ރެޖިސްޓަރ ނުކޮށް ހިނގާ ކަމަށް ބުނެ ބްލޮކް ކޮށްފައިވާ ދެ އޮންލައި ވެބްސައިޓުގެ ކޮންޓެންޓާއި ގުޅޭ އެއްވެސް މައްސަލައެއް މޯލްޑިވިސް މީޑިއާ ކައުންސިލަށް ހުށަހާޅާފައި ނުވާ ކަމަށް އެކައުންސިލުން ބުނެފިއެވެ.
އެކައުންސިލުން މިކަމާއި ނެރެފައިވާ ބަޔާނުގައި ބުނީ، މޯލްޑިވިސް މީޑިއާ ކައުންސިލުގެ ޤާނޫނުގެ 36 ވަނަ މާއްދާގައި ރެޖިސްޓަރ ނުކޮށް ހިންގާ މަޖައްލާތަކާއި ވެބްސައިޓުތަކަކީވެސް "މީޑިއާ" ކަމަށް އެނގޭ ކަމަށެވެ. އަދި ރާއްޖެއިން ނުވަދެވޭ ގޮތް ހަދާފައިވާ ދެ ވެބްސައިޓުގެ ކޮންޓެންޓާއި ގުޅޭ އެއްވެސް މައްސަލައެއް އެ އިދާރާއަށް ހުށަހަޅާފައި ނުވާ ކަމަށް އެމްއެމްސީ ބުނެއެވެ.
" ބްލޮކް ކޮށްފައިވާ ދެ ވެބްސައިޓުގެ ކޮންޓެންޓާއި ގުޅޭ އެއްވެސް މައްސަލައެއް މި ކައުންސިލަށް ހުށަހަޅާފައި ނުވާއިރު، އުސޫލެއް ނެތި ބްލޮކް ކުރުމަކީ ކަންބޮޑުވުމެއް. މިއީ ނޫސްވެރިކަމުގެ މިނިވަންކަމަށް އެޅުނު ހުރަހެއް އަދި ނުރައްކަލެއް " އެމްއެމްސީ ބަޔާނުގައިވެއެވެ.
ސަރުކާރުން ވަނީ ރެޖިސްޓަރ ނުކޮށް ހިންގަމުންދިޔަ "ކުރުސީ" އަދި "ދިޔަވަރު" ކިޔާ ވެބްސައިޓެއް ބްލޮކް ކޮށްފައެވެ. މި ވެބްސައިޓުތައް ބްލޮކް ކުރީ ކޮން ސަބަބަކާއި ހުރެ ކަމެއް ދި ކޮން އުސޫލެއްގެ ދަށުން ކަމަށް ސާފެއް ނުވެއެވެ. ނަމަވެސް ރައީސް އޮފީހުގެ ތަރުޖަމާނު މުހައްމަދު ޝަހީބު ވަނީ ސަރުކާރުން ރެޖިސްޓަރ ކޮށްފައިވާ އެއްވެސް ނޫހެއް ނުވަތަ ވެބްސައިޓެއް ނުހުއްޓުވާނެ ކަމަށް ބުނެފައެވެ. އަދި ނޫސްވެރިކަމުގެ މިނިވަންކަން ކަށަވަރުކޮށްދޭނެ ކަމަށް ބުނެފައެވެ.
ސަރުކާރާއި ދެކޮޅު ޚަބަރު ފަތުރަމުން ދިޔަ ދެ ވެބްސައިޓު ބްލޮކް ކޮށްފައިވާއިރު، މިދިޔަ ހަފްތާގައި ސަރުކާރުން ވަނީ ރާއްޖޭގައި ބަރަހަނާ ވެބްސައިޓުތައް ބްލޮކް ކުރާނެ ކަމަށް އިއުލާންކޮށް އެކަން ތަންފީޒު ކުރަން ފަށާފައެވެ. ނަމަވެސް ރިސޯޓުތަކުގައި އަދިވެސް މިފަދަ ވެބްސައިޓުތައް އެއްކޮށް ބްލޮކް ނުކުރެވޭ ކަމަށް މައުލޫމާތު ލިބެއެވެ.