ޝީޝާ އިން ސްޕޮންސަކޮށްގެން ލަ. އަތޮޅުގައި ބޭއްވި ސީލުލާމު އިންޓަ-ސްކޫލް ފުޓްބޯޅަ މުބާރާތުގެ ޗެމްޕިއަންކަން އެ އަތޮޅު ތަޢުލީމީ މަރުކަޒުން ހޯދައިފި އެވެ.
އިއްޔެ ހަވީރު ކުޅުނު ފައިނަލުގައި ލ. އޭއީސީން ޗެމްޕިއަންކަން ހޯދީ ހަމަދު ބިން ޚަލީފާ އާލް ޘާނީ ސްކޫލާ ވާދަކޮށް 1-3 ލަނޑުންނެވެ. މެޗްގެ ފުރަތަމަ ލަނޑު ޖެހީ ފުރަތަމަ ހާފުގެ ނުވަ ވަނަ މިނެޓްގައި ލ. އޭއީސީގެ ޖޯޒީ ނަމްބަރު 9 އަޙްމަދު ރިޔާނެވެ. ލ. އޭއީސީގެ ދެ ވަނަލަނޑު ޖަހައި ލީޑް ފުޅާކުރީ މުޙައްމަދު އިނާން އިބްރާޙިމެވެ. އެއީ މި މުބާރާތުގައި އޭނާ ޖެހި ފުރަތަމަ ލަނޑެވެ. އެ ސްކޫލްގެ ތިން ވަނަ ލަނޑުޖެހީ ފުރަތަމަ ހާފްގެ އިތުރު ވަގުތުގައި ލިބުނު ހިލޭ ޖެހުމަކުން ޖޯޒީ ނަމްބަރު 11 މުހައްމަދު ރާޔިޝް މުހުސިނެވެ.
ޙަމަދު ސްކޫލުން ޖެހި ހަމައެކަނި ލަނޑު ކާމިޔާބުކޮށް ދިނީ ފަހު ހާފުގައި، އެ ޓީމުގެ ޖޯޒީ ނަމްބަރު 17 މުހައްމަދު ރިފްދާނެވެ.
މުބާރާތުގެ ފެއަ ޕްލޭ ޓީމަކީ މާމެންދޫ ސްކޫލެވެ. އެންމެ މޮޅު ކުޅުންތެރިޔަކީ ލ. އޭއީސީގެ ޖޯޒީ ނަމްބަރު 10 އަޙްމަދު ސަޖުލް ޝުއައިބެވެ. އޭނާ ވަނީ މި މުބާރާތުގައި 7 ލަނޑު ޖަހައިގެން ރަންބޫޓް ވެސް ހޯދައިފަ އެވެ، ސަޖުލްގެ އިތުރުން 7 ލަނޑު ޖަހައިގެން އިތުރު ދެ ކުޅުންތެރިއަކަށް ވެސް ރަންބޫޓް ލިބުނެވެ. އެއީ ދަނބިދޫ ސްކޫލުގެ ޖޯޒީ ނަމްބަރު 7 އަޙްމަދު ރުއާއު އާއި ޙަމަދު ސްކޫލުގެ ޖޯޒީ ނަމްބަރު 17 މުޙައްމަދު ރިފްދާން އަލީ އެވެ.
މި މަހުގެ 14 ގައި ފެށި މުބާރާތް އިއްޔެ ނިންމައިލި އިރު، 9 ސްކޫލަކުން ވާދަކުރި އެވެ.