ޓެރަރިޒަމްގެ ކުށް ސާބިތުވެ، 13 އަހަރުގެ ޖަލު ހުކުމެއް އިއްވާފައިވާ ކުރީގެ ރައީސް އަދި އެމްޑީޕީގެ ރައީސް މުހައްމަދު ނަޝީދު ދޫކޮށްލަން ގޮވާލާ އެއްވުމެއް ހުކުރު ދުވަހުގެ ރޭ އައްޑޫގައި ބާއްވަން ހަމަޖައްސައިފި އެވެ.
ނަޝީދަށް ހުކުމް ކުރިތާ ހަފުތާއެއްވާ ދުވަހާ ދިމާކޮށް މި އެއްވުން ބާއްވަނީ "އިންސާފުގެ މަގަށް ދިވެހިން" ގެ ނަމުގައި ފޭދޫ ބަނދަރު ސަރަހައްދުގަ އެވެ.
އެއްވުން ފަށަން ހަމަޖެހިފައި ވަނީ ހުކުރު ދުވަހުގެ ރޭ 9:00 ގަ އެވެ. އެހެންވެ މި އެއްވުމަށް އެމްޑީޕީގެ ވީހާ ވެސް ގިނަ ސަޕޯޓަރުންނާއި އިންސާފަށް ލޯބި ކުރާ ވީހާ ގިނަ ބަޔަކު ބައިވެރިވުމަށް އެމްޑީޕީ އައްޑޫ ދާއިރާ އިން އެދެ އެވެ.
އެއްވުމުގައި ބައިވެރިވާ މީހުން ކަޅު ކުލައިގެ ހެދުމުގައި ވެސް ދިއުމަށް އެ ޕާޓީން އެެދެ އެވެ.
އެމްޑީޕީން ބުނީ ފޭދޫ ބަނދަރު މަތީގައި އެއްވުން ބާއްވާ އިރު، އައްޑޫގެ އެހެން އަވަށްތަކުން އެއްވުމަށް އަންނަން ބޭނުންވާ ފަރާތްތަކަށް ބަސް ދަތުރު ހަމަޖައްސާނެ ކަމަށެވެ.
އެގޮތުން އަވަށްތަކުގެ ބަސް ސްޓޮޕްތަކުން 8:30 ގައި ބަސް ދަތުރުތައް ކުރިއަށް ދާނެ އެވެ.