އިހި ނަގަން އައްޑޫސިޓީ ގަމުގެ ފުއްޓަރަށް ފައިބައިގެން އުޅެނިކޮށް ގެއްލުނު މަރަދޫއަށް ނިސްބަތްވާ ނައީޝް ހޯދުމުގެ މަސައްކަތް ހުއްޓާނުލާ މިއަދުވެސް ކުރިއަށް ގެންގޮސްފައިވާ ކަމަށް އެމްއެންޑީއެފްއިން ހާމަކޮށްފިއެވެ.
އެމްއެންޑީއެފް މީޑީއާ އޮފިޝަލް ވިދާޅުވީ ނައީޝް ހޯދުމުގެ މަސައްކަތް އަދިވެސް ބާރަށް ކުރިއަށްދާ ކަމަށެވެ. އެގޮތުން މިއަދުވެސް 4743 އަކަ ނޯޓިކަލް މޭލުގެ ސަރަހައްދެއް ބަލާފައިވާ ކަމަށް ވިދާޅުވިއެވެ. އެއީ ވައިގެ މަގުން 3602 އަކަ ނޯޓިކަލް މޭލުގެ ސަރަހައްދަކާއި، ކަނޑުމަގުން 1140 އަކަ ނޯޓިކަލް މޭލުގެ ސަރަހައްދެކެވެ. އަދި ފީނައިގެން 1.026 ނޯޓިކަލް މޭލުގެ ސަރަަހައްދެއް ބަލާފައިވާ ކަަމަށް އެމްއެންޑީއެފްއިން ބުނެއެވެ.
މިދިޔަ ބުރާސްފަތި ދުވަހުގެ ރޭގަނޑު 10:00 ޖަހައި އެހައިކަށްހާއިރު ގެއްލުނު އުމުރުން 18 އަހަރުގެ މުހައްމަދު ނައީޝް ހޯދުމުގެ މަސައްކަތް މެދު ކެނޑުމެއް ނެތި ދަނީ ކުރަމުންނެވެ. އައްޑޫ ހައި ސްކޫލުގެ ގްރޭޑް 12 ކިޔަވަމުން ދިޔަ ނައީޝް އިހި ނަގަން އެ ސަރަހައްދަށް ދިޔައީ އިތުރު ދެ މީހަކާއި އެކުގައެވެ.
އޭނާ ހޯދުމުގެ މަސައްކަތް އައްޑޫ ރައްޔިތުންގެ އިތުރުން، އެމްއެންޑީއެފްއިން ދަނީ ކުރަމުންނެވެ. އަދި މޯލްޑިވިއަން އޭވިއޭޝަން އެކަޑަމީއާއި ގުޅިގެން ތަމްރީނުތަކުގައި ބޭނުން ކުރާ ޓެކްނަމް ބޯޓުން ބޮޑު ސަރަހައްދެއް ދަނީ ބަލަމުންނެވެ. މިމަސައްކަތް ކުރަނީ އެމްއެންޑީއެފްގެ އެފަދަ އޮޕަރޭޝަންތަކުގެ ތަޖްރިބާ ލިބިފައިވާ ފަރާތްތަކާއި ގުޅިގެންނެވެ.