ރޭ ޕާޓީ ބަދަލުކުރެއްވި ރައްޔިތުންގެ މަޖިލިސް މެންބަރުންނަކީ އެ ބޭފުޅުންނަށް ވޯޓް ދިން ރައްޔިތުންނަށް ހަރާންކޯރުވި ބައެއް ކަމަށް ކުރީގެ މިނިސްޓަރު މުހައްމަދު މަލީހު ޖަމާލު ވިދާޅުވެއްޖެ އެވެ.
ކުރީގެ ރައީސް އަބްދުﷲ ޔާމީން އިސްކޮށް ހުންނަވައިގެން އުފައްދަވަން މަސައްކަތް ކުރައްވާ، ޕީޕަލްސް ނެޝަނަލް ފްރޮންޓް (ޕީއެންއެފް) ގެ މަސައްކަތްތަކުގައި އިސްކޮށް އުޅުއްވާ މަލީހު ސޯޝަލް މީޑިއާ ޕޯސްޓެއްގައި މި ގޮތަށް ވިދާޅުވީ އެމްޑީޕީގެ 13 މަޖިލިސް މެންބަރަކު ވެރިކަން ކުރާ ޕާޓީ، ޕީއެންސީ އަށް ސޮއިކުރެއްވުމާ ގުޅިގެންނެވެ.
އެ މެންބަރުން ޕާޓީ ބަދަލު ކުރައްވައި ފޯމް ހަވާލުކުރުމުގެ ޖަލްސާ ރޭ ބޭއްވީ ދަރުބާރުގޭގަ އެވެ.
މަލީހު ވިދާޅުވީ ރޭ ދައްކައިލި މަންޒަރަށް ވުރެ ހަޑި ހުތުރު ވިޔާނުދާ އަދަބެއް ސަދަބެއް ނެތް މަންޒަރެއް ދިވެހި ރައްޔތުން ނުދެކޭނެ ކަމަށެވެ.
"އިންސާނުން މިފަދަ ދަށު ދަރަޖައަށް ވެއްޓޭކަށް ނުވާނެ. މިއީ ސެލެބްރޭޓް ކުރާ ވަރުކަންކަމެއް ނޫން. ވޯޓްދިން ރައްޔިތުންނަށް ހަރާންކޯރުވެފަ މޮޅު ނުވާނެ،" އޭނަ ވިދާޅުވި އެވެ. "ދެން ފަތިސް ނަމާދު ޖަމާޢަތުގައި."
އޭނަގެ އެހެން ޕޯސްޓެއްގައި މަޖިލިސް މެންބަރުންގެ ދައުރު ހަމަވާން ދެން މާ ގިނަ ދުވަހެއް ނެތްކަން ފާގަގަ ކުރައްވައި ވިދާޅުވީ ތިން މަސް ދުވަސްތެރޭ މުއްދަތު ހަމަވާ ޕްރޮޑަކްޓެއް 1.5 މިލިއަނަށް ގަންނާނީ ކާކުތޯ ކަމަށެވެ.
"ޕްލަސް އިރުތު ވަޒީފާކޮޅަކާ ސްޓޭޓް މިނިސްޓަރު ފެންވަރު ވަޒީފާއަކާ." މަލީހު ވިދާޅުވި އެވެ.
އަންނަ އަހަރުގެ ކުރީކޮޅު މަޖިލިސް އިންތިހާބު ބާއްވަން ތައްޔާރުވަމުން އަންނަ އިރު، ރޭ ޕީއެންސީ އަށް ގުޅުނު މެންބަރުންނަކީ މިހާތަނަށް މި ސަރުކާރަށް ފާޑުކިޔަމުން ގެންދެވި މެންބަރުންތަކެކެވެ.
* މަރަދޫ ދާއިރާގެ މެމްބަރު އިބްރާހިމް ޝަރީފް (މަވޯޓާ)
* ފޭދޫ ދާއިރާގެ މެމްބަރު އިބްރާހީމް ނިހާދު
* މައްޗަންގޮޅި ދެކުނު ދާއިރާގެ މެމްބަރު އަހްމަދު ހައިތަމް
* އިސްދޫ ދާއިރާގެ މެމްބަރު އަލީ ހަމީދު
* ކަނޑިތީމު ދާއިރާގެ މެމްބަރު އަބްދުﷲ ޝަހީމް
* ކުރެންދޫ ދާއިރާގެ މެމްބަރު އަބްދުﷲ ހަކީމް
* މަތިވެރި ދާއިރާގެ މެމްބަރު ހަސަން ޒަރީރު
* މުލަކު ދާއިރާގެ މެމްބަރު އިބްރާހިމް ނަސީރު
* ނިލަންދޫ ދާއިރާގެ މެމްބަރު އަބްދުލް މުހުސިން ހަމީދު (ޖޭފޯ)
* މާފަންނު ދެކުނު ދާއިރާގެ މެމްބަރު އާދަމް އަލީ
* ކޮމަންޑޫ ދާއިރާގެ މެމްބަރު މުޙައްމަދު ރާޝިދު
* ތޮއްޑޫ ދާއިރާގެ މެމްބަރު ހަސަން ޝިޔާން
* ގުރައިދޫ ދާއިރާގެ މެމްބަރު ޝާޒް
މި މެންބަރުން ޕާޓީ ބަދަލުކުރެއްވުމާ ގުޅިގެން އެމްޑީޕީގެ ޕާލަމެންޓްރީ ގްރޫޕްގެ މެމްބަރުން އަދަދު މިހާރު ވަނީ 56 އިން 42 އަށް ދަށްވެފަ އެވެ.