ރާއްޖޭގެ ބޮޑު ސަރަހައްދަކަށް މިއަދު ބޯކޮށް ވާރޭ ވެހޭނެ ކަމަށް ލަފާކޮށް، ޔެލޯ އެލާޓް ނެރެފި އެވެ.
މޫސުމާ ބެހޭ އިދާރާ އިން އެ އެލާޓް ނެރެފައި ވަނީ ޅ. އަތޮޅުން ފެށިގެން އައްޑުއާ ހަމައަށް ހެނދުނު ހެނދުނު 7:50 އިން ފެށިގެން މެންދުރު 12:00 އާ ހަމައަށެވެ. އެ ވަގުތުގެ ތެރޭގައި ބޯކޮށް ވާރޭ ވެހުމާ އެކީ ގުގުރައި ވިލާގަނޑުގައި ގަޑިއަކު 45 މޭލަށް ވައި ގަދަވާނެ ކަމަށް ލަފާކޮށްފައިވެ އެވެ.
މި ދުވަސްވަރަކީ ރާއްޖޭގެ ހުރިހާ ހިސާބަކަށް ވެސް މޫސުން ގޯސް ދުވަސްވަރެކެވެ. އެގޮތުން ބުދަ ދުވަހު އައްޑު އާއި ފުވައްމުލަކަށް ބޯކޮށް ވާރޭ ވެހި އެ ދެ ސިޓީގައި ފެންބޮޑުވި އެވެ. އަދި އައްޑޫގެ 100 އެއްހާ ގެއަކަށް ފެންވަދެ، އެކި ވަރުގެ ގެއްލުންތައްވެފައިވެ އެވެ.
ވާރޭ ވެހޭ ދުވަސްވަރަކަށްވުމާ އެކީ ނެޝަނލް ޑިޒާސްޓާ މެނޭޖްމަންޓް އޮތޯރިޓީން ރައްކާތެރިކަމުގެ ފިޔަވަޅުތައް އަޅައިގެން ތިބުމަށް އިރުޝާދު ވެސް ދީފަ އެވެ.