މިރޭ ޕީއެންސީ އަށް ސޮއިކުރަން ހަމަޖެހިފައިވާ އެމްޑީޕީގެ މަޖިލިސް މެންބަރުންގެ ތެރޭގައި ފޭދޫ ދާއިރާގެ މެންބަރު މުހައްމަދު ނިހާދު ހިމެނޭކަން އެނގިއްޖެ އެވެ.
އޭނަ އަކީ ރިޔާސީ އިންތިހާބުގެ ކެމްޕޭން ތެރޭގައި މިހާރުގެ ރައީސް ޑރ. މުހައްމަދު މުއިއްޒަށް ވަރަށް ބޮޑަށް ފާޑުވިދާޅުވި މެންބަރެކެވެ.
ވެރިކަން ކުރާ ޕާޓީ، ޕީއެންސީ އަށް މިރޭ ނިހާދާ އެކީ ޖުމްލަ ފަސް މެންބަރަކު ސޮއިކުރާނެ ކަމަށް އެނގިފައިވެ އެވެ. އޭގެ ތެރޭގައި ދެން ހިމެނެނީ ކުރެންދޫ ދާއިރާގެ މެންބަރު އަބްދުލް ޣަނީ އަބްދުލްހަކީމާއި ކޮމަންޑޫ ދާއިރާގެ މެންބަރު މުހައްމަދު ރާޝީދާއި މުލަކު ދާއިރާގެ މެންބަރު އިބްރާހިމް ނަސީރާއި ނިލަންދޫ ދާއިރާގެ މެންބަރު އަބްދުލް މުހުސިން ހަމީދާއިމާފަންނު ދެކުނު ދާއިރާގެ މެންބަރު އާދަމް އަލީ އާއި އިސްދޫ ދާއިރާގެ މެންބަރު އަލީ ހަމީދެވެ.
ނަމަވެސް މި މެންބަރުން ޕާޓީ ބަދަލުކުރެއްވުމާ ގުޅޭ ގޮތުން ވަކި އެއްޗެއް ވިދާޅެއް ނުވެ އެވެ. އަދި މިކަމާ ގުޅޭ ގޮތުން އެމްޑީޕީން ވެސް ވަކި އެއްޗެއް ބުނެފައެއް ނުވެ އެވެ.
އެމްޑީޕީގެ މަޖިލިސް ހަ މެންބަރަކު މިރޭ ޕީއެންސީއާ ގުޅިވަޑައިގަންނަވާނީ އެ ޕާޓީން މިރޭ ދަރުބާރުގޭގައި ބާއްވާ ހާއްސަ ޖަލްސާގަ އެވެ. އެ ޖަލްސާގައި ރައީސް މުއިއްޒު ވެދސް ބައިވެރިވެވަޑައިގަންނަވާނެ އެވެ.
އެމްޑީޕީ އަށް ވެރިކަން ގެއްލުނުނު ފަހުން އެ ޕާޓީގެ މެންބަރުންތަކެއް ސަރުކާރާ ގުޅެން އުޅޭކަމުގެ ވާހަކަތަކެއް އައީ ދެކެވެމުންނެވެ. ނަމަވެސް "މެންބަރުން ގަންނަން" އުޅޭ ކަމަށް ސަރުކާރަށް ކުރާ ތުހުމަތުތައް ދޮގުކުރެ އެވެ.