އައްޑޫސިޓީން ޓުއަރިޒަމަށް ދޫކޮށްފައިވާ ބިންތަކުގެ ތެރެއިން، ބިމެއްގައި ގައު ޖަހާ ވިއްކާ މައްސަލައެއް ފެންމަތިވެއްޖެއެވެ.
މިދިޔަ ބުދަ ދުވަހު ބޭއްވި އައްޑޫސިޓީ ކައުންސިލުގެ ރަސްމީ ޖަލްސާގައި މި މައްސަލަ ވަނީ ހުށަހަޅާފައެވެ. އެ މައްސަލަ ހުށަހަޅައި ކައުންސިލުގެ ޓުއަރިޒަމް ކޮމެޓީގެ މުޤައްރިރު ކައުންސިލަރ ހުސެއިން ޒަރީރުއެވެ.
މިމައްސަލާގައި ކޮމެޓީން ނިންމާފައިވާގޮތް ކައުންސިލް ޖަލްސާގައި ހުށަހަޅަމުން ޒަރީރު ވިދާޅުވީ، ހިތަދޫ ޓުއަރިޒަމް ޒޯނުން ދޫކޮށްފައިވާ ބިމެއް އެއްވެސް ހުއްދައެއް ނުހޯދާ، ގުދަނެއް ގޮތަށް އިމާރާތް ކުރުމަށް ފަހު އެތަނުގައި ދޮންވެލި ފުނިޖަހައި، ގާ ޖަހައި ވިއްކާކަމުގެ މަޢުލޫމާތު ލިބިފައިވާތީ، އެފަރާްތް 25،000 ޑޮލަރުން ޖޫރިމަނާކޮށް އެ ބިމުގައި ޤަވާއިދާއި ޚިލާފަށް ކުރިއަށް ގެންދާ މަސައްކަތް ހުއްޓާލުމަށް އެންގުމަށެވެ.
މިމައްސަލައަށް ކައުންސިލް ޖަލްސާގައި ވާހަކަ ދައްކަވަމުން ކައުންސިލަރ ޒަރީރު ވިދާޅުވީ، މިކަމުގައި ސިޓީ ކައުންސިލުން އެ ފަރާތާއި ފުރަތަމަ ވާހަކަ ދެއްކި ކަމަށާއި، އޭރު އެ ފަރާތުން ބުނެފައިވަނީ އެ ތަނަގައި ވެލި ފުނި ޖެހީ އެ ތަނުގައި އޮތް އެފަރާތުން އެހެން ބިމެއްގައި މަސައްކަތް ފެށުމަށް ކަމަށެވެ. ނަމަވެސް އޭގެ ފަހުން ކައުންސިލުގެ މުވައްޒަފުން ބެލި ބެލިބެލުމުން ގާ ޖަހާ ވިއްކުމުގެ މަސައްކަތް ކުރާކަން ފާހަގަ ކުރެވިފައިވާ ކަމަށާއި، މިއީ އެއްވެސް ހުއްދައެއް ހޯދުމަކާއި ނުލައި އަދި އެއްބަސްވުމާއިވެސް ޚިލާފަށް ކުރާ ކަމެއް ކަމަށެވެ.
މި ބައްދަލުވުމުގައި ގިނަ ކައުންސިލަރުން ވަނީ މި ބިންތަކަކީ ވަރަށް ކުޑަ ކުލިއެއްގައި ދިނުމަށް އޭރުގެ ސަރުކާރުން ނިންމާފައިވާ ބިންތަކަށްވީއިރު، ހަވާލު ކުރެވުނު މަސައްކަތް އެއްބަޔަކު ކޮށް އަނެއް ބަޔަކު ނުކޮށް ބޭނުން ކުރަން ދޫކޮށްލުމަކީ ކުރެވޭނެ ކަމެއް ނޫން ކަމަށެވެ. އަދި އެއްބަސްވުމާއި ޚިލާފުވެއްޖެ ނަމަ ޖޫރިމާނާ ކުރަން އޮންނަނީ 25،000 ޑޮލަރާއި 100،000 ޑޮލަރާއި ދެމެދުގެ އަދަދެއްކަން ވަނީ ފާހަގަ ކޮށްފައެވެ.
ޖަލްސާގައި ޑެޕިއުޓީ މޭޔަރ މުހައްމަދު ޝުޢާއު ވަނީ މިމައްސަލަ އެކަން ރަނގަޅުކުރަން 15 ދުވަހުގެ މުހުލަތެއް ދިނުމަށް ހުށަހަޅައި އެގޮަށް ޢަމަލު ނުކޮށްފިނަމަ ޖޫރިމަނާ ކުރަން ހުށަހަޅާފައެވެ. ކައުންސިލުގެ ޖަލްސާއިން ފާސްވީ މިގޮތަށް އެކަން ކުރުމަށެވެ.
އައްޑޫސިޓީ ކައުންސިލުން ބުނީ، އެ މައްސަލާގައި ބިމުގެ ވެރިފަރާތައް މިހަފްތާ ތެރޭ ސިޓީ ފޮނުވާނެ ކަމަށެވެ. އައްޑޫސިޓީ ޓުއަރިޒަމް ޒޯންތަކުގެ އެއްބަސްވުންތަކަކީ ކުރިން ޓުއަރިޒަމް މިނިސްޓްރީއާއެކު ފުރަތަމަ ވެވުނު އެއްބަސްވުންތަކެކެވެ. ނަމަވެސް ފަހުން އެއްބަސްވުންތައް ވަނީ އައްޑޫސިޓީ ކައުންސިލުގެ ދަށަށް ބަދަލުކޮށްފައެވެ. މިއީ އޭރުގެ ސަރުކާރުގެ ލާމަރުކަޒީ ސިޔާސަތުގެ ދަށުން ކޮށްފައިވާ ކަމެކެވެ.