ދިވެއްސަކު ކަނޑުމައްޗަށް ގެއްލިގެން އުޅޭއިރު ހުރިހާ ވަސީލަތެއް ބޭނުން ކުރަން ޖެހޭނެ ކަމަށް ޑިމޮކްރެޓްސްގެ ޑިމޮކްރެޓްސް ޕާޓީގެ ރައީސް ކަމަށް ދާދި ފަހުން ވާދަ ކުރެއްވި ހުސެއިން އަމްރު ވިދާޅުވެއްޖެއެވެ.
އޭނާ އެކްސްގައި ކުރެއްވި ޕޯސްޓެއްގައި ވިދާޅުވީ ސަރުކާރުގެ އެންމެ ބޮޑު ޒިންމާއަކީ ރައްޔިތުންގެ ފުރާނަ ހިމާޔަތް ކުރުން ކަމަށެވެ. އަދި ދިވެއްސަކު ކަނޑުމަތިން ގެއްލުމުން ރާއްޖޭގައި ހުރި ހުރިހާ ވަސީލަތްތައް ބޭނުން ކުރަން މަޖުބޫރު ކަމަށް ވިދާޅުވިއެވެ.
"މީހުން ހޯދުމުގެ މަސައްކަތަކީ ވަކި ވަސީލަތްތަކާއި އުކުޅުތައް ބޭނުން ކުރަން ޖެހޭ ކަމެއް. އެ ލިބެން ހުއްޓާ ބޭނުން ނުކުރުމަކީ ގޯހެއް " އަމްރު ވިދާޅުވިއެވެ.
އެސްޓީއޯގެ ކުރީގެ މެނޭޖިންގް ޑިރެކްޓަރުކަންވެސް ކުރައްވާފައިވާ އަމްރު އިޝާރާތް ކުރެއްވީ އައްޑޫއިން ބުރާސްފަތި ދުވަހުގެ ރޭ އިހިނަގަން ފައިބައިގެން އުޅެނިކޮށް ގެއްލިގެން އުޅޭ 18 އަހަރުގެ މުހައްމަދު ނައީޝް ހޯދުމަށް ކުރަމުންދާ މަސައްކަތަށެވެ. އެ މަސައްކަތުގައި ވައިގެ މަގުން ނައީޝް ހޯދުމަށް ބޭނުން ކުރަމުންދަނީ މޯލްޑިވިއަން އެވިއޭޝަން އެކަޑަމީގެ ތަމްރީނުތަކަށް ގެނެސްފައިވާ ބޯޓެވެ.
މި އޮޕަރޭޝަންގައި އިންޑިއާއިން ސިފައިން ރާއްޖޭގައި އޮޕްރޭޓް ކުރަމުންދާ ސާޗް އެންޑް ރެސްކިއު އަދި މެޑިކަލް އިވެކުއޭޝަން އަށް ހާއްސަ ޑޯނިއާގެ އިތުރު މީގެ ކުރިން މިފަދަ އޮޕަރޭޝަންތަކުގައި އައްޑޫގައި ބޭނުންކޮށްފައިވާ ހެލިކޮޕްޓަރުވެސް ބޭނުން ނުުކުރެއެވެ. ސަރުކާރުން މިތަކެތި ބޭނުން ނުކުރާ ސީދާ ސަބަބެއް ހާމައެއް ނުކުރެއެވެ.
ނަމަވެސް ސަރުކާރުން ވަނީ އެ އޮޕަރޭޝަންތައް ހުއްޓާލާފައި ނުވާ ކަމަށް މިމަހުގެ 17 ވަނަ ދުވަހު ބޭއްވި ނޫސްވެރިންގެ ބައްދަލުވުމުގައި ކަށަވަރުކޮށްދީފައެވެ. މި އޮޕަރޭޝަން ތަކުގައި ޑޯނިއާ ބޭނުން ނުކުރާ ސަބަބެއް ސާފު ކުރުމަށް އައްޑޫލައިވް އިން ކުރި މަސައްކަތް ވަނީ ނާކަމިޔާބުވެފައެވެ.