ކުރީގެ ސަރުކާރުން ބިން ހިއްކަން ހިންގި މަޝްރޫއުތަކާ ގުޅޭ ގޮތުން މި ސަރުކާރުން ފަތުރަނީ ދޮގު ވާހަކަތަކެއް ކަމަށް ކުރީގެ އިކޮނޮމިކް މިނިސްޓަރު ފައްޔާޒް އިސްމާއީލް ވިދާޅުވެއްޖެ އެވެ.
"ރަސްމާލެ" ގެ ނަމުގައި ހިންގާ މަޝްރޫއަށް ފުށިދިއްގަރު ފަޅު މި ސަރުކާރުން ހިއްކައި ބޮޑު މަޝްރޫއެއް ކުރިއަށް ގެންދަން ނިންމާފައިވާ އިރު، އެ މަޝްރޫ އާއި ކުރީގެ މިފަދަ މަޝްރޫއުތަކާ އަޅާކިޔައި ތަފާސްހިސާބުތަކެއް ފިޝަރީޒް މިނިިސްޓަރު އަހުމަދު ޝިޔާމު ހިއްސާކުރައްވައި ވިދާޅުވީ ދައުލަތުގެ މާލީ ހާލަތު ގޯސްވެ ދައުލަތުގެ ދަރަނި އިންތިހާ އަށް ބޮޑު މި ދަނޑިވަޅުގައި ދައުލަތުން އެންމެ ލޯލާރިއެއް ވެސް ޚަރަދު ނުކޮށް ދައުލަތުލުގެ ނެތްވަރު ބޮޑު އެސެޓެއް އުފެއްދެވުމަކީ ގައުމުގެ މުސްތަޤުބަލަށް ރައީސް ޑރ. މުހައްމަދު މުހިއްމު އެޅުއްވި ވަރަށް މުހިއްމު ފިޔަވަޅެއް ކަމަށެވެ.
"ރައްޔިތުންގެ އަސާސީކަންކަން ފަހިކޮށް ދިނުމަކީ ދައުލަތުގެ ކެރިކުޅަދާނަކަން ހުރި މިންވަރަކުން ކުރުމަށް ޤާނޫނު އަސާސީން ދަޢުލަތުގެ އެންމެ އިސް ވެރިއަކަށް ހުންނަވާ ފަރާތަކަށް ލާޒިމްކުރާ ކަންކަން،" އޭނަ ވިދާޅުވި އެވެެ. "ރަސް މާލެ އަކީ ރާއްޖޭގެ ރައްޔިތުންގެ ބޯހިޔާވަހިކަމަށް އޮތް ޖުމްލަ ހައްލު."
މީގެ ރައްދުގައި ފައްޔާޒް ވިދާޅުވީ މި ވާހަކަތަކުގައި ހުރީ ކަނޑައެޅިގެން އޮޅުވާލުން ކަމަށެވެ.
މީ ކަނޑައެޅިގެން އޮޅުވާލުމެއް. ރައީސް މުއިޒު ވަރަށް ގަދަޔަށް ވިދާޅުވި އެއްވެސް ކަމެއް އެއްވެސް މިންވަރަކަށް ސިއްރުނުކުރައްވާނެކަމަށް. މަނިކުފާނަށް ކެރިވަޑައިގަންނަވާނެކަމަށް ޤަބޫލުކުރަން ތި ހުރިހާ އެގްރީމަންޓްގެ ކޮޕީ ޓްވީޓްކޮއްލަންވަން. އަވަހަށް ހާމަކޮއްލަދެއްވާ. https://t.co/hDcTkzFfB9
— Fayyaz Ismail (@faya_i) December 22, 2023
"ރައީސް މުއިޒު ވަރަށް ގަދަޔަށް ވިދާޅުވި އެއްވެސް ކަމެއް އެއްވެސް މިންވަރަކަށް ސިއްރު ނުކުރައްވާނެ ކަމަށް،" އޭނަ ވިދާޅުވޮ އެވެ. "މަނިކުފާނަށް ކެރިވަޑައިގަންނަވާނެކަމަށް ޤަބޫލުކުރަން ތި ހުރިހާ އެގްރީމަންޓްގެ ކޮޕީ ޓްވީޓްކޮއްލަންވަން. އަވަހަށް ހާމަކޮއްލަދެއްވާ."
ބޯހިޔާވަހި ކަމަށް ފުރިހަމަ ހައްލެއް ވެސް ގެނުވައިދޭން ސަރުކާރުން "ރަސްމާލެ" ހިއްކަން ފެށީ މިދިޔަ އަންގާރަ ދުވަހު އެވެ. ރައީސް ވިދާޅުވީ މިއީ ދައުލަތުގެ ބަޖެޓަކުން އެއްވެސް ހަރަދެއް ނުހިނގާ ގޮތަށް ކުރިއަށް ގެންދާ މަޝްރޫއެއް ކަމަށެވެ.
އެ މަޝްރޫއު ކުރިއަށް ގެންދާ އާބަންކޯ އިން ބުނެފައި ވަނީ ފުށިދިއްގަރުފަޅު ހިއްކަނީ 70 ހެކްޓަރުގެ ބިން، އެ މަސައްކަތް ކުރިއަށް ގެންދާ ސްރީ ލަންކާގެ ކެޕިޓަލް މެރިން އެންޑް ސިވިލް ކޮންސްޓްރަކްޝަން ކޮމްޕެނީ (ސީއެމްސީ) އަށް ދޭގޮތަށް ކަމަށެވެ.
އާބަންކޯގެ މެނޭޖިން ޑިރެކްޓަރު ފަޒުލް ރަޝީދު ވިދާޅުވީ މި މަޝްރޫއަށް ދައުލަތުން އަދި އާބަންކޯ އިން ވެސް އެއްވެސް ފައިސާއެއް ހަރަދު ނުކުރާނެ ކަމަށާއި މި މަޝްރޫއުގެ އަގު އަދާކުރާނީ ހުޅުމާލެ އިން 10 ހެކްޓަރުގެ ބިމާއި ފުށިދިއްގަރުފަޅުން ހިއްކާ ބިމުން 60 ހެކްޓަރުގެ ބިން ސީއެމްސީސީ އަށް ދީގެން ކަމަށެވެ.
"ހުޅުމާލެއިން ދޫކުރާ 10 ހެކްޓަރާއި، ރަސްމާލެއިން ދޫކުރާ 60 ހެކްޓަރު. އޭގެ ބަދަލުގައި އަޅުގަނޑުމެންނަށް މި ލިބެނީ 1093 ހެކްޓަރުގެ ބިން. އެޗްޑީސީގެ އެސެޓަށް ނުވަތަ އެޗްޑީސީއަށް ޖަމާވެގެން މި އަންނަނީ." އޭނަ ވިދާޅުވި އެވެ.
އެ ބިންތައް ދޫކޮށްފައި ވަނީ "ޑެވެލޮޕްމަންޓު ޕީރިއަޑް" އަށް ކަމަށާއި އެއީ 99 އަހަރުގެ މުއްދަތަށް ކަމަށް ފަޒުލް ވިދާޅުވި އެވެ. އަދި މި މަޝްރޫއުގެ ސަބަބުން އާބަންކޯގެ ކޭޝް ފްލޯއަށް އަސަރެއް ނުކުރާނެ ކަމަށްވެސް ވިދާޅުވި އެވެ.
"ކުރިއަށް އޮތް ތަނުގައި މި ޕްރޮޖެކްޓްގެ ސަބަބުން އަޅުގަނޑުމެންގެ ކޭޝް ފްލޯއަށް އިތުރު ތިޔާގިކަން ލިބިގެންދާނެ. އިތުރު ލޯނު ނެގުމުގެ ފުރުސަތުތަކެއް ރާއްޖޭން ބޭރުގެ ކުންފުނިތަކަށް އަޅުގަނޑުމެންގެ އެޝުއަރެންސްތަކެއް ލިބިގެން މިދިޔައީ." ފަޒުލް ވިދާޅުވި އެވެ.
ފުށިދިއްގަރުފަޅު މަޝްރޫއު އަށް ބަޖެޓުގައި ހިމަނަން ހުށަހެޅި 400 މިލިއަން ރުފިޔާ ވަނީ ބަޖެޓް ފާސްކުރިއިރު އުނިކޮށްފަ އެވެ.