަހީގެ ބިން ހިއްކުމަށް އެ ސަރަހައްދުގެ ފަޅުތެރޭގައި އަޅާފައިވާ އުޅަނދުތައް ނެގުމާއިގުޅޭ. pic.twitter.com/B3WrJtrFnu
— Urbanco (@hdcmaldives) December 19, 2023
މިގޮތުން ނެގޭ އުޅަނދުތައް މި ސަރަހައްދުގެ ބޭރުގައި އެޅުމުގެ ފުރުސަތު ވަނީ ފަހިކޮށްދެވޭނެ ކަަމަށް އެކުންފުނިން ބުނެއެވެ. އަދި މިކަމާއިގުޅިގެން އިތުރު މައުލޫމާތެއްވާނަމަ އެކުންފުނީގެ ހޮޓްލައިން 1516 އަށް ގުޅުއްވައި މައުލޫމާތު ސާފުކުރުން އެކުންފުނިން އެދެއެވެ.
މި މަޝްރުއަކީ މާލެ ސަރަހައްދުގައި ކުރިމަތިވެފައިވާ ބޯހިޔާވަހިކަމުގެ މައްސަލައަށް ހައްލުހޯދައިދިނުމަށް ކުރިއަށް ގެންދެވޭ މަޝްރޫއެކެވެ. މިމަޝްރޫއުގެ ދަށުން ހުޅުމާލެ ފޭސް 3 ގައި 63 ހެކްޓަރުގެ ބިން އިތުރުކުރުމަށްވަނީ ހަމަޖެހިފައެވެ. މިމަސައްކަތް ފަށާފައިވަނީ މިދިޔަ ސެޕްޓެމްބަރު މަހު 22 ގައެވެ. އެގޮތުން އޭރު ފެށި ސައިޓް އޭ ބިން ހިއްކުމުގެ މަސައްކަތް އޮކްޓޯބަރ ފަހުކޮޅަށް ވަނީ ނިންމާލާފައެވެ.
ހުޅުމާލެ ފޭސް 3 ހިއްކަނީ މާލެ ސަރަހައްދުން ބިން ދޫކުރުމަށް ނިންމާފައިވުމާއެކު، ގެދޮރުވެރިޔާ ސްކީމުގެ ދަށުން މިހާރު ބިމުގެ ރެޖިސްޓްރީ ހަވާލުކޮށްފައިވާ ފަރާތްތަކަށް ބިން ދޫކުރުމަށެވެ.