ރައްޔިތުންގެ މަޖިލީހަށް އިންތިހާބުވީ އެމްޑީޕީގެ ޓިކެޓްގައި ކަމަށާއި އެހެންވެ ދައުރު ނިންމާނީ ވެސް އެ ޕާޓީގެ މެންބަރެއްގެ ގޮތުގައި ހުންނަވައިގެން ކަމަށް މަޖިލީހުގެ ވައިކަރަދޫ ދާއިރާގެ މެންބަރު ހުސެއިން ޒިޔާދު (ފިއްޓެ) ވިދާޅުވެއްޖެ އެވެ.
އޭނަ މި ގޮތަށް ވިދާޅުވީ އެމްޑީޕީގެ 13 މަޖިލިސް މެންބަރަކު ރޭ ޕީއެންސީ އަށް ސޮއިކުރެއްވުމާ ގުޅިގެންނެވެ.
ރާއްޖެ ޓީވީގައި ފިއްޓެ ވިދާޅުވި އޭނަ މަޖިލީހަށް ހޮވައި ދިނީ އެމްޑީޕީގެ މެންބަރުން ދިން ވޯޓުން ކަމަށާއި އެހެންވެ ދައުރު ނިންމާނީ ވެސް އެ ޕާޓީގެ މެންބަރެއްގެ ގޮތުގައި ހުންނަވައިގެން ކަމަށެވެ.
"އެހެންވީމާ އަޅުގަނޑު ސިޔާސީ މި ދައުރު ނިންމާލާނީ އެމްޑީޕީ މެންބަރެއްގެ ގޮތުގައި." އޭނަ ވިދާޅުވި އެވެ.
ފިއްޓެ ވިދާޅުވީ ޕީއެންސީއާ ގުޅިވަޑައިގަތް އެމްޑީޕީގެ މަޖިލިސް މެންބަރުންގެ އެ ނިންމެވުމަކީ މި ސަރުކާރުން މަސައްކަތް ކުރަނީ އެ ބޭފުޅުން ގަބޫލުކުރާ ހަމަތަކުގެ މަތިން، ރަނގަޅަށް ކަމަށްވާ ސަރުކާރާ ގުޅުމަކީ މައްސަލައެއް ކަމަށް ދެކެވަޑައިނުގަންނަވާ ކަމަށެވެ.
އެމްޑީޕީގެ މެޖޯރިޓީ އޮތް އެ ޕާޓީގެ މަޖިލިސް މެންބަރުންތަކެއް ބަދަލުކުރެއްވުމާ ގުޅިގެން ޕާލަމެންޓްރީ ގްރޫޕްގެ މެމްބަރުން އަދަދު މިހާރު ވަނީ 56 އިން 42 އަށް ދަށްވެފަ އެވެ. ކުރިން އެމްޑީޕީ އަކީ ސުޕަ މެޖޯރިޓީ އޮތް ޕާޓީއެކެވެ. އެ މަގާމު އެ ޕާޓީ އަށް ގެއްލުނީ ދަ ޑިމޮކްރެޓްސް އުފައްދަން މި އަހަރުގެ މެދުތެރޭގައި 12 ވަރަކަށް މެންބަރުން ޕާޓީން ވަކިވެވަޑައިގަތުމާ ގުޅިގެންނެވެ.
އޭގެ ތެރޭގައި އެމްޑީޕީގެ ކުރީގެ ރައީސް މުހައްމަދު ނަޝީދު ވެސް ހިމެނިވަޑައިގަނެ އެވެ.