ވެރިކަން ކުރާ ޕާޓީ، ޕީއެންސީގެ މެންބަރުންގެ އަދަދު މިހާރޔ 40،000 އަށް އަރާފައިވާ ކަމަށް އެ ޕާޓީން ބުނެފި އެވެ.
އެމްޑީޕީގެ 13 މަޖިލިސް މެންބަރަކު ރޭ ޕީއެންސީ އަށް ސޮއިކުރައްވަން ދަރުބާރުގޭގައި ބޭއްވި ޖަލްސާގައި އެ ޕާޓީގެ ޗެއާޕާސަން އަބްދުއްރަހީމް އަބްދުއްރަހީމް އަބްދުﷲ އަދުރޭ) ވިދާޅުވީ ޕާޓީގައި މިހާރު 40،000 އަށް ވުރެ ގިނަ މެންބަރުން ތިބި އިރު، އަހަރު ނިމޭ އިރު، އެންމެ ބޮޑު އެއް ޕާޓީ އަށް ޕީއެންސީވާނެ ކަމަށެވެ.
އެ ޕާޓީގެ ޓިކެޓްގައި ޑރ. މުހައްމަދު މުއިއްޒު ރިޔާސީ އިންތިހާބަށް ނުކުންނަވައި، ސެޕްޓެމްބަރު 30 ގައި ބޭއްވި އިންތިހާބު ކާމިޔާބު ކުރެއްވި އިރު، ޕީއެންސީގެ މެންބަރުންގެ އަދަދު 10،000 އަށް ވެސް ނާރަ އެވެ. އެހެންވެ އެ ޕާޓީގެ އެންމެ ބޮޑު އަމާޒަކަށްވެފައި އޮތީ އެ އަދަދު ހަމަކުރުމެވެ. އެގޮތުން މިހާތަނަށް މެމްބަޝިޕް އިތުރުކުރަން ރާއްޖޭގެ އެކި ހިސާބުތަކުގައި މަސައްކަތްކޮށްފައިވެ އެވެ.
ޕީއެންސީ އަކީ ކުރިން ޕީޕީއެމްގެ ހިޔަނީގައި އޮތް ޕާޓީއެކެވެ.
އަދުރޭ ވިދާޅުވީ ޕީއެންސީ ހޯދަމުން އަންނަ ކުރިއެރުންތަކުން ހާމަވަނީ ރިޔާސީ އިންތިޚާބުގައި، ރައްޔިތުން ނިންމި ނިންމުމާއެކު، ޕީއެންސީއާއި މި ސަރުކާރު ރައްޔިތުން ބަލައިގަންނަކަން ކަމަށެވެ.
"ރެކޯޑަކީ މިއީ. އެއީ ދޭ އިންޓަވިއުއަކުން ހަދާ އެއްޗެއް ނޫން." އަދުރޭ ވިދާޅުވި އެވެ.
އޭނަ ވިދާޅުވީ ރައްޔިތުން ތިބީ "ދިވެހީންގެ ރާއްޖެ" އެއް ބިނާކުރުމަށް އަޒުމު ކަނޑައަޅައިގެން ކަމަށާއި އެ މަސައްކަތް ވެސް ރައްޔިތުން ހަވާލުކޮށްފައި ވަނީ ރައީސް މުއިއްޒާ ކަމަށެވެ. އަދި ސަރުކާރު ދިފާއުކޮށް، ރައީސަށް އެއްބާރުލުން ދިނުމަށް ކުރެވެން ހުރި ކޮންމެ ކަމެއް ކުރައްވާނެ ކަމަށް ވިދާޅުވިއެވެ.
"އިއްޔެ ކަންކަމާ ހަވާލުވެގެން ތިބި މީހުން މިއަދު ހަވާލުވެ ތިބުމަކީ ލާޒިމް ކަމެއް ނޫން އިއްޔެ ކަންކަން ކުރި ގިތަށް މިއަދު ކަންކަން ކުރުމަކީ ލާޒިމް ކަމެއް ނޫން." އަދުރޭ ވިދާޅުވި އެވެ.