ހިތަދު އާއި ހުޅުމީދޫ ކުނިކޮއްޓަށް ވަގުތީ ގޮތުން ކުނި ޖަމާކޮށް ދޭނެ ބަޔަކު ހޯދަން އައްޑޫ ސިޓީ ކައުންސިލުން އިއުލާންކޮށްފި އެވެ.
ކައުންސިލުން ވަގުތީ ގޮތުން އެ މަސައްކަތް ބަޔަކާ ހަވާލު ކުރަން ނިންމީ، ދެ ކުނިކޮށި މެނޭޖް ކުރުމުގެ މަސައްކަތް އަންނަ މަހުގެ 11 ވަނަ ދުވަހުން ފެށިގެން ކުރާނީ ކައުންސިލުން ކަމަށް އިއުލާން ކުރުމަށް ފަހު އެވެ.
ހިތަދޫ ކުނިކޮށި މިހާރު މެނޭޖް ކުރާ ސަދަން މޯލްޑިވްސް ކޮންޓްރެކްޓިން އެންޑް ޓްރޭޑިންގެ ކޮންޓްރެކްޓް އެޕްރީލް 10، 2015 ގައި ހަމަވާނެ އެވެ.
އެހެންވެ މަސައްކަތް ގާބިލް ބަޔަކާ ހަވާލު ކުރެވެންދެން ވަގުގީ ގޮތުން އަވަށްތަކުގެ ގޭބިސީތަކުންނާއި އެހެނިހެން ތަންތަނުން ފީއެއް ނަގައިގެން ކުނި ނެގުމުގެ މަސައްކަތް ކުރާނީ ކައުންސިލުން ކަމަށް ބުނެފައިވެ އެވެ. އަދި އެކަމަށް އެދޭ ފޯމް މިހާރު އަވަށު އޮފީސްތަކުން ލިބޭނެ ކަމަށް ކައުންސިލުން ބުންޏެވެ.
ކައުންސިލުން ވަގުތީ ގޮތުން ކުނި ނަގަން ބަޔަކާ ހަވާލު ކުރަން ނިންމުމާ ގުޅިގެން، މިކަން ކުރަން ޝައުގުވެރިވާ ފަރާތްތަކަށް ކުރިމަތިލުމުގެ ފުރުސަތު މިހާރު ވަނީ މި މަހުގެ 31 ވަނަ ދުވަހާ ހަމައަށް ހުޅުވާލައިފަ އެވެ.
މިކަމ ބެހޭ ގޮތުން މައުލޫމާތު ދިނުން މި މަހުގެ 25 ވަނަ ދުވަހު ކައުންސިލް އިދާރާގައި އޮންނާނެ އެވެ. ގަޑިއަކީ މެންދުރު ފަހު 2:00 ގަ އެވެ.