ޤައުމީ އެއާލައިން މޯލްޑިވިއަންއިން ހަފްތާއަކު ދެ ދަތުރު ކުރާ ގޮތަށް ބ. ފުޅަދޫއަށް ދަތުރުތަށް ފަށައިފިއެވެ.
މޯލްޑިވިއަންއިން ބ. ފުޅަދޫއަށް ދަތުރުތައް ފަށާފައިވަނީ، މިއަދު ބޭއްވި އިނޯގްރަލް ދަތުރުގައި މޯލްޑިވިއަން ހިންގާ ކުންފުނި އައިލޭންޑް އެވިއޭޝަންގެ މެނޭޖިންގް ޑިރެކްޓަރ އިބްރާހިމް އިލްޔާސް، އަދި ޓުއަރިޒަމް މިނިސްޓްރީގެ ޑެޕިއުޓީ މިނިސްޓަރ އަޝްހަދު ސައީދު ބައިވެރިވެވަޑައިގެންނެވިއެވެ.
މޯލްޑިވިއަންއިން ފުޅަދޫއަށް ދަތުރުތަށް ފަށާފައިވަނީ ހަފްތާއަކު ދެދުވަހު ޝެޑިއުލް ދަތުރުތައް ކުރާ ގޮތަށެވެ. އެގޮތުން ދަތުރުތައް ކުރާނީ އާދީއްތަ އަދި ބުރާސްފަތި ދުވަހު ކަމަށް މޯލްޑިވިއަންއިން ބުނެއެވެ.
Honored to have Deputy Minister Ashhad Saeed participate in @MaldivianAero’s inaugural flight from Male’ to B. Fulhadhoo
Connectivity being a critical aspect of tourism, Baa atoll tourism is set to gain an immense boost from these scheduled operations. pic.twitter.com/ZLcMorFk3c
— Ministry of Tourism (@MoTmv) December 24, 2023
ކަނެކްޓިވިޓީއަކީ ފަތުރުވެރިކަމުގެ ސިނާޢަތައް މުހިންމު ކަމަކަށްވާއިރު، މޯލްޑިވިއަން ސީޕްލޭން ދަތުރުތައް ފުޅަދޫއަށް ފެށުމާއެކު މިއީ މި ސަރަހައްދުގެ ފަތުރުވެރިކަމަށް ލިބިގެންދާ ވަރަށް ބޮޑު ކުރިއެރުމެއް ކަމަށް ޓުއަރިޒަމް މިނިސްޓްރިން ބުނެއެވެ.
މިދަތުރުތަކާއި ގުޅޭގޮތުން މޯލްޑިއަންގެ މެނޭޖިންގް ޑިރެކްޓަރ، އިބްރާޙިމް އިލްޔާސް ވިދާޅުވީ ސީޕްލޭންތަކުން ދަތުރު ކުރުމަކީ އެހެން ގޮތްގޮތުން ދަތުރު ކުރުމަށްވުރެ ތަފާތު ތަޖުރިބާއެއް ކަމަށާއި، މިއީ ފަތުރުވެރިންނަށް ރާއްޖޭގެ އެކި ކަންކޮޅުތަކުގެ ރީތިކަން ބަލާލުމަށް ދަތުރުކުރެވޭނެ އިންތިޒާމު ހަމަޖެއްސުމަށް އެކުންފުނިން ދެމުންދާ ޔަޤީންކަމުގެ މިސާލެއް ކަމަށެވެ.
މޯލްޑިވިއަންއިން ބުނެފައިވަނީ މި ދަތުރުތަކުގެ ސަބަބުން ފުޅަދޫގެ އިތުރުން، ބ. ފެެހެންދޫ އަދި ގޮއިދޫއަށް ފަތުރުވެރިންނަށް ފަސޭހަކަމާއެކު ދަތުރު ކުރެވޭނެ ކަމަށާއި މިއީ މި ސަރަހައްދުގެ ފަތުރުވެރިކަމަށް ލިބިގެންދާ ބޮޑު ކުރިއެރުމެއް ކަމަށެވެ.