މާލޭ ސަރަހައްދުން ފައިލޭރިއާގެ އިތުރު ހަ ކޭސް ފެނިއްޖެ އެވެ.
އެޗްޕީއޭއިން ނެރުނު ބަޔާނެއްގައި ބުނީ މާލެ ސަރަހައްދާއި ތިލަފުށި އަދި ގުޅީފަޅުގައި މިދިޔަ ހުކުރާއި ހޮނިހިރު ދުވަހު ބިދޭސީން މަސައްކަތް ކުރާ ސައިޓުތަކުގައި ފައިލޭރިއާއަށް ޓެސްޓުކުރުން ކުރިއަށް ގެންގޮސްފައިވާ ކަމަށެވެ.
އެ ޓެސްޓުގެ ތެރޭގައި އިތުރު ޕޮޒިޓިވް ކޭސްތަކެއް ފެނިފައިވާ ކަމަށް އެޗްޕީއޭ އިން ބުނެ އެވެ.
ރާއްޖެއިން މިހާތަނަށް ޕޮޒިޓިވް 32 ކޭސް ވަނީ ފެނިފަ އެވެ. އޭގެތެރޭގައި ހިމެނެނީ ހދ. ކުޅުދުއްފުށިން ފެނުނު 25 ޕޮޒިޓިވް ކޭސް އާއި މާލެ ސަރަހައްދުން ފެނުނު ހަތް ކޭސް އެވެ. މި އެންމެންނަކީ ވެސް ބިދޭސީންނެވެ.
ފައިލޭރިއާ އަށް މިހާތަނަށް 683 މީހަކު ވަނީ ޓެސްޓުކޮށްފަ އެވެ. އޭގެތެރެއިން 651 މީހެއްގެ ޓެސްޓުތަކުގެ ނަތީޖާ ނެގެޓިވް ވެފައިވާ ކަމަށް އެޗްޕީއޭ އިން ބުނެ އެވެ. ފައިލޭރިއާގެ ކޭސްތަކެއް ފުރަތަމަ ފެނުނީ މި މަހުގެ ކުރީކޮޅު ކުޅުދުއްފުށިންނެވެ.
ފައިލޭރިއާގެ ކޭސްތަކެއް ރާއްޖެ އިން ފެނިގެން އެކަމާ ގުޅިގެން ފިޔަވަޅުތަކެއް އަޅަމުން އަންނަ އިރު، މިއީ ރާއްޖެ އިން ނައްތާލެވިފައި އޮތް ބައްޔެކެވެ.