އަންނަ އަހަރުގެ މަޖިލިސް އިންތިހާބުގައި ޖުމްހޫރީ ޕާޓީ (ޖޭޕީ) ގެ ޓިކެޓްގައި ވާދަކުރަން ޝައުގުވެރިވާ މީހުންނަށް ކުރިމަރިލާން ދިން މުއްދަތު އިތުރުކޮށްފި އެވެ.
ކުރިން ދިން މުއްދަތު ހަމަވީ މި މަހުގެ 17 އަށެވެ. ނަމަވެސް މުއްދަތު އިތުރުކުރުމާ ގުޅިގެން މިހާރު ސުންގަޑި ހަމަވާނީ އަންނަ މަހުގެ 25 އަށެވެ.
މަޖިލީހުގެ މާމިގިލީ ދާއިރާގެ މެންބަރު ގާސިމް އިބްރާހީމްގެ ޖޭޕީން ބުނީ މުއްދަތު އިތުރުކުރީ މި ދުވަސްވަރަކީ ސްކޫލް ޗުއްޓީ ދުވަސްވަރަށްވާތީ ރާއްޖެ އާއި ރާއްޖެ އިން ބޭރަށް ގިނަބަޔަކު ދަތުރުކުރާ ދުވަސްވަރަކަށްވުމުން އިންތިހާބުގައި ވާދަކުރުމުގެ ފުރުސަތަށް އެދި ހުށައަޅަން ލިބުނު މުއްދަތުގައި ފޯމް ހުށައެޅުމަށް ގިނަ މީހުންނަށް ދަތިވާތީ ކަމަށެވެ.
އެ ޕާޓީން ބުނީ ކެންޑިޑެންސީ ކަށަވަރު ވާނީ އިންތިހާބުގައި ވާދަ ކުރުމަށް އެދި ހުށަހަޅާ މީހުންގެ މައުލޫމާތުގެ ސައްހަކަމާއި ގާބިލުކަން ބެލުމަށް ފަހު، ޕާޓީގެ ކައުންސިލުން ނުވަތަ އެކަަމަށްޓަކައި ކަނޑައަޅާ ކޮމިޓީއަކުން ބެލުމަށް ފަހު ކަމަށެވެ.
އަންނަ އަހަރުގެ މަޖިލިސް އިންތިހާބު ބާއްވާނެ ތާރީހެއް އިލެކްޝަން ކޮމިޝަން (އީސީ) އިން އަދި އިއުލާނެއް ނުކުރެ އެވެ.