މޯލްޑިވްސް ރިޓަޔާމަންޓް ޕެންޝަން ސްކީމް (އެމްއާރްޕީއެސް) ހިންގުމަށް ނަގާ އަންނަ އިދާރީ ފީ އަހަރުތަކެއް ފަހުން އަނެއްކާ ކުޑަކުރަން ނިންމައިފި އެވެ.
ޕެންޝަން އޮފީހުގެ ބޯޑުން އެގޮތަށް ނިންމައި އިއްޔެ ވަނީ އެކަން ގެޒެޓް ވެސް ކޮށްފަ އެވެ.
މި ބަދަލާ އެކީ އަންނަ މަހުގެ 1 އިން ފެށިގެން ޕްރީ ރިޓަޔާމަންޓް ފަންޑުތަކުން ނަގާނީ އަހަރަކު 0.5 ޕަސެންޓެވެ. އަދި ޕޯސްޓް ރިޓަޔާމަންޓް ފަންޑުތަކުން ނަގާނީ 0.3 ޕަސެންޓެވެ. މިހާތަނަށް ޕްރީ ރިޓަޔާމަންޓް ފަންޑުންނާއި ޕޯސްޓް ރިޓަޔާމަންޓް ފަންޑުން, އިދާރީ ފީ ގޮތުގައި ނަގަނީ 0.6 ޕަސެންޓާ ދެމެދުގެ އަދަދެކެވެ. އަލަށް ގެނައި ބަދަލާއެކު,
ޕްރީ ރިޓަޔާމަންޓް ފަންޑުތަކަކީ ޕެންޝަން ލިބޭ އުމުރު ހަމަނުވާ މެމްބަރުންގެ ފައިސާ އިންވެސްޓްކުރެވޭ ފަންޑުތަކެކެވެ. މި ފަންޑުތަކުގައި އިސްކަން ދެނީ އިންވެސްޓްމަންޓްތަކުން ނެރެވޭ ނަފާ އިތުރުކޮށް ފައިސާގެ އަގު ހިފެހެއްޓުމަށެވެ. ޕޯސްޓް ރިޓަޔާމަންޓް ފަންޑުތަކަކީ ޕެންޝަން ލިބޭ އުމުރު ހަމަވެފައިވާ މެމްބަރުންގެ ފައިސާ އިންވެސްޓްކުރެވޭ ފަންޑުތަކެކެވެ. މި ފަންޑުތަކުގައި އިސްކަންދެނީ ކޮންޒަވެޓިވްކޮށް އިންވެސްޓްކޮށްގެން ފައިސާގެ އަގު ހިފެހެއްޓުމަށެވެ.
ޕެންޝަން އޮފީހުން ބުނީ ގޮތުގައި އިދާރީ ފީގެ މަގުސަދަކީ އެމްއާރްޕީއެސް ހިންގުމުގެ ހަރަދުތައް ހަމަޖެއްސުން ކަމަށެވެ. އެ ހަރަދުތަކުގެ ތެރޭގައި ހިސާބުތައް ބެލެހެއްޓުމާއި އިންވެސްޓްކުރުމުގެ ކަންކަމަށްދާ ހަރަދާއި، މާލީ ގޮތުން ކުރެވޭ މުއާމަލާތްތަކާ ގުޅިގެން ހިނގާ ހަރަދާއި، ކަސްޓޯޑިއަންގެ ހަރަދު އަދި އޮޑިޓްކުރުމަށް ހިނގާ ހަރަދުތައް ހިމެނެ އެވެ.
މިއީ ޕެންޝަން ގާނޫނު ވުޖޫދުވި ފަހުން އިދާރީ ފީ ކުޑަކުރަން ނިންމި ހަތަރު ވަނަ ފަހަރެވެ. ކުރިން އެ އަދަދު ކުޑަކުރީ 2015، 2017 އަދި 2018 ގަ އެވެ.
އެމްއާރްޕީއެސްގައި ބައިވެރިވުމަކީ، ރާއްޖޭގައި ވަޒީފާއަދާކުރާ އުމުރުން 16-65 އަހަރާ ދެމެދުގެ ދިވެހިން ގާނޫނުން ލާޒިމުކަމެކެވެ. އެމްއާރްޕީއެސް އަށް ޖަމާވާނީ އެ މުވައްޒަފެއްގެ ޕެންޝަނަށް ބަލާ މުސާރަ ކަމަށްވާ އަސާސީ މުސާރައިގެ 7 ޕަސެންޓެވެ. އެ އަދަދު ވަޒީފާދޭ ފަރާތުން ވެސް ޖަމާކުރަން ޖެހޭނެ އެވެ.
މިގޮތުން ޖަމާކުރާ ފައިސާ, ޕެންޝަން ގާނޫނުގައިވާ ގޮތުގެ މަތިން ޕެންޝަން އޮފީހުން އިންވެސްޓްކުރެ އެވެ.
ޕެންޝަން ފައިސާ ލިބޭނީ އުމުރުން 65 އަހަރުވެ ރިޓަޔާވުމުންނެވެ. ނަމަވެސް ވަކި ޝަރުތުތަކެއް ހަމަވާ ނަމަ 55 އަހަރުގައި އާލީ ރިޓަޔަމަންޓް ނެގިދާނެ އެވެ. އެގޮތުން ރިޓަޔާކުރުމުގެ ކުރިން އެ ފައިސާ ބޭނުންކުރެވޭނީ ދެ ހާލަތެއްގަ އެވެ. އެއީ ހައުސިން ޑައުންޕޭމަންޓް ދެއްކުމަށާއި ހައްޖު އަދާ ކުރުމަށަށެވެ.