އިންޑިއާގެ ކެރަލާ ސްޓޭޓްގައި ބާރަށް ކޮވިޑް-19 ފެތުރެމުން އެބަދެ އެވެ.
ދިވެހިން ވެސް ވަރަށް ގިނައިން ދަތުރުކުރާ މި ސްޓޭޓްގައި ކޮވިޑްގެ ކޭސްތައް އިތުރުވަމުންދާ އިރު، ކެރެލާގެ ހެލްތު އެންޑް ވެލްފެއާ މިނިސްޓްރީން އިއްޔެ އާންމުކުރި ތަފާސްހިސާބުތައް ދައްކާ ގޮތުން ފާއިތުވި 24 ގަޑިއިރު ތެރޭގައި ކޮވިޑްގެ ޖެހުނު މީހުންގެ އަދަދު 265 އަށް އަރަ އެވެ. އަދި އޭގެ ތެރެއިން އެކަކު ވަނީ މަރުވެފަ އެވެ.
ކެރަލާ އަކީ މީގެ ތިން އަހަރު ކުރިން ކޮވިޑްގެ ހާލަތު އެންމެ ގޯސްވި ދުވަސްވަރު އިންޑިއާގައި ބަލީގެ ހާލަތު އެންމެ ބޮޑު ސްޓޭޓެވެ. އެގޮތުން އިންޑިއާގެ ކޮވިޑް ކޭސްތަކުގެ 80 ޕަސެންޓް ނިސްބަތްވަނީ ވެސް ކެރެލާއަށެވެ.
ހެލްތު މިނިސްޓްރީން ބުނީ ކޮވިޑް ޖެހިގެން އިއްޔެ މަރުވި މީހާއާ އެކީ ކެރެލާ އިން މިހާތަނަށް ކޮވިޑް ޖެހިގެން މަރުވި މީހުންގެ އަދަދު ޖުމްލަ 72،060 އަށް އަރާ ކަމަށެވެ. މިނިސްޓްރީން ބުނި ގޮތުގައި ފާއިތުވި 24 ގަޑިއިރުގެ ތެރޭގައި ކޮވިޑް ޖެހުނު މީހުންގެ އަދަދު 300 އާ ގާތްކުރި އިރު، ކުރިން ބަލި ޖެހި، އެ މުހުލަތުގެ ބަލިން ރަނގަޅުވި މީހުންގެ އަދަދު 275 އަށް އަރަ އެވެ.
ކޮވިޑް ބާރަށް ފެތެރުންތީ ކެރަލާ ހެލްތު މިނިސްޓަރު ވީނާ ޖީޖް ވިދާޅުވީ ބަލިން ރައްކާތެރިވުމިގެ ގޮތުން މާސްކް އެޅުން ފަދަ ކަންކަން މިހާރު ކުރަން ޖެހޭ ކަމަށެވެ. އެހެންވެ ކޮވިޑްގެ ތެރޭގައި އަމަލުކުރި މުހިއްމު އުސޫލުތަކަށް އާންމުން ތަބާވުމަށް އިލްތިމާސްކުރެއްވި އެވެ.
ބަލި ފެތުރުން ކޮންޓްރޯލްކުރުމުގެ ގޮތުން ކެރަލާގައި ސިއްހީ ހިދުމަތް ދޭ ހުރިހާ ތަނެއްގައި މިހާރު ވަނީ މާސްކް އެޅުން މަޖުބޫރު ވެސް ކޮށްފަ އެވެ.