އިހި ނަގަން މޫދަށް ފައިގެން އުޅެނިކޮށް އައްޑޫ މަރަދޫ މުހައްމަދު ނައީޝް ނަސްރު ގެއްލުނުތާ ހަފުތާއެއްވީ އިރު ވެސް އޭނަ ފެނިފައި ނުވާ ކަމަށް އެމްއެންޑީއެފުން ބުނެފި އެވެ.
މިދިޔަ ބުރާސްފަތި ދުވަހުގެ ރޭ ރައްޓެހިންތަކަކާ އެކީ ނައީޝް އެރުނީ ގަމުގެ ދެކުނު ފަރާތު މޫދަށެވެ. މޫދަށް އެރި އުޅެނިކޮށް އޭނަ އޮޔާ ދަމައި ގަނެ، ގެއްލުމާ ގުޅިގެން އޭނަ ހޯދަން މިހާތަނަށް ބޮޑު އޮޕަރޭޝަނެއް ކަނޑާއި ވައިގެ މަގުން ކުރިއަށް ގެންގޮސްފައިވެ އެވެ.
އެމްއެންޑީއެފުން ބުނީ ނައީޝް ހޯދަން މިހާތަނަށް ކުރި މަސައްކަތުގެ ތެރެއިން 4،743 ސްކޮޔާ ނޯޓިކަލް މޭލުގެ ސަރަހައްދެއް ބަލާފައިވާ ކަމަވެ. އެގޮތުން ވައިގެ މަގުން 3602.46 ސްކޮޔާ ނޯޓިކަލް މޭލު ބަލާފައިވާ އިރު، ކަނޑު މަގުން 1140 ސްކޮޔާ ނޯޓިކަލް މޭލު ބަލާފައިވެ އެވެ. އަދި ޑައިވްކޮށްގެން 1.026 ސްކޮޔާ ނޯޓިކަލް މޭލު ބަލާފައިވާ ކަމަށް ވެސް އެމްއެންޑީއެފުން ބުންޏެވެ.
އެތަނުން ބުނީ ނައީޝް ހޯދުމުގެ މަސައްކަތް އަދިވެސް ކުރިއަށްދާ ކަމަށެވެ. ނަމަވެސް މިހާތަނަށް ހިންގި އޮޕަރޭޝަނުގެ ތެރޭގައި ނައީޝްގެ އެއްވެސް ނިޝާނެއް ފެނިފައި ނުވާ ކަމަށެވެ.
އުމުރުން 18 އަހަރުގެ ނައީޝް އަކީ އައްޑޫ ހައި ސްކޫލްގެ ގްރޭޑް 12 ގައި ކިޔަވަމުން އައި ދަރިވަރެކެވެ.