އައްޑޫ ލިންކް ރޯޑްގެ އެކި ހިސާބުތަކުން ތާރުގަނޑު ވަރަށް ބޮޑަށް ހަލާކުވެ، ވަޅުގަނޑު ހެދި ދުއްވާ މީހުންނަށް މިކަމުގެ ނުރައްލާ ކުރިމަތިލާން ޖެހިއްޖެ އެވެ.
މި ކަންބޮޑުވުން ބައެއް މީހުން އަންނަނީ ސޯޝަލް މީޑިއާގައި ވެސް ހިއްސާކުރަމުންނެވެ. ލިންކް ރޯޑްގައި މިހާރު އެންމެ ބޮޑެތި ވަޅުގަނޑުތައް ހުރި އެއް ދިމާ އަކީ ކުރީގެ "ރުއްފަށާ" ހުރި ދިމާލެވެ. އެ އެ ސަރަހައްދުގެ އެކި ހިސާބުތަކުގައި ބޮޑެތި ފުން ވަޅުގަނޑުތައް ހެދިފައިވެ އެވެ.
މީގެ އިތުރުން ލިންކް ރޯޑްގެ އެކި ހިސާބުތަކުގައި މިފަދަ ވަޅުގަނޑުތައް އެބަހުއްޓެވެ. ލިންކް ރޯޑުން ފާހަގަކުރެވޭ އަނެއް މައްސަލަ އަކީ މަގުގެ ބައެއް ހިސާބުތަކުގައި ތާރުގަނޑު އަޑިކޮށް އޮތުމުން ދުއްވާ މީހުން އެފަދަ ތަންތަނަށް އަރައި ގެއްލުންވާ މައްސަލަ އެވެ. ހާއްސަކޮށް ތަންކޮޅެއް ބާރު ސްޕީޑްގައި ދާ ކަމަށްވާ ނަމަ މިފަދަ ތަންތަނުގެ ސަބަބުން ސައިކަލް ދުއްވާ މީހުންނަށް ނުރައްކާވަމުން ދެ އެވެ. އަދި އެފަދަ ތަންތަން އާންމުކޮށް ހުންނަނީ ދުރުން ފާހަގަ ވެސް ނުކުރެވޭ ގޮތަށެވެ.
ލިންކް ރޯޑްގެ އެކި ހިސާބުތަކުގައި ވަޅުގަނޑުތައް ގިނަވެ، މިކަމުގެ ނުރައްކާ ބޮޑުވެފައި އިރު، އެންމެ ބޮޑު އަނެއް ނުރައްކަލަކީ ވާރޭ ވެހޭ ނަމަ އެފަދަ ވަޅުގަނޑުތަކުގައި ފެން ހެދުމެވެ. އޭގެ ސަބަބުން ގިނަ ފަހަރަށް ވަޅުގަނޑެއްކަން ފާހަގަ ނުކުރެވި އެފަދަ ތަންތަނަށް ސައިކަލުގައި އަރައި ވެއްޓި އަނިޔާވުމުގެ މައްސަލަ އެވެ.
މިފަދަ ވަޅުގަނޑުތަކާ ހެދި އިމަޖެންސީ ހާލަތުގައި ދާ އެމްބިއުލާންސަށް ވެސް މިކަމުގެ އުނދަގޫތަކާއި ތުރާތަކާ ކުރިމަތިލާން ޖެހިފައިވެ އެވެ.
ލިންކް ރޯޑްގެ އެކި ދިމާތަކުން ތާރުގަނޑު ހަލާކުވެ، ވަޅުތައް ހެދުމުން މީގެ ކުރިން ވެސް އެތައް ފަހަރެއްގެ މަތިން މަރާމާރުކޮށްފައިވެ އެވެ. އެގޮތުން އެފަދަ ތަންތަނަށް ވަގުތީ ގޮތުން ވެލި އެޅުމާއި ކޮންކްރީޓް އެޅުން ފަދަ ކަންކަން ކައުންސިކުން ކޮށްފައިވެ އެވެ.