ފިލްމީ ތަރި މުހައްމަދު ޔުނާން އަލުން ހައްޔަރު ކުރަން އެދިއްޖެ އެވެ.
ޕްރޮސިކިއުޓާ ޖެނަރަލް އޮފީހުގެ އޮފިޝަލަކު ވިދާޅުވީ ކުޑަކުއްޖަކަށް ޖިންސީ ގޯނާކުރުމުގެ ތުހުމަތުގައި ދައުލަތުން ދައުވާކޮށް، ޝަރީއަތް ނިމެންދެން ބަންދުކޮށްފައި ވަނިކޮށް ޝަރުތުތަކަކާ އެކީ އޭނަ ހުޅުމާލެ ކޯޓުން އޭނަ ދޫކުރީ މި މަހުގެ 14 ގަ އެވެ. ޔުނާނަށް ކުރި ޝަރުތަކުގެ ތެރޭގައި ޒަރޫރީ ކަމެއްގައި ނޫނީ ގެއިން ބޭރަށް ނުދިއުމާއި ކޯޓުގެ ހުއްދަ ނެތި އެއްވެސް ތާކަށް ފުރައިގެން ނުދިއުމާއި ދިރިއުޅޭ ތަން ކޯޓަށް އެންގުން ހިމެނެ އެވެ.
އޭނަ އަލުން ބަންދުކޮށް ދޭން އެދި ހުޅުމާލެ މެޖިސްޓްރޭޓް ކޯޓަށް ހުށަހެޅީ ކޯޓުން ކަނޑައެޅި ޝަރުތަކާ ހިލާފުވެފައިވާތީ ކަމަށެވެ. އެކަމަށް އެދުނު އިރު ޔުނާން ބަންދުން ދޫކުރި މައްސަލަ މިދިޔަ ހަފުތާގެ ހޯމަ ދުވަހު ޕީޖީ އޮފީހުން އޮތީ އިސްތިއުނާފު ކުރަން ވެސް ފޮނުވައިފަ އެވެ.
ފިލްމު "ބޮސް" އިން ފިލްމީ ދާއިރާ އަށް ތައާރަފުރި ޔުނާން އާއި އޭނާގެ އަންހެނުން، ފާތިމަތު ރިހުލާ 2020 ގެ އޮކްޓޯބަރު މަހުގެ ކުރީކޮޅު ކުޑަކުއްޖަކަށް ޖިންސީ ގޯނާކުރިކަމުގެ ތުހުމަތުގައި ހައްޔަރުކޮށް، ދައުވާކުރީ އެ އަހަރުގެ ޑިސެމްބަރު މަހުގެ ތެރޭގަ އެވެ.
އެ މައްސަލާގައި އެ ދެމަފިރިން ޝަރީއަތް ނިމެންދެން ބަންދު ކުރިތާ ދެ އަހަރު ފަހުން މި އަހަރުގެ މާޗް މަހު ރިހުލާ ވަނީ ގޭބަންދަށް ބަދަލުކޮށްފަ އެވެ.
ކުޑަކުއްޖަކާ ބެހުނު މައްސަލާގައި ޔުނާންގެ މައްޗަށް ނުވަ ދައުވާއެއް އުފުލާފައިވާ އިރު، ރިހުލާގެ މައްޗަށް ފަސް ދައުވާއެއް ކުރެ އެވެ.