ސާނަވީ އަދި މަތީ ސާނަވީ ދަރިވަރުންނަށް ހާއްސަކޮށްގެން މޯލްޑިވްސް ޕޯޓްސް ލިމިޓެޑުން ކުރިއަށް ގެންދާ އިންޓާންޝިޕް ޕްރޮގްރާމް ފަށައިފިއެވެ.
މިއީ ސާނަވީ އަދި މަތީ ސާނަވީ ތަޢުލީމް ހާސިލްކުރަމުންދާ ދަރިވަރުންނަށް މަސައްކަތުގެ މާހައުލުގެ އަމަލީ ހުނަރުތައް ދަސްކޮށްދީ، ތަޖުރިބާ ހޯދައިދިނުމުގެ ގޮތުން އެމްޕީއެލްގެ ލާރނިންގ އެންޑް ޑިވެލޮޕްމަންޓް ޑިޕާޓްމަންޓް (އެލް.ޑީ.ޑީ) އިން ހިންގާ ޕްރޮގްރާމެކެވެ. މި ޕްރޮގްރާމް ކުރިއަށް ގެންދިއުމަށް ހަމަޖެހިފައިވަނީ 24 ޑިސެންބަރ 2023 އިން 4 ޖަނަވަރީ 2024ގެ ނިޔަލަށެވެ.
އިންޓާރންޝިޕް ޕްރޮގްރާމްގެ ބައިވެރިންނަށް މިއަދު ކުރިއަށް ގެންދިޔަ އޮރިއެންޓޭޝަން ބައްދަލުވުމުގެ ތެރެއިން، ކުންފުނީގެ ސީ.އީ.އޯ މުޙައްމަދު ވަޖީޙް އިބްރާހިމް ބައިވެރިންނާއި ބައްދަލު ކުރެއްވިއެވެ. މި ބައްދަލުވުމުގައި ވާހަކަ ދައްކަވަމުން ސީއީއޯ ވަޖީޙް ވިދާޅުވީ ޕޯޓުގެ ދާއިރާތަކަށް ޒުވާނުންގެ ޝައުގުވެރިކަން އިތުރުކުމަށް އެމް.ޕީ.އެލް އިން ބޭނުންވާ ކަމަށާއި ޒުވާނުންނަށް ކުރިއަށް ދިއުމަށް ފުރުސަތުތައް ފަހިކޮށްދިނުމުގައި އެމް.ޕީ.އެލް ދެމި އޮންނާނެ ކަމަށެވެ.
"މި ޕްރޮގްރާމްގައި ބައިވެރިވާ ދަރިވަރުންނަށް މި ކުންފުނީގެ ދާއިމީ ވާޒީފާތަކުންވެސް ފުރުސަތު ހޯދޭނެ. އަދި، ކުންފުނީގެ ވަޒީފާގައި ދެމިހުރެގެން (ކުންފުނީގެ ހަރަދުގައި) މަތީ ތަޢުލީމް ހާސިލްކުރުމުގެ ފުރުސަތުތައް ވެސް ލިބޭނެ. ޕޯޓުގެ އެކި ދާއިރާގައި މަސައްކަތްކުރާނެ ޒުވާނުން ބިނާކުރުމަކީ އަޅުގަނޑުމެން ވަރަށް ބޮޑު އިސްކަމެއްދޭ ކަމެއް،" ވަޖީޙް ވިދާޅުވިއެވެ.
The MPL Internship Program commenced today with the enrollment of 13 talented students. This marks the beginning of a transformative experience for the students as they embark on a journey of professional growth and practical learning. We wish all the students best of luck in… pic.twitter.com/RA1XA8EYIW
— Maldives Ports Limited (@Portmv) December 24, 2023
އެމްޕީއެލްއިން މިފަހަރު ކުރިއަށް ގެންދާ ޕްރޮގްރާމުގައި 13 ދަރިވަރުން ބައިވެރިވެފައިވެއެވެ. އެހެން އަހަރުތަކެކޭ އެއްގޮތަށް މި އަހަރުގެ އިންޓާރންޝިޕް ޕްރޮގްރާމްގައި ވެސް ދަރިވަރުން ތަމްރީނު ހޯދުމަށް ތަފާތު ދާއިރާތަކެއް ވަނީ ކަނޑައަޅައިފައެވެ. އެއީ އިންޖީން ރިޕެއަރ އެންޑް މެއިންޓަނަންސް، ފެބްރިކޭޝަން އޮފް ބްރާސް އިމްޕެލާރ،ކާޕެންޓްރީ،ޕަވަރަ ޖެނަރޭޝަން އެންޑް ޑިސްޓްރިބިއުޝަން،އެޗްވީއޭސީ އެންޑް އިލެކްޓްރިކަލް ސާރވިސް، ގްރެފިކް ޑިޒައިނިންގ،ކޮޕީ ރައިޓިންގ،ސިވިލް އިންޖިނިއަރިންގ، ސާރވޭއިން އަދި އާކިޓެކްޗަރަލް ޑްރާފްޓިންއެވެ.
މި ޕްރޮގްރާމްގައި މަސައްކަތުގެ އަމަލީ ތަޖުރިބާ ހޯދާއިރު، ކޮންމެ ކުއްޖަކަށް ވެސް މެންޓަރއެއް ހަމަޖައްސާނެއެވެ. މަސައްކަތުގެ މާހައުލުގައި ދަރިވަރުންނަށް މަސައްކަތުގެ ހުނަރު ދަސްކޮށްދީ، މަޢުލޫމާތުތައް ދިނުމުގައި އެންމެ ބޮޑު ދައުރެއް އަދާކުރާނީ މެންޓަރގެ ގޮތުގައި ކަނޑައަޅާފައިވާ މުވައްޒަފުންނެވެ.
މި ޕްރޮގްރާމްގެ އެއް ބޭނުމަކީ އެމް.ޕީ.އެލްގައި އޮތް ވަޒީފާގެ ފުރުސަތުތަކާއި، ދާއިރާތަކަށް ދަރިވަރުން އަހުލުވެރިކޮށް، މެރިޓައިމްއާ ގުޅުންހުރި ދާއިރާތަކަށް ދަރިވަރުން ޝައުގުވެރިކުރުމާއި ޕޯޓުގައި ކުރާ މަސައްކަތްތަކާމެދު ދަރިވަރުން އަހުލުވެރިކުރުން ކަމަށް އެމްޕީއެލްއިން ބުނެއެވެ.