އިންޑިއާގެ މަޝްހޫރު ކްރިކެޓް ކުޅުންތެރިޔާ ވިރާޓް ކޯލީ އާއި ބަތަލާ އަނުޝްކާ ޝަރްމާ ރައްޓެހިވެގެން އުޅޭކަން މިހާރު އެންމެންނަށް ވެސް އެނގެ އެވެ.
އެއީ މިހާރު ތުންމަތިން ދެކެވޭ ވާހަކަށް އަށް ވުރެ، ހާމަކަން ބޮޑު ގުޅުމެކެވެ. ސީދާ އެ ދެ މީހުން ވެސް ވަނީ ލޯބީގެ ގޮތުން ގުޅިގެން އުޅޭކަން މިހާރު އެތައް ފަހަރެއްގެ މަތިން މީޑިއާގައި އެއްބަސްވެފަ އެވެ.
އަނެއްކާ ދެ މީހުންގެ ޓްވިޓާ އަށް ބަލައިފި ނަމަ ވެސް އެކަން ކަށަވަރު ވާނެ އެވެ.
މިހާރު މި އޮތީ ޒުވާން ޖޯޑާ ބެހޭ ގޮތުން އަނެއްކާ ވެސް އާ ވާހަކައެކެވެ. ރައްޓެހިވެގެން އުޅޭ ނަމަ، ދެން ކުރިއަށް އޮންނާނީ ކައިވެންޏެވެ. މިހާރު ދެކެވެނީ ދެ ތަރިން ކައިވެނި ކުރަން އުޅޭ ވާހަކަ އެވެ.
ބައެއް މީޑިއާ ރިޕޯޓްތައް ބުނާ ގޮތުން މި އަހަރު ނިމުމުގެ ކުރިން އަނުޝްކާ އާއި ވިރާތު ކައިވެނި ކުރާނެ އެވެ. އެފަދަ ވާހަތަކެއް ދެ ފަރާތުގެ ދެމެދުގައި ދެކެވެމުންދާ ކަމަށްވެ އެވެ.
އެކަމަކު މިކަމާ ބެހޭ ގޮތުން އަދި އެ ދެ މީހުން އެއްވެސް ވާހަކައެއް ދައްކައިފައެއް ނުވެ އެވެ. ކައިވެންޏަކާ ހަމައަށް ދާ ނަމަ އެކަމަށް ވަރަށް ބޮޑަށް ތައްޔާރު ވާން ވެސް ޖެހެ އެވެ.
އެހެންވެ އަނުޝްކާ އާއި ވިރާޓް ހަމަ ހަގީގަތުގައި ވެސް މި އަހަރު ކައިވެނި ކުރާނެ ކަމެއް އަދި ޔަގީނެއް ނޫނެވެ.
ސަބަބަކީ ދެ މީހުން ވެސް ވަރަށް ބޮޒީކޮށް އުޅެން ޖެހުމެވެ. ލޯބީގެ ގުޅުމާ އެއްވަރަށް ދެ މީހުންނަށް ކެރިއަރު ވެސް ވަރަށް މުހިއްމެވެ.
މި އަހަރަކީ އަނުޝްކާ އަށް ވަރަށް ކާމިޔާބު އަހަރެކެވެ. މިދިޔަ އަހަރު ނިމިގެން ދިޔައީ އޭނާ މުހިއްމު ރޯލެއް އަދާ ކުރި "ޕީކޭ" ގެ ބޮޑު ކާމިޔާބީއަކާ އެކުގަ އެވެ.
ހަމަ އެއާ އެކު އަނުޝްކާ ޕްރޮޑިއުސްކޮށް، އެކްޓް ކުރި "އެންއެޗް 10" މި މަހުގެ 13 ވަނަ ދުވަހު ރިލީޒްކޮށް ބޮޑު ކާމިޔާބީއެއް ވަނީ ހޯދައިފަ އެވެ. އަނެއްކޮޅުން މެއި މަހުގެ 15 ގައި އަނެއްކާ ވެސް އޭނާގެ ވަރުގަދަ ފިލްމެއް ސްކްރީނަށް އަންނާނެ އެވެ.
އެއީ ރަންބީރު ކަޕޫރާ އެކު ކުޅުނު "ބޮމްބޭ ވެލްވެޓް" އެވެ. ކުރިއަށް ހުރީ މި ފިލްމުގެ ޕްރޮމޯޝަނަލް ހަރަކާތްތަކެވެ. އެހެންވެ އަނުޝްކާ ވަަރަށް ބިޒީ ވާނެ އެވެ.
އަދި މި އަހަރުގެ ތެރޭގައި އަނެއްކާ ވެސް އޭނާ ބޮޑު ފިލްމެއްގެ މަސައްކަތް ފަށާނެ އެވެ.
އެއީ ކަރަން ޖޯހަރް ޑައިރެކްޓް ކުރާ "އޭ ދިލް ހޭ މުޝްކިލް" އެވެ. މި ފިލްމުގެ ޝޫޓިން އިންޑިއާގެ އިތުރުން ޔޫރަޕްގެ ބައެއް ގަައުމުތަކުގައި ވެސް ނަގަން ވަނީ ހަމަޖެހިފަ އެވެ. އެހެންވެ ގިނަ ދަތުރުތަކެއް ވެސް އަނުޝްކާ ކުރަން ޖެހޭނެ އެވެ.
މި ފިލްމުގައި އަނުޝްކާ ފެނިގެން ދާނީ އަނެއްކާ ވެސް ރަންބީރާ އެކުގަ އެވެ. އައިޝްވާރިއާ ރާއީ ވެސް މި ފިލްމުގެ މުހިއްމު ރޯލަކުން ފެނިގެން ދާނެ އެވެ. ފިލްމުގެ ޝޫޓިން ފެށުމަށް ވާން ޖެހޭ ތައްޔާރީތައް ކަރަން މިހާރު އަންނަނީވަމުންނެވެ.
ވިރާޓަށް ބަލާ އިރު، އޭނާ މިހާރު އުޅެނީ އޮސްޓްރޭލިއާގައި ކުރިއަށްދާ ކްރިކެޓް ވޯލްޑް ކަޕްގަ އެވެ.
ވޯލްޑް ކަޕް ނިމޭ އިރަށް އަނެއްކާ ވެސް އިންޑިއާގައި ވަރަށް ބޮޑު ފޯރިއެއް އޮންނަ އިންޑިއަން ޕްރީމިއާ ލީގް (އައިޕީއެލް) ފެށިގެން ދާނެ އެވެ. އެހެންވެ ވިރާޓަށް ވެސް ކުރިއަށް އޮތީ ބިޒީ ދުވަސްތަކެކެވެ.
ކައިވެންޏަކާ ހަމައަށް ދާން ބަލާ ނަމަ، އެކަމަށް ހުސް ކުރަން ޖެހޭ ވަގުތު ގިނަވާނެ އެވެ. އެހެންވެ ސުވާލަކީ ހަމަ ހަގީގަތުގައި ވެސް އަނުޝްކާ އާއި ވިރާޓް މި އަހަރު ކައިވެންޏަށް ތައްޔާރުތޯ އެވެ؟