އައްޑޫގެ ގުޅިފައިވާ އަވަށްތަކުން ކުނި ނެގުމުގެ މަސައްކަތް ކުރަމުން އަންނަ ކުންފުނީގެ އެގްރިމަންޓް އަންނަ މަހު ހަމަވާތީ، އައްޑޫ ސިޓީ ކައުންސިލުން ކުނި ނަގާ ގޮތަށް ނިންމައިފި އެވެ.
ކައުންސިލުން އަވަށްތަކުގެ ގޭބިސީތަކުން ކުނި ނަގައި، ކުނި ކޮއްޓަށް ޖަމާ ކުރުމުގެ މަަސައްކަތް ފަށަން ހަމަޖެހިފައި ވަނީ އަަންނަ މަހުގެ 11 ވަނަ ދުވަހުން ފެށިގެންނެވެ.
މިހާރު ކުނި ނަގާ ކުންފުނި ސަދަން މޯލްޑިވްސް ކޮންޓްރެޓިން އެންޑް ޓްރޭޑިން އާ އެކު ހަދާފައިވާ އެއްބަސްވުމުގެ މުއްދަތު އެޕްރީލް 10، 2015 އަށް ހަމަވާނެ އެވެ.
ކައުންސިލުން ނެރުނު އިއުލާނެއްގައި ބުނަނީ ހިތަދޫ، މަރަދޫ، މަރަދޫފޭދޫ އަދި ފޭދޫ ގޭބިސީތަކުންނާއި އެހެނިހެން ތަންތަނުން ނަގާ ކުނި ރުއްޖެހެރައިގައި ގާއިމުކޮށްފައިވާ ކުނި ކޮއްޓަށް ޖަމާ ކުރުމުގެ އިތުރުން ހުޅުދު އާއި މީދޫގެ ކުނި ކޮށި ވެސް ހިންގައި ބަލަހައްޓަން ނިންމާފައިވާ ކަމަށެވެ.
އެހެންވެ އެކަންކަމާ ގުޅޭ މަސައްކަތްތައް އިންތިޒާމު ކުރަމުން އަންނަ ކަމަށް ކައުންސިލުން ބުންޏެވެ.
ކައުންސިލުން ބުނީ ކައުންސިލް މެދުވެރިކޮށް ކުނި ގެންދަން ބޭނުންވާ ފަރާތްތަކަށް، އަވަށްތަކުގެ ގޭބިސީތަކަށް އެކަމާ ގުޅޭ ފޯމް ވެސް މިހާރު އަވަށު އޮފީސްތަކުން ދޫކުރަމުން އަންނަ ކަމަށެވެ. ފީ ވެސް ދައްކަން ޖެހެނީ އަވަށު އޮފީސްތަކަށެވެ.
"އައްޑޫ ސިޓީގެ ކުނި މެނޭޖް ކުރުމުގެ މަސައްކަތް ދެމެހެއްޓިނިވި ގޮތަކަށް ކުރުމަކީ މުޅި މުޖުތަމައުގެ އެންމެހައި ފަރުދުންނާ ގުޅިލާމެހިފައިވާ ކަމަކަށްވީ ހިނދު މިކަމުގައި އައްޑޫގެ އެންމެހައި ފަރުދުންގެ ފުރިހަމަ އެހީތެރިކަމާއި އެއްބާރުލުން ކައުންސިލަށް ބޭނުންވެ އެވެ." ކައުންސިލްގެ އިއުލާނުގައިވެ އެވެ. "އަދި ކުނިކޮށިތަކަށް ކުނި އުކުމުގެ ހިދުމަތް ހޯއްދެވުމަކީ ވެސް ކައުންސިލްގެ ވަރަށް ބޮޑު އެދުމެކެވެ."
ކައުންސިލުން ބުނީ ކުނި އުކައިދޭ އަގުތައް ވެސް އަވަށު އޮފީސްތަކުން މިހާރު ލިބޭނެ ކަމަށެވެ.