އެންމެ ގިނަ ޓޫރިސްޓުން އަންނަ ގައުމަކަށް އިންޑިއާ

ރާއްޖެ އަށް މިހާރު އެންމެ ގިނަ ޓޫރިސްޓުން އަންނަ ގައުމަކަށް އަނެއްކާ ވެސް އިންޑިއާވެއްޖެ އެވެ.

މިއީ އެ ގައުމުން އެ މަގާމު މި އަހަރު އަތުލި ދެވަނަ ފަހަރެވެ. ނަމަވެސް އެއް ވަނަ މާކެޓަށް އޮކްޓޯބަރު މަހުގައި އެރިތާ މާ ގިނަ ދުވަހެއް ނުވެ އިންޑިއާ ދެވަނަ އަށް ސޮއްސައިލި އެވެ. ޓޫރިޒަމްގެ އެންމެ ފަހުގެ ހިސާބުތައް ދައްކާ ގޮތުން މި އަހަރުގެ މިހާތަނަށް އިންޑިއާ އިން ރާއްޖެ އައި ޓޫރިސްޓުންގެ އަދަދު ވަނީ 205،278 އަށް އަރައިފަ އެވެ.

އިންޑިއާ އަކީ މިދިޔަ އަހަރު ވެސް ރާއްޖެ އަށް އެންމެ ގިނަ ޓޫރިސްޓުން އައި ގައުމެވެ. ފާހަގަކޮށްލެވޭ ކަމަކީ އެ ގައުމުގެ ވަރަށް ގިނަ ފިލްމީ ތަރިން މިހާރު ވަރަށް ގިނައިން ރާއްޖެ އަންނަކަމެވެ. މީގެ ސަބަބުން ރާއްޖެ ވަރަށް ބޮޑަށް ޕްރޮމޯޓްވެ އެވެ. އަދި އާ އަހަރަށް މަރުހަބާ ކިޔަން ގާތްވަމުން އަންނަ އިރު، އިންޑިއާގެ ޓޫރިސްޓުން ވަރަށް ބޮޑަށް އިތުރުވާނެ އެވެ.

މި އަހަރު ރާއްޖެ އަށް އެންމެ ގިނަ ޓޫރިސްޓުން އައި ގައުމުގެ މަގާމުގައި ރަޝިއާ ގަދަކޮށް ހިފަހައްޓަމުން އައި ނަމަވެސް އެ ގައުމުން އައި ޓޫރިސްޓުންގެ ޖުމްލަ އަދަދަކީ މިހާރު 203،539 ޓޫރިސްޓުންނެވެ. ތިން ވަނަގައި އޮތީ މަޑުމަޑުން މައްޗަށް އަރަމުން އައި ޗައިނާ އެވެ.

ރާއްޖެ އަށް މި އަހަރުގެ މިހާތަނަށް ޖުމްލަ 1،834،759 ޓޫރިސްޓުން އައިސްފައިވެ އެވެ. މި އަހަރުގެ ޓާގެޓަކީ 1.8 މިލިއަނެވެ. އެ ޓާގެޓް ހާސިލުވީ މި މަހުގެ 20 ގަ އެވެ.