ނަފުސާނީ މައްސަލަތަކަށް ފަރުވާ ދޭން ހާއްސަ ސެންޓަރެއް ސެންޓަރެއް ވިލާ ކޮލެޖުގައި ހުޅުވައިފި އެވެ.
"ވީ ކެއާ ކައުންސެލިން އެންޑް ސައިކޮތެރަޕީ ސެންޓާ" ގެ ނަމުގައި ގާއިމުކުރި ސެންޓަރު އިއްޔެ ރަސްމީކޮށް ހުޅުއްވައި ދެއްވީ ވިލާ ކޮލެޖުގެ ރެކްޓަ ޑރ. އަހުމަދު އަންވަރެވ
އޭނަ ވިދާޅުވީ، ވިލާ ކޮލެޖުގައި މިފަދަ ސެންޓަރެއް ހުޅުވުމުގެ މައިގަނޑު މަގުސަދަކީ ވިލާ ކޮލެޖާއި ވިލާ އިންޓަނޭޝަނަލް ހައި ސްކޫލްގެ ދަރިވަރުންނާއި މުވައްޒަފުންނަށް ނަފުސާނީ ދުޅަހެޔޮ ވެއްޓެއް ގާއިމުކޮށް ދިނުމިގެ ގޮތުން ކަމަށެވެ. އަދި އެތަނުގެ ސަބަބުން ވިލާ ކޮލެޖުން ފޯރުކޮށްދޭ ތަޢުލީމުގެ ފެންވަރު ރަނގަޅުކުރުމަށާއި، ދަރިވަރުންނާއި މުވައްޒަފުންނަށް ދިމާވާ ގޮންޖެހުންތަކަށް ހައްލު ހޯދައި ދިނުމަށް ބާރަކަށް ވާނެ ކަމަށް ވިދާޅުވި އެވެ.
"ވީ ކެއާ ކައުންސެލިން އެންޑް ސައިކޮތެރަޕީ ސެންޓަރު" އން ސައިކޮސޯޝަލް ސަޕޯޓް، ކައުންސެލިން، ސައިކޮތެރަޕީ އަދި ސައިކޮލޮޖިކަލް އެސެސްމަންޓްގެ ޚިދުމަތް ލިބޭނެ އެވެ. އަދި ވިލާ ކޮލެޖުގައި ބެޗެލާސް އިން ސައިކޮލޮޖީ އާއި މާސްޓާސް އޮފް ސައިންސް ގެ ދާއިރާއިން މިހާރު ތައުލީމު ހާސިލު ކުރާ ދަރިވަރުންނަށް ސެންޓަރުގައި އެކަޑަމިކް އަދި ފަންނީ ތަޖުރިބާ ހޯދުމުގެ ގޮތުން އިންޓާންޝިޕް ފުރިހަމަ ކުރުމުގެ ފުރުސަތު ހަމަޖެހިފައި އޮންނާނެ އެވެ.
ސެންޓަރުގެ ޚިދުމަތް ލިބެން ހުންނާނީ ރަސްމީ ބަންދު ނޫން ކޮންމެ ދުވަހެއްގެ ހެނދުނު 9:00 އިން ރޭގަނޑު 9:00 އަށެވެ. ވިލާ ކޮލެޖުން ބުނީ އާންމުންނަށް ވެސް އެ ތަނުގެ ހިދުމަތްތައް ހުޅުވާލާފައިވާ ކަމަށެވެ. އެގޮތުން އެޕޮއިންޓްމަންޓް ހަދާނީ ސެންޓަރުގެ ވެބްސައިޓް vcare.villacollege.edu.mv މެދުވެރިކޮށެވެ.