ނިމިދިޔަ ސަރުކާރުން އައްޑޫގައި ތަރައްޤީކޮށްފައިވާ ޓުއަރިޒަމް ޒޯންތަކުގެ ބިން ލިބުނު ފަރާތްތަކުގެ ތެރެއިން އެއްބަސްވުމާއި އެއްގޮތަށް މަސައްކަތް ނުކުރާ ފަރާތްތަކަށް ލިޔެކިއުންތައް ހުށަހަޅަން 30 ދުވަސް ދޭން ނިންމައި އެކަން ބިންތަކުގެ ވެރިފަރާތައް އަންގަން ފަށައިފިއެވެ.
މިދިޔަ ހަފްތާގައި ބޭއްވި ކައުންސިލުގެ ޖަލްސާގައި މިގޮތަށް ނިންމާފައިވަނީ، ބިންތައް ލިބުނުގެ ފަރާތްތަކުގެ ތެރެއިން ބައެއް ފަރާތްތަކުން ގެސްޓް ހައުސް އެޅުމަށް މަސައްކަތް ފަށާފައިވާއިރު، ގިނަ ބިންތަކުގެ މިހާތަނަށް އެއްވެސް މަސައްކަތެއް ނުފެށިވާ ދަނޑިވަޅެއްގައެވެ. ކައުންސިލް ޖަލްސާގައި ނިންމާފައިވާ ގޮތުން އެއްބަސްވުމާއި އެއްގޮތަށް ވޯކް ޕްލޭން އަދި ޑީޓެއިލް ޑްރޯވިން އެޕްރޫވް ކުރުމަށް މިހާތަނަށް ހުށަނާޅާ ފަރާތްތަކުން 30 ދުވަހުގެ ތެރޭގައި އެ ލިއެކިއުންތައް ހުށަހެޅުމަށާއި، އަދި އެ މުއްދަތުގެ ތެރޭގައި ހުށަނާޅާ ފަރާތްތައް 25،000 ޑޮލަރުން ޖޫރިމަނާ ކުރުމަށް ވަނީ ނިންމާފައެވެ.
ޓުއަރިޒަމް ޒޯންތަކުގެ މަސައްކަތް ކުރިއަށް ނުދިއުމާއި ގުޅިގެން މީގެ ކުރިން އައްޑޫލައިވް އާއި ވާހަކަ ދައްކަވަމުން މޭޔަރ އަލީ ނިޒާރު ވިދާޅުވެފައިވަނީ އަސްލު އެއްބަސްވުމުގައި ވާ ގޮތުން 90 ދުވަހުގެ ތެރޭގައި ކުރެހުންތައް ހުށަހަޅަން ޖެހޭ ކަމުގައެވެ. ނަމަވެސް އެ މުއްދަތުގައި ހުށަހެޅީ މަދު ބައެއް ކަމަށް އޭނާ ވިދާޅުވިއެވެ.
"އަޅުގަނޑުމެންވެސް އެއްބަސްވުމަށް ޢަމަލު ކުރަން ޖެހޭ. އެހެންވެ ސިޓީތައް މި ފޮނުވަނީ. މަޤްޞަދަކީ ބިންތައް ނެގުމެއް ނޫން. އެއްބަސްވުމުގައި ހުރި ހުރިހާ ޕޮއިންޓްތައް މި ޕްލޮޓް ދީފައިވާ ހުރިހާ ފަރާތްތަކަށް ހަނދާން ކޮށް ދިނުމަށް ބޭނުމަކީ. " މޭޔަރ ވިދާޅުވިއެވެ.
މޭޔަރ ވިދާޅުވީ ހިތަދޫ ޒޯނާއި މަރަދޫ އަދި ފޭދޫގައިވެސް ބައެއް ޕްލޮޓުތަކުގައި މަސައްކަތް ކުރެވެމުންދާ ކަމަށާއި، މިހާރުވެސް ހުރިހާ ޒޯންތަކަށް ކަރަންޓު ލިބޭނެ ކަމަށެވެ. މިވަގުތު ފެނާއި ނަރުދަނާ އެ ޒޯންތަކުގައި ނެތް ނަމަވެސް، ނިޒާރު ވިދާޅުވީ އެއީ މަސައްކަތް ނުފެށެންވީ ސަބަބެއް ކަމަށް ޤަބޫލު ނުކުރައްވާ ކަމަށެވެ. އެގޮތުން ބައެއް ޒޯންތަކުގައި މިހާރުވެސް މަސައްކަތް ނިންމަން މަސައްކަތް ކުރާކަން ނިޒާރު ފާހަގަކުރެއްވިއެވެ.