މިދިޔަ ސަރުކާރުން ފަށާފައިވާ ގުޅީފަޅު ހިއްކުމުގެ މަޝްރޫޢު ހުއްޓިފައި ނުވާ ކަމަށާއި އެކަން ބާރަށް ކުރިއަށްދާ ކަމަށް މިނިސްޓަރ އޮފް ކޮންސްޓްރަކްޝަން އިންފްރާސްޓަރަކްޗަރ ޑރ. އަބްދުﷲ މުއްތަލިބު ވިދާޅުވެއްޖެއެވެ.
މި ސަރުކާރުން ފުށިދިއްގަރު ފަޅު ހިއްކުމުގެ މަޝްރޫޢު ފެށުމާއެކު ބައެއް ފަރާތްތަކުން ދަނީ، މި ސަރުކާރުން ކުރީ ސަރުކާރުން ފަށާފައިވާ މަޝްރޫޢުއަށް ސަމާލުކަމެއް ނުދޭ ކަމަށް ބައެއް ފަރާތްތަކުން ވަނީ ތުހުމަތު ކޮށްފައެވެ. މިފަދަ ތުހުމަތު ތަކާއެކު ސަރުކާރުގެ ބަޖެޓު ފާސްކުރިއިރު، ފުށިދިއްގަރު ފަޅު ހިއްކުމުގެ މަޝްރޫޢުއަށް ކަނޑައަޅާފައިވާ ބައި ގުޅީފަޅު ހިއްކުމުގެ މަޝްރޫޢުއަށްވެސް އެއްބައި ހަމަޖެއްސިއެވެ.
Gulhifalhu Reclamation is ongoing non-stop as per the schedule. 90 hectares out of 150 hectares reclaimed. Government is committed to complete the project as soon as possible and start building basic infrastructures. pic.twitter.com/edTfbIkjdK
— Abdulla Muththalib (@muththo) December 27, 2023
މިކަމާއި ގުޅޭގޮތުން މިނިސްޓަރ މުއްތަލިބު އެކްސްގައި ކުރެއްވި ޕޯސްޓެއްގައި ވިދާޅުވީ، ގުޅީފަޅު ހިއްކުމުގެ މަޝްރޫޢު ހުއްޓާނުލާ ކުރިއަށްދާ ކަމަށެވެ. އެގޮތުން މިހާތަނަށް ހިއްކަން ކަނޑައެޅިފައިވާ 150 ހެކްޓަރުގެ ތެރެއިން 90 ހެކްޓަރު މިހާތަނަށް ހިއްކާފައިވާ ކަމަށެވެ. އަދި ސަރުކާރުން މި މަޝްރޫޢު ވީހާވެސް އަވަހަށް ނިންމާ އެތަނުގައި އަސާސީ ޚިދުމަތްތައް ޤާއިމް ކުރުމަށް މަސައްކަތް ފަށާފައިވާ ކަމަށް މިނިސްޓަރ ވިދާޅުވިއެވެ.
މިދިޔަ ސަރުކާރުގެ ގެދޮރުވެރިކަމުގެ މަޝްރޫޢުގެ ދަށުން 2000 ގޯތި ދިނުމަށް ހަމަޖެހިފައިވަނީ ގުޅީފަޅުންނެވެ. އަދި މި ސަރަހައްދުން ފްލެޓްވެސް ދިނުމަށް ސަރުކާރުން އޭރު ވަނީ ނިންމާފައެވެ.
މިމަޝްރޫޢޫ ހިންގުމަށް ހަވާލުކޮށްފައިވަނީ ނެދަލޭންޑްސްގެ ބޮސްކާލިސް ކުންފުންޏާއެވެ. އެ ކުންފުންޏާއި މިމަސައްކަތް ހަވާލުކޮށްފައިވަނީ 2 ބިލިއަން ރުފިޔާއަށެވެ.