އައްޑޫސިޓީ ހިތަދޫއިން ފެށިގެން މަރަދޫއަށް ހަންކެޑެ ވަށައިގެން ހަދަމުންދާ ބްރިޖުގެ މަސައްކަތް އަންނަ އަހަރު މެއި މަހަށް ނިންމުމަށް މަސައްކަތް ކުރަމުންދާ ކަމަށް އިންފްރާސްޓްރަކްޗަރ މިނިސްޓްރީން ވިދާޅުވެއްޖެއެވެ.
މި ބްރިޖުގެ މަސައްކަތް މިއަންނަ އަހަރު ޖެނުއަރީއަށް ނިންމާލެވޭނެ ކަމަށް ނިމިދިޔަ ސަރުކާރުން އޯގަސްޓު މަހު އޭރު ވަނީ ބުނެފައެވެ. ނަމަވެސް މިހާތަނަށް މަސައްކަތް ކޮށްފައިވާ މިންވަރަށް ބަލާއިރު މަސައްކަތް އެތާރީހަށް ނުނިންމޭނެއެވެ.
މިކަމާއި ގުޅޭގޮތުން "އައްޑޫލައިވް" އާއި ވާހަކަ ދައްކަވަމުން އިންފްރާސްޓްރަކްޗަރ މިނިސްޓަރ ޑރ. އަބްދުﷲ މުއްތަލިބް ވިދާޅުވީ، އޭރު ސަރުކާރުން ދީފައިވާ މުއްދަތައް އެ މަސައްކަތް ނުނިންމޭނެ ކަމަށެވެ. ނަމަވެސް މިހާރުގެ ސަރުކާރުން އެ މަސައްކަތް ވީހާވެސް އަވަހަކަށް ނިންމައި ބްރިޖް ބޭނުން ކުރެވޭ ގޮތް ހެދުމަށް މަސައްކަތް ކުރަމުންދާ ކަމަށް ވިދާޅުވިއެވެ. އެގޮތުން މިހާރު މި ބްރިޖް ނިމޭނެ ކަމަށް ލާފާ ކުރެވެނީ މިއަންނަ އަހަރުގެ މޭއި މަހަށް ކަމަށް މިނިސްޓަރ ވިދާޅުވިއެވެ.
މިމަސައްކަތް ވަރަށް ބޮޑަށް ވެސް ލަސްވެގެން ގޮސްފައިވާއިރު، މިނިސްޓަރ މުއްތަލިބު ވިދާޅުވީ، ބްރިޖް މަސައްކަތަކީ މިއަހަރު މޭއި މަހުގެ މެދަށް ނިންމަން ކޮންޓްރެކް ކުރެވުނު މަސައްކަތެއް ކަމަށެވެ. ނަމަވެސް އޭގެ ފަހުން ގިނަ މައްސަލަތައް ކުރިމަތިވެ މަސައްކަތް ވަނީ ލަސްވެގެން ގޮސްފައި ކަމަށް ވިދާޅުވިއެވެ.
މަސައްކަތް ލަސްވި ބައެއް ސަބަބު:
- ބްރިޖުގެ މެދުން ހަދަން އޮތް ސޭންޑް އެމްބާކްމެންޓު ނުވަތަ ވެލި އަޅައިގެން ހަދާ ސަރަހައްދު ނުހިއްކި ދިއުން. އެގޮތަށް ދިމާވީ އައްޑޫ ބިން ހިއްކުމުގެ މަޝްރޫޢު ސޮއި ކުރުމަށް ލަސްވުމުން
- ބްރިޖް ދެކޮޅުން އަރާ ސަރަހައްދުންގެ އެބަޓްމެންޓް މަސައްކަތް ލަސްވުން
- ބްރިޖް ކޮލިޓީގެ މައްސަލަ – ކޮލިޓީއާއި ގުޅިގެން ހުރި ކަންބޮޑުވުންތައް ހައްލު ކުރުމަށް ވަގުތު ނަގާފައިވޭ
ހަންކެޑެ ބްރިޖުގެ މަސައްކަތް ހިތަދޫ ކޮޅުން ގައުކެނޑި ބްރިޖް އާއި ހަމައަށް ލިންކް ރޯޑުގެ އެއްބައި މިދިޔަ ހަފްތާގައި ވަނީ ބަންދުކޮށްފައެވެ. މިއީ ލިންކްރޯޑުން އައު ބްރިޖަށް އަރާ މަގު ހަދައި ލިންކްރޯޑާއި ގުޅުވާލުމަށް ކުރެވޭ މަސައްކަތެކެވެ. މިހާރު ޑީޓުއާ ލޭން ހަދާފައި އޮތީ، އެ ސަރަހައްދުން ހިއްކާފައި ދިމާލުން މަގެއް ހަދައި ގައުކެނޑި ބްރިޖާއި ހަމައަށް ދެވޭ ގޮތަށެވެ.
ހަންކެޑް ބްރިޖްގެ މަސައްކަތް ކުރަނީ އިންޑިއާގެ އެފްކޮންސް އިންފްރާންސްޓްރަކްޗާއިންނެވެ. އެ މަސައްކަތް އެ ކުންފުނިން ފެށީ 2021 ގެ އޮކްޓޯބަރު މަހުގެ ތެރޭގަ އެވެ. މިއީ 1.4 ކިލޯމީޓަރުގެ 4 ލޭން އެކުލެވޭ ބްރިޖެކެވެ. ހަންކެޑެ ވަށައިގެން ބްރިޖެއް ހެދުމުގެ ބޭނުމަކީ ހަންކެޑެ ފަތުރުވެރިކަމަށް ތަރައްޤީ ކުރުމަށް ބޭނުންވާ ޕްރޮޖެކްޓަށް ހަންކެޑެ ވަކި ކުރުމެވެ. މިހާރު އައްޑޫސިޓީ ލިންކް ރޯޑު އޮންނަނީ ހަންކެޑެ ހިތަދޫއިން މަރަދޫއަށް ދާއިރު ވަކިން އޮންނަ ހަންކެޑެ އެތެރެއިންނެވެ.