ކުރިއަށް އޮތް ތަނުގައި ޓޫރިޒަމް ދާއިރާ އިން ރާއްޖެ އަށް ވަންނަ އާމްދަނީ އަހަރެއްގެ ތެރޭގައި މަދުވެގެން ހަ ބިލިއަން ޑޮލަރަށް އިތުރުކުރުމަކީ އަމާޒެއް ކަމަށް ޓޫރިޒަމް މިނިސްޓަރު އިބްރާހީމް ފައިސަލް ވިދާޅުވެއްޖެ އެވެ.
ރާއްޖެ އިން މި އަހަރު 1.8 މިލިއަން ޓޫރިސްޓުން ގެންނަން ހިފި އަމާޒު އިއްޔެ އައި 1.8 މިލިއަން ވަނަ ޓޫރިސްޓަކާ އެކީ ހާސިލުކުރެވިފައިވާތީ އެކަމާ ގުޅޭ ގޮތުން ބޭއްވި ރަސްމިއްޔާތުގައި ނޫސްވެރިންނާ ވާހަކަ ދައްކަމުން އާ ސަރުކާރުގެ ޓޫރިޒަމް މިނިސްޓަރު ވިދާޅުވީ ރާއްޖޭގެ ޓޫރިޒަމް ފުޅާކޮށް، އެ ދާއިރާ އިން ލިބޭ އާމްދަނީ އިތުރު ކުރުމަކީ ރައީސް ޑރ. މުހައްމަދު މުއިއްޒު ވަރަށް ބޮޑު އިސްކަމެއް ވެސް ދެއްވާ ކަމެއް ކަމަށެވެ.
އެގޮތުން އެކަމަށް މަގުފަހިކުރެވެން އޮތް އެންމެ މުހިއްމު އެއް ކަމަކީ ވެލާނާ އިންޓަނޭޝަނަލް އެއާޕޯޓް (ވީއައިއޭ) ތަރައްގީ ކުރަން ކުރިއަށްދާ މަޝްރޫއު ވީހާ ވެސް އަވަހަކަށް ނިންމުން ކަމަށެވެ. ސަރުކާރުން ބުނެފައިވާ ގޮތުގައި އަންނަ އަހަރުގެ ސެޕްޓެމްބަރަށް އެ މަޝްރޫއު ނިމޭނެ އެވެ.
މިނިސްޓަރު ފައިސަލް ވިދާޅުވީ ރާއްޖޭގެ އިގުތިސާދު ޓޫރިޒަމަށް ބިނާވެފައި އޮތް އިރު، ދައުލަތަށް ލިބޭ އާމްދަނީގެ އެންމެ ބޮޑު ބައެއް ހިއްސާ ކުރަނީ ވެސް އެ ދާއިރާ އިން ލިބޭ އާމްދަނީ ކަމަށެވެ. އެއީ އަހަރަކު 4.5 ބިލިއަން ޑޮލަރެވެ.
"މިހާރު ވެސް ބަޖެޓަށް އެންމެ ބޮޑު ކޮންޓްރިބިއުޝަންއެއް މި ދެނީ ޓޫރިޒަމް އިންޑަސްޓްރީން." އޭނަ ވިދާޅުވި އެވެ. "އެ އަދަދު ހަ ބިލިއަން ޑޮލަރަށް ގެނައުމަކީ އެއީ އަޅުގަނޑުމެންގެ ޓާގެޓް ގޯލް. ރައީސްގެ ސްޕީޑް މި ހުރި ވަރަށް ބަލާ އިރު އަޅުގަނޑަށް ހީވަނީ ހަ ބިލިއަނަށް ވުރެ ވެސް ކުރިއަށް ޖެހުމުގެ ފުރުސަތު ވަރަށް ބޮޑުހެން ހަމަ."
މިނިސްޓަރު ވިދާޅުވި ގޮތުގައި އަންނަ އަހަރު ރާއްޖެ ޓޫރިޒަމްގެ އިތުރު އިންވެސްޓްމަންޓްތައް އަންނާނެކަމުގެ ޔަގީންކަން ވެސް ވަރަށް ބޮޑެވެ.
ރާއްޖެ އަށް އަންނަ އަހަރު 2.01 މިލިއަން ޓޫރިސްޓުން އަންނާނެ ކަމަށް އަންދާޒާކޮށްފައިވެ އެވެ.