ނައީޝް ހޯދުން ކުރިއަށް

އިއްޔެ ރޭ އިހި ނަގަން ނުކުމެ އުޅެނިކޮށް ގެއްލުނު އައްޑޫ ޒުވާނާ ހޯދުމުގެ މަސައްކަތް ހުއްޓާ ނުލައި ކުރިއަށް ގެންދާ ކަމަށް އެމްއެންޑީއެފުން ބުނެފި އެވެ.

އެތަނުން މިއަދު ބުނީ އައްޑު އަށް މި ވަގުތު މޫސުން އެހާ ރަނގަޅު ނޫން ނަމަވެސް މަރަދު އަށް ނިސްބަތްވާ މުހައްމަދު ނައީޝް ނަސްރު ،18، ހޯދުމުގެ މަސައްކަތް ކަނޑާއި ވައިގެ މަގުން ވެސް ބަލަމުން އަންނަ ކަމަށެވެ. ވައިގެ މަގުން މި އޮޕަރޭޝަނުގައި އަންނަނީ ގަމުގައި މޯލްޑިވިއަނުން ހިންގަމުން އަންނަ ފްލައިން ސްކޫލް، މޯލްޑިވްސް އޭޝިއަން އެކަޑެމީގެ ބޯޓެއް ވެސް ބޭނުން ކުރަމުންނެވެ.

އައްޑޫ ހައި ސްކޫލްގެ ގްރޭޑް 12 ކިޔަވަމުން އައި ނައީޝް ގެއްލުނު އިރު ލައިގެން ހުރީ އަތްދިގު ހުދު ކުލައިގެ ޓީޝާޓެކެވެ. އޭނަ އިހި ނަގަން އިތުރު ދެ މީހަކާ އެކީ ފޭބީ ގަމުގެ ދެކުނު ފަރާތަށެވެ. އޭނަ ގެއްލިގެން ރިޕޯޓްކުރީ އިއްޔެ ރޭ 10:45 ގަ އެވެ.

އެމްއެންޑީއެފުން ރޭ ބުނީ ސަދަން އޭރިއާ ކޮމާންޑް، ކޯސްޓްގާޑްގެ ފޯތު ސްކޮޑްރަން އިން ކުރިއަށް ގެންދާ އޮޕަރޭޝަންގައި ވައިގެ މަގުން 23.46 ސްކޮޔާ ނޯޓިކަލް މޭލު އަދި ކަނޑުމަގުން 490 ސްކޮޔާ ނޯޓިކަލް މޭލު މިހާތަނަށް ބަލައިފައިވާ ކަމަށެވެ.