ގިނަަ ބަޔަކު ކެތްތެރި ކަމެއް ނެތި އިންތިޒާރު ކުރަމުންދާތާ ގިނަ ދުވަސްތަކަކަށް ފަހު، މި އަހަރުގެ އެންމެ އުންމީދީ އެއް ފިލްމް ކަމަށްވާ "ބޮމްބޭ ވެލްވެޓް" ގެ ޓްރެއިލާ މިއަދު ލޯންޗްކޮށްފި އެވެ.
ރަންބީރު ކަޕޫރާއި އަނުޝްކާ ޝަރްމާ ލީޑް ރޯލް ކުޅެފައިވާ މި ފިލްމް ސިނަމާތަކަށް އަންނާނީ އަންނަ މެއި މަހުގެ 15 ވަނަ ދުވަހު އެވެ. މިއީ އެ ދެ ތަރިން އެކުގައި ބޮޑު ސްކްރީނަށް އަންނަ ފުރަތަމަ ފިލްމެވެ.
އިންޑިއާގެ މަޝްހޫރު ލިއުންތެރިޔާ ގިއާން ޕްރަކާޝްގެ ވާހަކަ "މުމްބާއީ ފެބްލްސް" ގެ މައްޗަށް ބިނާކޮށް ހަދާފައިވާ "ބޮމްބޭ ވެލްވެޓް" ގެ މުހިއްމު ރޯލްތަކުން ޑައިރެކްޓަރު/ޕްރޮޑިއުސަރު ކަރަން ޖޯހަރާއި ކޭކޭ މެނަން ވެސް ފެނިގެން ދާނެ އެވެ.
އަނުރާގް ކެޝަޕް ޑައިރެކްޓްކޮށްފައިވާ މި ފިލްމުގައި ދައްކުވައި ދޭނީ 1960 ގެ އަހަރުތަކުގައި މުމްބާއީގައި ހިނގާފައިވާ ހާދިސާތަކެވެ.
"ބޮމްބޭ ވެލްވެޓް" ޝޫޓްކޮށްފައި ވަނީ ސްރީ ލަންކާގަ އެވެ. އެއީ މުމްބާއީ ގޮތަށް ތައްޔާރުކޮށްފައިވާ އަގު ބޮޑު، ބިޔަ ސެޓެއްގަ އެވެ.