ދާދި ފަހުން ޑިޕްރެޝަންގެ މައްސަލަތަކެއް ވެސް ކުރިމަތިވި ކަމަށް ބުނާ ބޮލީވުޑްގެ މަޝްހޫރު ބަތަލާ ދީޕިކާ ޕަދްކޯން އޭނާގެ އަމިއްލަ މެންޓަލް ހެލްތު ކެއާ ފައުންޑޭޝަނެއް ލޯންޗް ކުރަން ނިންމައިފި އެވެ.
މި މަހުގެ 21 ވަނަ ދުވަހު ލޯންޗް ކުރާ މި ފައުންޑޭޝަނަށް ދީފައިވާ ނަމަކީ "ލިވް ލާފް ލަވް" އެވެ.
މުމްބާއީ މިރާ އިން ރިޕޯޓްކޮށްފަައިވާ ގޮތުގައި ދެ ފިލްމެއްގެ މަސައްކަތުގައި ވެސް މި ވަގުތު ވަރަށް ބިޒީކޮށް އުޅެމުން އަންނަ ބަތަލާ އަންނަނީ އޭނާގެ ފުރަތަމަ ފައުންޑޭޝަން ލޯންޗް ކުރަން ވާން ޖެހޭ އެންމެ ފަހުގެ ތައްޔާރީތައް ވަމުންނެވެ.
އެގޮތުން މި ފައުންޑޭޝަނާ މެންޓަލް ހެލްތު ކެއާ ދާއިރާގެ ތަޖުރިބާކާރުންތަކެއް މަސައްކަތް ކުރާ ގޮތަށް ވެސް ހަމަޖެހިފައިވެ އެވެ.
އެހެން ނަމަވެސް ފައުންޑޭޝަން ލޯންޗް ކުރުމުގެ ކުރިން އެކަމާ ބެހޭ މާ ބޮޑު ތަފުސީލެއް ހާމަ ކުރަން ދީޕިކާ އާއި އޭނާގެ ޓީމުން ބޭނުމެއް ނުވެ އެވެ.
މީޑިއާތައް ބުނާ ގޮތުން "ލިވް ލާފް ލަވް" ވެގެން ދާނީ ޑިޕްރެޝަނާއި އެ ނޫން ވެސް ނަފުސާނީ މައްސަލަތަކާ ކުރިމަތިލާން ޖެހިފައިވާ ފަރާތްތަކަށް ވަރަށް ފުޅާ ދާއިރާއެއްގައި އެހީތެރިކަން ފޯރުކޮށް ދޭނެ ފައުންޑޭޝަނަކަށެވެ.
ޝާހްރުކް ހާނާ އެކު 2007 ވަނަ އަހަރު "އޯމް ޝާންތީ އޯމް" އިން ބޮލީވުޑަށް ނިކުތް ދީޕިކާއަކީ، ކާމިޔާބު އެތައް ފިލްމެއް ކުޅެފައިވާ އެންމެ ޑިމާންޑް ބޮޑު އެއް ބަތަލާ އެވެ.
އެގޮތުން 2013 ވަނަ އަހަރަކީ އޭނާގެ ކެރިއަރުގެ އެންމެ ކާމިޔާބު އަހަރެވެ. އެ އަހަރު ބޮޑު ހަތަރު ފިލްމެއް ރިލީޒްވެ އެއިން ކޮންމެ ފިލްމެއް ވަނީ "100 ކްރޯޑް ކުލަބް" އެންމެ ކުރިން ވެސް ޖާގަ ހޯދައިފަ އެވެ.
އެ ހަތަރު ފިލްމަކީ ސައިފް އަލީ ހާނާ އެކު ކުޅުނު "ރޭސް 2" އާއި ކުރީގެ ލޯބިވެރިޔާ ރަންބީރް ކަޕޫރާ އެކު ކުޅުނު "ޔެ ޖަވާނީ ހޭ ދީވާނީ" ގެ އިތުރުން ޝާހްރުކް ހާނާ އެކު ކުޅުނު "ޗެންނައި އެކްސްޕްރެސް" އާއި މިހާރުގެ ލޯބިވެރިޔާ ރަންވީރު ސިންގާ އެކު ކުޅުނު "ގޮލިޔޯންކީ ރާސް ލީލާ: ރާމް-ލީލާ" އެވެ.
އެ ހަތަރު ފިލްމުގެ ބޮޑު ކާމިޔާބީ އާ އެކު މިދިޔަ އަހަރު ރިލީޒްވީ ދީޕިކާގެ އެންމެ ތިން ފިލްމެވެ.
އެއީ ރަޖްނީ ކާންތާ އެކު ކުޅުނު އެނިމޭޓެޑް ފިލްމް "ކޮޗަދައްޔާން" އާއި އަރުޖުން ކަޕޫރާ އެކު ކުޅުނު "ފައިންޑިން ފެނީ" އާއި ޝާހްރުކް ހާނާ އެކު ކުޅުނު "ހެޕީ ނިއު އިޔާ" އެވެ. މި ތިން ފިލްމުގެ ތެރެއިން "ހެޕީ ނިއު އިޔާ" އަކީ އަހަރުގެ އެންމެ ބޮޑު އެއް ބްލޮކްބަސްޓާ އެވެ. އަނެއް ދެ ފިލްމަށް މާ ބޮޑު ކާމިޔާބީއެއް ނުލިބެ އެވެ.
އެކަމަކު "ފައިންޑިން ފެނީ" އަކީ އާންމުކޮށް ބޮލީވުޑުން ނުފެންނަ ޒާތުގެ ތަފާތު ފިލްމެއްކަން ކްރިޓިކުން ވަރަށް ބޮޑަށް ފާހަގަ ކުރި އެވެ.
ކެރިއަރުގެ ވަރަށް އުހުގައި އުޅެމުން ދީޕިކާ ވަނީ އޭނާގެ ކާމިޔާބީ ކުރިއަށް އޮތް ތަނުގައި ވެސް ދެމެހެއްޓިދާނެކަމާ ދޭތެރޭ ފިކުރު ބޮޑުވެ، ޑިޕްރަޝަނާ ކުރިމަތިލާން ޖެހިފައިވާ ކަމަށް ބުނެފަ އެވެ.
އަދި އެ ވާހަކަަތައް އޭނާ ވަނީ އެއްވެސް ފަސްޖެހުމެއް ނެތި މީޑިއާތަކާ ވެސް ހިއްސާކޮށްފަ އެވެ.
އޭނާގެ އެ ވާހަކަތައް ވަރަށް އަވަހަށް އެންޑީޓީވީން ގެނެސްދޭ ޕްރޮގްރާމަކުން ފެނިގެން ދާނެ އެވެ.
ދީޕިކާގެ ވަރަށް ފާހަގަކޮށްލެވޭ ދެ ފިލްމެއް އަނެއްކާ ވެސް މި އަހަރު ސިނަމާތަކަށް އަންނާނެ އެވެ.
އޭގެ ތެރެއިން ފުރަތަމަ ފިލްމަކީ އަމީތާބް ބައްޗަން އޭނާގެ ބައްޕަ ރޯލުން ފެންނަ "ޕީކޫ" އާއި ސަންޖޭ ލީލާ ބަންސާލީ ޑައިރެކްޓްކޮށް ރަންވީރާ އެކު ކުޅޭ "ބަޖިރާއޯ މަސްތާނީ" އެވެ.