މަދިރި މަދުކުރަން މުޅި ރާއްޖޭގައި ކެމްޕޭނެއް ހިންގަން ނިންމައިފި އެވެ.
މިފަދަ ކެމްޕޭނެއް ހިންގަން ނިންމީ މަދީރީގެ ޒަރީރާ އިން ޖެހޭ ފައިލޭރިއާ ޖެހިފައިވާ ބަޔަކު ރާއްޖެ އިން ފެނިފައިވާތީ އެކަމާ ވެސް ގުޅިގެން އަޅާ ފިޔަވަޅެއްގެ ގޮތުގަ އެވެ. ރާއްޖެ އިން ނައްތާލާފައިވާ ބައްޔެއް ކަމަށްވާ ފައިލޭރިއާގެ ކޭސްތަކެއް ފެނުނު އިރު، އެއީ މުޅިން ވެސް ބިދޭސީންނެވެ. އަދި ކޭސްތަކުގެ އަދަދު މިހާރު 32 އަށް އަރަ އެވެ. ބަލި ފެނިފައި ވަނީ ކުޅުދުއްފުއްޓާއި މާލެ އާއި ހުޅުމާލެއިންނެވެ.
އިއްޔެ ނޫސްވެރިންގެ ލޯކަލް ގަވަމެންޓް އެންޑް ޕަބްލިކް ވޯކްސް މިނިސްޓަރު އާދަމް ޝަރީފް އުމަރު ވިދާޅުވީ ރާއްޖޭގައި ފައިލޭރިއާއިން ރައްކާތެރިވުމަށް ހާއްސަ ފިޔަވަޅުތަކެއް އަޅަން ސަރުކާރުން ނިންމާފައިވާ ކަމަށެވެ. އެގޮތުން މަދިރި އުފެދޭ ތަންތަން ހޯދައި އެ ތަންތަން ނައްތާލަން ކުރިއަށް ގެންދާ ކެމްޕޭން ފަށާނީ އަންނަ ހަފުތާގައި ކަމަށް ވިދާޅުވި އެވެ. މިނިސްޓަރު މުޅި ރާއްޖޭގައި ކުރިއަށް ގެންދަން ނިންމާފައިވާ އެ ކެމްޕޭނު ކުރިއަށް ގެންދާނޫ ސަރުކާރުގެ ކަމާ ގުޅުންހުރި އިދާރާތަކާއި ރަށްރަށުގެ ކައުންސިލްތަކާ ގުޅިގެންނެވެ.
ކެމްޕޭނުގައި ހެލްތު މިނިސްޓްރީ އާއި ހޯމް މިނިސްޓްރީގެ އިތުރުން ޑިފެންސް މިނިސްޓްރީ ވެސް ބައިވެރިވާނެ އެވެ.
ނަޖިސް ފެނުގައި އުފެދޭ ކިއުލެކްސް މަދިރީގެ ޒަރީއާއިން ޖެހޭ ބައްޔެކެވެ. އެ ބަލި ޖެހިފައިވާ މީހެއްގެ ގައިން ކިއުލެކްސް މަދިރި ލޭ ބުއިމަށް ފަހު، އެހެން މީހެއްގެ ގައިގައި މަދިރި ހަފައިފި ނަމަ ފައިލޭރިއާ ޖެހުމުގެ ފުރުސަތު ބޮޑެވެ.
ފައިލޭރިއާ އަކީ އަކީ ރާއްޖެ އިން ނައްތާލާފައިވާ ބައްޔެއްކަން ކަނޑައެޅީ 2016 ގަ އެވެ. ރާއްޖެ އިން އެންމެ ފަހުން އެ ބަލީގެ ދިވެއްސަކު ފެނުނީ 2004 ގައި ލ. ފޮނަދޫންނެވެ.