ރާއްޖޭގައި ސިޔާސީ މައިދާނުން ފެނިފައިވާ އެންމެ އާދަޔާހިލާފު މިސްމީހުންގެ ތެރޭގައި ކުރީގެ ޔޫތު މިނިސްޓަރު އަހުމަދު މަހުލޫފާއި ކުރީގެ ޓޫރިޒަމް މިނިސްޓަރު އަލީ ވަހީދުގެ އިތުރުން ކުރީގެ މަޖިލިސް މެންބަރު އަލްހާން ފަހުމީ ފާހަގަކޮށްލެވެ އެވެ.
ބަޔަކު ކޮންމެ އެއްޗެއް ކިޔަސް މި ބޭފުޅުން އުޅުއްވާނީ އެ ބޭފުޅުން އުޅުއްވާނެ ގޮތަކަށެވެ.
އަންނަ އަހަރު ބާއްވާ ރައްޔިތުންގެ މަޖިލިސް އިންތިހާބުގައި ކާށިދޫ ދާއިރާ އަށް އަލްހާން އޮތީ ވާދަކުރައްވަން ނިންމަވައިފަ އެވެ. އެމްޑީޕީ މެންބަރެއްގެ ގޮތުގައި މިހާރު ހުންނެވިޔަސް އޭނަ ވާދަކުރައްވަނީ އަމިއްލަ ގޮތުންނެވެ. މި އިންތިހާބަށް އަލްހާން ވާދަކުރައްވަން ނިންމެވީ އޭނަގެ މައްޗަށް ތުހުމަތުކުރެވޭ ޕޮންޒީ ސްކީމްގެ މަކަރާއި ހީލަތުގެ މައްސަލަގަނޑާ އެކީ އެތައް ބައެއްގެ ފާޑުކިޔުންތަކާއި މަލާމާތް ވެސް އަމާޒުވެފައި ވަނިކޮށެވެ.
އެކަމަކު ވެސް ވަރިހަމަ އެވެ. އަލްހާން މި ފަހަރު މި އިއްވާލީ އޭނަގެ އަޑުން ލަވައެކެވެ. އަމިއްލަ އަށް ގިޓާ ކުޅުއްވަމުން އިހުގެ ހިންދީ ލަވައެއް އަލްހާން ކިޔުއްވާފައި މި އޮތީ ސޯޝަލް މީޑިއާ އަށް ދޫކޮށްލައްވައިފަ އެވެ. މިއާ އެކީ އެތައް ބައެއްގެ މަލާތެވެ. އެތައްގެ ނުރުހުމުގެ ބަސްތަކެވެ.
ކާށިދޫ ދާއިރާ އަށް އަލްހާން ވާދަކުރައްވާ އިރު، ލަވައެއް ކިޔުއްވުމަކީ ކޮންމެހެން މާ ބޮޑު މައްސަލައެއް ނޫނެވެ. އެ ދާއިރާގެ މެންބަރެއްގެ ގޮތުގައި މިހާރު ވެސް ހުންނެވީ ހަމަ ވަރަށް އާދަޔާހިލާފު ބޭފުޅެކެވެ. އެއީ އަބްދުﷲ ޖާބިރެވެ. އެކަމަކު އޭނަގެ ވާހަކަ މި ވަގުތަށް އެހާ މުނާސަބެއް ނޫނެވެ.
އަލްހާނަކީ ކުރިން ފޭދޫ ދާއިރާގެ މެންބަރުކަން ކުރެއްވި ބޭފުޅެކެވެ. މި އަހަރުގެ ރިޔާސީ އިންތިހާބު ބޯތިވަމުން އައި ދުވަސްވަރު ރައީސްކަން ކުރެއްވުމުގެ ޝައުގުވެރިކަން ވެސް އޭނަ ފާޅުކުރެއްވި އެވެ. މާޒީ އަށް ބަލާ އިރު، އަލްހާން ފަދަ އާދާހިލާފު ބޭފުޅުން ރައްޔިތުން ބަލައިގަންނަކަމީ ފެންނަން އޮތް ހަގީގަތެކެވެ.