ރާއްޖޭގެ ކުރީގެ ޑިފެންސް މިނިސްޓަރ ކާނަލް ރިޓަޔާޑް މުޙައްމަދު ނާޒިމް ދިރިއުޅުއްވާ ކޮޓަރި ފެބްރުއަރީ މަހު 17 ވަނަ ދުވަހުގެ ރޭ މެންދަމުގެ ވަގުތެއްގައި ފާސްކުރި އިރު، ދަބަހެއްގެ ތެރެއިން ފިސްތޯލައަކާއި ތިން ވަޒަން ފެނުމާއި، ދައުލަތުގެ އިސްވެރިންތަކަކަށް ހަމަލާދިނުމަށް ރަވާފައިވާ ކަމުގެ މައުލޫމާތުތަކެއް، އެ ދަބަހުން ފެނުނު ޕެން ޑްރައިވެއްގައި ހުރުމުން، ދައުލަތުން ވަނީ ނާޒިމްގެ މައްޗަށް ހަތިޔާރު އެތެރެކޮށް ގެންގުޅުމުގެ ކުށުގެ ދައުވާ އުފުލާފަ އެވެ.
ނާޒިމް ދިރިއުޅުއްވަމުން ގެންދެވި އެޕާޓްމަންޓަށް ފުލުހުން ބާރުގެ ބޭނުންކޮށްގެން ވަދެ ބަލައި ފާސް ކުރި ޚަބަރަކީ ވަރަށް ގިނަ ބަޔަކަށް ހައިރާންކަން ލިބިގެން ދިޔަ ޚަބަރެކެވެ.
ޖެހިގެން އައި ދުވަހު ރަސްމީ އެއްވެސް ފަރާތަކުން އަދި ނާޒިމްވެސް އޭނާ މައްޗަށް ތުހުމަތު ކުރެވެނީ ކޮން ކުށެއްކަން ހާމަ ނުކުރި ނަމަވެސް، އާންމުންގެ ތެރޭގައި އެކި ގޮތްގޮތަށް ވާހަކަ ދެކެވެމުން ދިޔަ އެވެ.
މިގޮތުން އެންމެ ހަރުކޮށް ދެކެވުނު އެއް ވާހަކައަކީ ޓޫރިޒަމް މިނިސްޓަރު އަޙްމަދު އަދީބު އަށް އިނގިލި ދިއްކޮށް މީހުން ދައްކަމުން ދިޔަ ވާހަކަ އެވެ.
އާދެ ނާޒިމް "ފްރޭމް" ކޮށްފައިވާ މަށް ބުނެ ދައްކަމުން ދިޔަ ވާހަކަ އެވެ. ފަހުން ނާޒިމްގެ ޤާނޫނީ ޓީމުން ވެސް ވަނީ މި ތުހުމަތު ޝަރީޢަތުގައި އަދި ޝަރީޢަތުން ބޭރުގައި ވެސް އަދީބުގެ މައްޗަށްކޮށްފަ އެވެ.
ކޮންމެއަކަސް ނާޒިމް ދިރިއުޅުއްވަމުން ގެންދެވި އެޕާޓްމަންޓަށް ފުލުހުން ވަނުމުގެ ކުރިން ވެސް އަދީބާއި ނާޒިމް ދެބަސްވެ ހިތްހަމަ ނުޖެހުންތަކެއް އުޅޭ ވާހަކަ ރަށުތެރޭގައި ވަރަށް ބޮޑަށް ދެކެވުނެވެ.
ނަމަވެސް ކުށެއްގެ ތުހުމަތުގައި ހައްޔަރު ކުރެވޭ ކޮންމެ މީހަކު ވެސް ހައްޔަރު ކުރެވުމުން، އެކުށަކުން ބަރީޢަވުމަށް ދެއްކެން ހުރި ހުރިހާ ވާހަކައެއް ދައްކާނެކަމީ ޝައްކެއް އޮތްކަމެއްވެސް ނޫނެވެ.
އެހެންކަމުން ބުއްދިވެރި ގޮތަކީ ވަކިފަރާތެއްގެ ވާހަކަތަކަށް ބަރޯސާނުވެ، ފެންނަން ހުރި ހަޤީގަތްތަކުގެ މައްޗަށް އެކަނި ބުރަވެތިބެ، އަމިއްލައަށް ގޮތެއް ނިންމުމެވެ.
ޤައުމުގައި ހިނގާ މިފަދަ ބޮޑެތި ހާދިސާތަކާއިމެދު ނުވިސްނާ ތިބުމަކީވެސް އެންމެ ޒިންމާދާރުގޮތް ކަމުގައި ނުވާނެތީ އެވެ.
ނާޒިމްގެ ޤާނޫނީ ޓީމުން އެ ވިދާޅުވަމުންދާ ގޮތަށް،ހަޤީގަތުގައި ވެސް އެމަނިކްފާނު ވަނީ "ފްރޭމް" ކުރެވިފައި ނަމަ، އެކަން އެގޮތަށް ކުރުމަށް އެންމެ މުހިންމު ދައުރެއް އަދާކޮށްފައިވާނީ މޯލްޑިވްސް ޕޮލިސް ސާވިސްގެ ފަރާތުން އެންމެ ފުރަތަމަ ކްރައިމް
ސީނަށް ދިޔަ މީހުން ކަމަށް ބަލަން ޖެހެ އެވެ.
ފުލުހުންގެ ފަރާތުން މިފަދަ ކަމެއް ހިންގި ކަމުގައިވާނަމަ، އެކަމެއް ދެނެގަތުމަށް އެންމެ ފަސޭހަވާނެ އެއް ފަރާތަކީ ކުރީގެ ކަމިޝަނަރު އޮފް ޕޮލިސް އަބްދުﷲ ރިޔާޒެވެ.
މިހެން މި ދެންނެވީ ފުލުހުންގެ ވަޒީފާގައި އެތައް އަހަރެއް އުޅުއްވުމާއި، އަދި މިހާރު އެތަނުގައި މަސައްކަތް ކުރައްވާ ބޭފުޅުންނާ އެއްމެ ގުޅުން ބޮޑު އެއް ބޭފުޅަކަށްވެފައި، އެތަނުގެ ހަޤީގަތްތައް އެންމެ ރަނގަޅަށް އެނގިލައްވާނެ އެކަކަށް އެބޭފުޅާ ވާނެތީއެވެ.
އަބްދުﷲ ރިޔާޒް ގެންދަވަނީ ނާޒިމްގެ ޤާނޫނީ ޓީމާއި އެކު މަސައްކަތް ކުރައްވަމުންނެވެ. އަދި ތަކުރާރުކޮށް ވިދާޅުވަމުން ގެންދަވަނީ ނާޒިމްވަނީ "ފްރޭމް" ކުރެވިފައިވާ ކަމަށެވެ.
މިގޮތަށް ވިދާޅުވަމުން ދައްކަވާ ހުއްޖަތް ތަކުގެ ތެރޭގައި ފުލުހުން ނާޒިމް މައްސަލައިގައި ޢަމަލުކޮށްފައިވާ ގޮތުގެ ތެރެއިން ވަރަށް ގިނަ ކަންކަން ފާހަގަކުރައްވަ އެވެ.
* ފުލުހުންގެ ފަރާތުން ފާހަގަ ކުރެވުނު ކަންތައް
އެންމެ ފުރަތަމަ ކަމަކަށް ފުލުހުންގެ އިންޓެލިޖެންސަށް ހަނގުރާމަވެރި ހަތިޔާރު މާލޭ ގެއެއްގެ ތެރޭގައި ހުރިކަމަށް މަޢުލޫމާތު ލިބިގެން އެފަދަ ތަނެއް ބަލާފާސް ކުރުމުގައި ޢަމަލު ކުރަންޖެހެނީ ކިހިނެއްތޯ ބަލާލަމާ ހިނގާށެވެ.
ހަނގުރާމަވެރި ހަތިޔާރާއި ގޮވާތަކެތި މީހަކު ތަނެއްގައި ފޮރުވައިގެން ގެންގުޅޭ ނަމަ، ނުވަތަ އެފަދަ ހަތިޔާރު ބޭނުންކޮށްގެން ދައުލަތާއި ދެކޮޅު ހަރަކާތެއް ހިންގަން އުޅޭ ކަމަށް މަޢުލޫމާތު ލިބިއްޖެ ނަމަ، އެފަދަ ތަނެއް ބަލައި ފާސްކުރުމުގައި ހަރަކާތްތެރިވާ ބަޔަކު ވިސްނަން ޖެހޭ ވަރަށް ގިނަ ކަންތައްތަކެއް ހުންނާނެ އެވެ.
ސަބަބަކީ އެ މަސައްކަތުގެ ތެރޭގައި ދިމާވާ ކަމަކުން އެކަމުގައި ހަރަކާތްތެރިވާ މީހުންގެ އިތުރުން، އެ ސަރަޙައްދުގައި ދިރިއުޅެމުންދާ ޢާންމުންގެ ފުރާނައަށް ގެއްލުން ވުމުގެ ފުރުޞަތު ބޮޑުކަމުންނެވެ.
އެހެންކަމުން އެފަދަ ސީނަކަށް ހާޒިރުވާން ޖެހޭނީ ނިކުމެދާނެ ކަމަށް ބެލެވޭ އެންމެހައި ކަންކަމަށް އެކަށީގެންވާ ގޮތުގައި ކުރިމަތިލުމުގެ ހުނަރާއި ޤާބިލިއްޔަތު ލިބިފައިވާ ބައެއްކަން ބުއްދިއަށް ޤަބޫލު ކުރެވެ އެވެ.
ދިވެހިރާއްޖޭގައި ހަނގުރާމަވެރި ހަތިޔާރު ނުވަތަ "ލީތަލް ވެޕަން" ގެންގުޅުމާއި އެފަދަ ތަކެތި ގެންގުޅޭ އެހެން ހަނގުރާމަވެރި ބަޔަކާއި ކުރިމަތި ލުމުގެ ޤާބިލުކަން ލިބިގެންވާ ހަމައެކަނި ބަޔަކީ އެމްއެންޑީއެފް އެވެ.
ޤާނޫނުން ފުލުހުންނަށް ހަތިޔާރު އެތެރެކޮށް ގެންގުޅުމުގެ ބާރު ދެވިފައި އޮތް ނަމަވެސް، މިހާތަނަށް ފުލުހުންގެ ބޭނުމަށް ގެނެސްގެން
ބޭނުން ކުރެވެމުން އަންނަ ހަތިޔާރުތަކަކީ "ނޮން ލީތަލް" ހަތިޔާރުތައް އެކަނިކަން ފާހަގަ ކުރެވެ އެވެ.
އެހެން ކަމުން ތަނެއްގައި ހަނގުރާމަވެރި ހަތިޔާރާއި ގޮވާތަކެތި ހުރި ކަމުގެ މަޢުލޫމާތު ލިބުމުން ފުލުހުން ގެންގުޅޭ ޝީލްޑާއި މުގުރު ހިފައިގެން ދިއުމަކީ ފުލުހުންނަށް ވެސް އަދި އެހިސާބުގައި ތިބި އާންމުންނަށް ވެސް އެންމެ ރައްކާތެރި ގޮތް ކަމަށް ބެލެވޭނެ ޖާގައެއް ނެތެވެ.
ފުލުހުން އާންމުކޮށް ކަންކުރަމުން އައި އުސޫލުތަކަށް ބަލާއިރުވެސް ފުލުހުން މިހާތަނަށް އެމްއެންޑީއެފް ގެ އެހީތެރިކަން ހޯދަން ޖެހޭ ޙާލަތްތަކުގައި ހޯދަމުން އައިސްފައިވެ އެވެ.
އަދި ނާޒިމްގެ މައްސަލައަށްވުރެ ނުރައްކާތެރިކަން ކުޑަ ކަންކަމުގައި ވެސް އެ ގޮތަށް އެހީތެރިކަން ހޯދާފައިވެ އެވެ. ނަމަވެސް މި ފަހަރު ފުލުހުން "ނޮން ލީތަލް" ހަތިޔާރުތަކާއި އެކު ކުރިމަތިލާފައި މި ވަނީ ހަނގުރާމަވެރި ހަތިޔާރާއި ގޮވާތަކެތި ގެންގުޅޭ މީހަކާ އެވެ.
އެހެންކަމުން ގިނަ ބަޔަކު ފުލުހުން އެމްއެން.ޑީއެފްގެ އެހީތެރިކަން ނުހޯދުމުން ސުވާލު އުފައްދަން ފެށި އެވެ.
އިސްވެ ނަންގަނެވުނު ފަދަ އެހީތެރި ކަމަކަށް އެދެވެން ނެތީ ޑިފެންސް މިނިސްޓަރު އުޅުވާ އެޕާޓްމަންޓް ބަލައި ފާސްކުރަން ޖެހޭތީ ކަމަށް ބައެއް ފަރާތްތަކުން ވާހަކަ ދެއްކި އެވެ.
އެހެނީ، އެފަދަ އެހީތެރިކަމަށް އެދިއްޖެނަމަ ތުހުމަތުކުރެވޭ ފަރާތަށް މާކުރިން މަޢުލޫމާތު ލިބުމުގެ ފުރުޞަތު ބޮޑުވެފައި،ތުހުމަތު ކުރެވޭ ކުށުގެ ހެކި ފޮރުވަފާނެ ކަމުގެ ބިރުއޮތީމަ އެވެ.
ނަމަވެސް މި ގޮތަށް ވެސް ބެލެވެން ނެތީ ފުލުހުންގެ ފަރާތުން ފަހުން އިޢުލާންކުރި ގޮތުގައި ހަތިޔާރު ފެނުނު އެޕާޓްމަންޓަށް ފުލުހުން ވަނުމުގެ ކުރިން އެ އެޕާޓްމަންޓުގައި ދިރިއުޅެމުންދަނީ ޑިފެންސް މިނިސްޓަރު ނާޒިމްކަން އެއްވެސް ގޮތަކުން އެނގިފައި ނެތް ކަމަށެވެ.
މިގޮތަށް ފުލުހުން ހާމަކުރުމުން ބައެއް މީހުން ހިތުތެރޭގައި އުފެދިފައި ހުރި ޝައްކުތައް އިތުރަށް ބޮޑުވެގެން ދިޔަ އެވެ.
މިއާ ވިދިގެން ދެން އިވިގެން ދިޔަ ޚަބަރަކީ ފުލުހުން ކޯޓު އަމުރު ހޯދާފައި ވަނީ ފުލުހުންގެ އިންޓެލިޖެންސަށް ލިބިފައިވާ މަޢުލޫމާތަކަށް ބިނާކޮށްކަމުން، ކްރިމިނަލް ކޯޓުން ފުލުހުންގެ އިންޓެލިޖެންސްގެ އިސް ބޭފުޅުން ކޯޓަށް ހާޒިރުކޮށް މައުލޫމާތު ހޯދިކަމުގެ ޚަބަރެވެ.
މި ގޮތުން ހާޒިރު ކުރެވުނު ފަރާތްތަކުން ނާޒިމްގެ މައްސަލަ އާ ބެހޭ އެއްވެސް މައުލޫމާތެއް އިންޓެލިޖެންސް ޑިޕާޓްމަންޓަށް ކުރިން އެނގިފައި ނުވާކަމަށް ކްރިމިނަލް ކޯޓުގައި ބުނެފައިވެ އެވެ.
ނަމަވެސް ޤައުމުގައި މިފަދަ ނުރައްކާތެރި ކަމެއް ހިންގުމަށް ރޭވިފައިވާއިރު، އަދި ފުލުހުންގެ އިންޓެލިޖެންސަށް ލިބުނު މަޢުލޫމާތަށް ބިނާކޮށް ކޯޓު އަމުރު ހޯދި އިރު ވެސް، މޯލްޑިވްސް ޕޮލިސް ސާވިސްގެ އިންޓެލިޖެންސް ޑިޕާޓްމެންޓުގެ ވެރިންނަށް އެ މަޢުލޫމާތު އެނގިފައި ނުވުމުން ގިނަ ބަޔަކަށް ހައިރާންކަން ލިބިގެން ދިޔަ އެވެ.
ފުލުހުންނަށް ލިބުނީ، ނާޒިމް ދިރިއުޅުއްވާ ގޭގެ ހަތް ވަނަ ފްލޯ އަދި އަށްވަނަ ފްލޯގައި ނުރައްކާތެރި ހަތިޔާރު ހުރިކަމުގެ މައުލޫމާތު ކަމަށާއި ނަމަވެސް ފާސް ކުރީ ނާޒިމް ދިރިއުޅުއްވާ އަށްވަނަ ފްލޯ އެކަނިކަމަށް ތަހުގީގު ޓީމުގެ އިސްވެރިޔާ ޝަރީޢަތުގައި
ވަނީ ވިދާޅުވެފައެވެ.
އެގޮތަށް ކަން ކޮށްފައި ވަނީ މައުލޫމާތު ލިބުނު ތަކެތި ނާޒިމްގެ އެޕާޓްމަންޓުން ފެނުމުން ކަމަށާއި އެފަދަ ތަކެތި ހުންނާނީ އެއް ތަނެއްގައި ކަމަށް ބޫލުކުރެއްވިގެން ކަމަށް ވެސް އެ ބޭފުޅާ ވަނީ ވިދާޅުވެފަ އެވެ.
ނަމަވެސް ބަލައި ފާސް ކުރުމުގެ ކަންތައް ދިޔަ ގޮތަށް ބަލާއިރު ނާޒިމް ދިރިއުޅުއްވާ އެޕާޓްމަންޓް ހުންނަ ފްލޯގައި ދެން ހުރި އެޕާޓްމަންޓުގެ ދޮރު ހަލާކު ކުރުމަށް ފަހު ފުލުހުން ވަން ކަމުގައި ވިޔަސް،އެ އެޕާޓްމަންޓްގައި އުޅެނީ އެހެން ބައެއްކަން އެނގުމުން ބަލައި ފާސްކޮށްފައި ނުވާ ކަމަށް މަޢުލޫމާތު ލިބިފައިވެ އެވެ.
އެހެންކަމުން ސީދާ ބަލައި ފާސްކުރަން އައީ ނާޒިމް ދިރިއުޅުއްވާ އެޕާޓްމަންޓުކަމަށް ޢާންމުންނަށް ބެލެވިދާނެ އެވެ. އަދި ހަތް ވަނަ ބުރީގެ އެޕާރޓްމަންޓުތައް އެއްވެސް ވަރަކަށް ބަލައި ފާސްކޮށްފައި ނުވުމުން ޝަރީޢަތުގައި ތަޙްޤީގް ޓީމުގެ އިސްވެރިޔާ ވިދާޅުވި ގޮތާ
ޚިލާފަށް ހަތިޔާރު ހުރި ތަނާ ބެހޭ މަޢުލޫމާތު ވަރަށް ފުރިހަމައަށް ފުލުހުންނަށް ކުރިންސުރެ އެނގިފައިވާ ކަމަށް ބެލެވި ދާނެ އެވެ.
އެއީ ޖުމްލަ ހަތަރު އެޕާޓްމެންޓްގެ ތެރެއިން އެއްވެސް އެޕާރޓްމަންޓެއްގައި ނާޒިމް ދިރިއުޅުއްވާކަން ކުރިން އެނގިފައި ނެތަސް، ހަމައެކަނި ބަލައި ފާސްކޮށްފައި ވަނި ނާޒިމް ދިރިއުޅުވާ އެޕާޓްމަންޓުކަމުންނެވެ. މިހެން މިކަން ގެންދިއުމުން ފުރަތަމަ ދޮރުވައްޓާލި އެޕާޓްމަންޓުގައި ނާޒިމް ނެތުމުން އެތަން ބަލައި ފާސް ނުކޮށް، ދެން ހުރި އެޕާޓްމަންޓު ދޮރު ވާއްޓާލުމަށް ފަހު، އެ އެޕާޓްމަންޓުގައި ނާޒިމް ދިރިއުޅުއްވާތީވެ އެތަން ބަލައި ފާސްކުރީ ކަމަށް ގިނަބަޔަކު ޤަބޫލުކުރެ އެވެ.
ފާހަގަ ކުރަންޖެހޭ އަނެއް ކަމަކީ ހަތިޔާރު ހުރިކަމުގެ މަޢުލޫމާތު ލިބުނީ އެގޭގެ ހަތްވަނަ ފްލޯ އަދި އަށް ވަނަ ފްލޯގައި ކަމަށްވެފައި، މި ދެ ފްލޯގެ ތެރެއިން އެންމެ އެޕާޓްމަންޓެއް ބަލައި ފާސް ކުރުމަށް ފަހު އިތުރު ތަނެއްގައި އެފަދަ އެއްޗެއް ނުހުންނާނެ ކަމަށް ފުލުހުންގެ ތަޙްޤީގަށް ޤަބޫލު ކުރެވުނު ކަމަކީ ގިނަ ބަޔަކު ފާޑުކިޔަން މެދުވެރިވި ސަބަބަކަށެވެ.
އެހެނީ ތުހުމަތު ކުރެވުނު ކުށުގެ ބޮޑުކަމާއި، އެފަދަ ކަމަކަށް ބޭނުންކުރާނެ ހަތިޔާރުގެ ގޮތުގައި ފެނުނު ހަތިޔާރުތައް ނުފުދޭ ކަމަށް ގިނަ ބަޔަކަށް ޤަބޫލު ކުރެވޭތީ އެވެ.
ދުނިޔޭގެ ތަހުޒީބު މުޖްތަމަޢު ތަކުގައި ޢާންމުކޮށް ކަންކުރާ އުޞޫލަށް ބަލާއިރު ވެސް، މިފަދަ ކުށަކަށް ތުހުމަތު ކުރެވޭ ފަރާތުގެ ބާރުހިނގާނެ އެންމެހައި ތަންތަނާއި،ހަތިޔާރު ފަދަތަކެތި ރައްކާކޮށް ބަހައްޓަފާނެހެން ހީވާ އެންމެހައި ތަންތަން ބަލައި ފާސްކޮށް، އެފަދަ އިތުރު ހަތިޔާރެއް ނެތްކަން ކަށަވަރު ކުރުމަކީ ޢާންމުކޮށް މިފަދަ ކަންކަމުގައި ޢަމަލު ކުރަމުން އަންނަ ގޮތެވެ.
ޢާންމުކޮށް ފުލުހުން ހިންގާ މިފަދަ އޮޕަރޭޝަންތަކަކީ ފެށުނީއްސުރެ ވީޑިއޯ ކުރަމުން އަންނަ އޮޕަރޭޝަން ތަކަކަށް ވިޔަސް، ނާޒިމްގެ ބަލައި ފާސްކުރި އިރު ވީޑިއޯ ކުރެވިފައެއް ނުވެ އެވެ.
މިކަން ޝަރީޢަތުގައި ނާޒިމްގެ ފަރާތުން ވަކާލާތު ކުރެއްވި ބޭފުޅުންވެސް ވަނީ ފާހަގަކޮށްފަ އެވެ. އެއީ މިއަށް ވުރެ ކުދި މައްސަލަތަކުގައި ވެސް ފުލުހުންގެ ފަރާތުން މިހާތަނަށް މަސައްކަތްކޮށްފައިވާ ގޮތާއި ޚިލާފަށް ޢަމަލުކޮށްފައިވާތީ އެވެ.
ނާޒިމްގެ އެޕާރޓްމަންޓުން ހަތިޔާރު އަޅާފައިވާ ދަބަސް ފެނިފައި ވަނީ ކޮޓަރި ތެރޭގައި ތަޅުލެވޭ ކަބަޑުފަދަ އެތައް ތަނެއް ހުރި އިރު ވެސް، މުޅި ކޮޓަރީގައި ތަޅުނުލެވި ހުރި ހަމައެކަނި ތަނުން ކަމަށްވުމީވެސް ނާޒިމްގެ ފަރާތުން މިކަމާ ވަރަށް ބޮޑަށް ސުވާލު އުފައްދާ އެއް ސަބަބެވެ.
ތަހުގީގު ޓީމުގެ އިސް ވެރިޔާ ވިދާޅުވީ، ނާޒިމް ދިރިއުޅުއްވާ ގެ އަށް ތަހުގީގު ޓީމު ދިޔަ އިރު، އެސްއޯ ފުލުހުން ވަނީ އެ ގެއަށް ގޮސް، ތިން ކޮޓަރީގައި ތިބި މީހުން ސިޓިން ރޫމަށް ނެރެ ކޮޓަރިތައް ހުސްކޮށްފައި ކަމަށެވެ.
ހަމަ މިގޮތަށް ނާޒިމްގެ ފަރާތުން ވެސް ވަނީ ކުރިން ބުނެފަ އެވެ.
ނާޒިމްގެ އެޕާޓްމަންޓަށް ފުލުހުން ވަދެ ފާސްކުރިއިރު ފެނުނު ކަމަށް ބުނާ ފިސްތޯލައަކާއި ތިން ވަޒަނާ ޕެން ޑްރައިވަކީ އޭނާގެ އެއްޗެއް ނޫން ކަމަށާއި އެ ތަކެތި އެ ގެއިން ފެނުމުގެ ކުރިން، ފުލުހުން ވަނީ ނާޒިމްގެ ކޮޓަރީގައި އެކަނި ވަގުތުތަކެއް ހޭދަކޮށްފައި ކަމަށް ނާޒިމްގެ ވަކީލުން ވިދާޅުވެފައިވެ އެވެ.
އެހެންކަމުން ހަތިޔާރުތައް ފެނުނު މަންޒަރުތައް ވީޑިއޯ ކުރެވިފައި ނެތުމުން، ނާޒިމްގެ އެޕާޓްމަންޓަށް ކުރިން ދިޔަ ފުލުހުން ކޮޓަރިތައް ހުސްކުރުމަށް ފަހު ތަހުގީގު ކުރާ މީހުން އައުމާއި ހަމައަށް ހަރަކާތްތެރިވި ގޮތް ބެލޭނެ އެހެން އެއްވެސް ގޮތެއް ނެތެވެ.
އަދި ނާޒިމްގެ އެޕާޓްމަންޓް ބަލައި ފާސް ކުރަން ދިޔަ އެސްއޯ 30 ފުލުހުންގެ ތެރެއިން ތިން ފުލުހަކު މެނުވީ އެހެން އެއްވެސް ފުލުހަކަށް އެ ގެއިން އެފަދަ ހަތިޔާރެއް ފެނިފައި ނުވާކަމަށް ބުނެ ތަޙުޤީގަށް ބަޔާން ދީފައިވާ ކަމަށް ވަރަށް ބޮޑަށް ަޑުފެތުރިފައިވެ އެވެ.
* އެ ޕެންޑްރައިވް
ދެން އޮތީ ޕެންޑްރައިވްގެ ވާހަކަ އެވެ. ޝަރީޢަތުގައި ދައުލަތުން ފާހަގަކޮށްފައިވާ ގޮތުން ނާޒިމްގެ އެޕާޓްމަންޓަށް ފުލުހުން ވަދެ ފާސްކުރި އިރު ފެނުނު ޕެން ޑްރައިވްގައި ދައުލަތުގެ އިސްވެރިންތަކަކަށް ހަމަލާ ދޭނެ ގޮތުގެ ޕްލޭން ހިމެނިފައިވެ އެވެ.
އަދި އެކަމަށް ވިލާ އަދި އެސް.ޓީއޯ އިން ޚަރަދު ކުރުމަށް ނިންމާފައިވާ ކަމަށްވެ އެވެ.
މިގޮތުން ރާވާފައި ވަނީ، ރައީސް އަބްދުﷲ ޔާމީނާއި ޓޫރިޒަމް މިނިސްޓަރު އަހުމަދު އަދީބުގެ އިތުރުން ޕޮލިސް ކޮމިޝަނަރު ހުސައިން ވަހީދަށް ހަމަލާ ދިނުމަށް ކަމަށް ދައުލަތުން ބުނެފައިވެ އެވެ.
އެ ޕްލޭންގައި އެކި ކަންކަން ހިންގާނެ ދުވަސްތަކާއި އަދި ދައުލަތުގެ އިސް ވެރިންނަށް ހަމަލާ ދީފައި އެކަމުން ސަލާމަތް ވާނެ ގޮތްތައް ވެސް ރާވަފައިވާ ކަމަށް ދައުލަތުން ބުނެފައިވެ އެވެ.
ނަމަވެސް އެތައް ބަޔަކަށް ހަމަލާދިނުމަށް ރާވާފައިވާ މިފަދަ ކަމަކަށް ބޭނުން ކުރުމަށް ހޯދާފައި ވަނީ ފިސްތޯލައަކާއި ތިން ވަޒަނާއި އައިއީޑީއެއް އެކަނިތޯ ގިނަބަޔަކު ސުވާލު ކުރެ އެވެ.
އެސްޓީއޯ އާއި ވިލާ ފަދަ މަލްޓި މިލިއަން ޑޮލަރުގެ ކުންފުނިތަކުން ޚަރަދުކޮށްފައި ވަނީ މިތަކެތި ހޯދުމަށްތޯ ވެސް ނާޒިމްގެ ފަރާތުންނާއި ޢާންމުންގެ ގިނަބަ ޔަކު ސުވާލު ކުރެ އެވެ.
ނާޒިމްގެ ޝަރީޢަތް މިހާތަނަށް އައި އިރު ފާހަނގަކުރެވުނު ކަންތަކުގެ ތެރޭގައި ނާޒިމްގެ ފިންގަ ޕްރިންޓާއި ހަތިޔާރުން ފެނުނު ފިންގާ ޕްރިންޓް ދިމާނުވާ ކަމަށް ފުލުހުންގެ ފޮރެންސިކް ރިޕޯޓުން އެނގެ އެވެ.
ދައުލަތުގެ ފަރާތުން ހެކިންގެ ގޮތުގައި ހުށަހަޅާފައިވާ އޮޕަރޭޝަންގައި ބައިވެރިވި ބައެއް ފުލުހުން ކޯޓުގައި ސިއްރުން ހެކިބަސް ދިން އިރު ވާހަކަތަކުގައި ވަރަށް ބޮޑެތި ތަފާތުތަކެއް ހުރިކަން ވެސް ފާހަގަ ކުރެވެ އެވެ.
ހެކިންގެ ގޮތުގައި ހާޒިރުވި ތިން ފުލުހުން ވެސް ވެސް ބުނެފައި ވަނީ ނާޒިމް ދިރިއުޅުއްވާ އެޕާޓްމަންޓް ބަލާ ފާސްކުރީ އެ މީހުންގެ ހާޒިރުގައި ކަމަށެވެ.
ނަމަވެސް އެތަނުގައި ކަން ހިނގި ގޮތް އެކި މީހުން ކިޔައިދިނީ އެކިގޮތަށެވެ. ނާޒިމްގެ މައްޗަށް ދައުވާ ސާބިތު ކުރަން ދައުލަތުން ހުށަހެޅި ހެކިންގެ ތެރެއިން ސިއްރުން ހެކިބަސް ނަގަން އެދުނު މީހުންގެ ހެކިބަސް މިހާރު ވަނީ ނަގާ ނިމިފަ އެވެ.
ކޮންމެއަކަސް މައްސަލަ ކުރިއަށް ގެންދާ ވަރަކަށް މުޖްތަމަޢު ތެރޭގައި ދެކެވޭ ވާހަކަތައް އިތުރުވަމުން ދާނެކަން ޤަބޫލު ކުރެވެ އެވެ.
އެއީ ދައުލަތުގެ މިފަދަ މަތީ މަޤާމެއްގައި ތިބޭމީހުންނަށް، ދައުލަތުން މިފަދަ ތުހުމަތުތައް ކުރުމަކީ ޢާންމުކަމެއް ނޫން ވީމަ އެވެ. އަދި އެތައް ބައެއްގެ ސަމާލުކަން މިފަދަ މައްސަލަ ތަކަށް ހުއްޓިގެންދާތީ އެވެ.