މޯލްޑިވްސް ކޮލިފިކޭޝަން އޮތޯރިޓީ (އެމްކިއުއޭ) އާ އެކީ ބޭއްވި ބައްދަލުމެއް ރައީސް ޑރ. މުހައްމަދު މުއިއްޒުގެ އެޑްވައިޒަރު އަބްދުއްރަހީމް އަބްދުﷲ (އަދުރޭ) އިސްކޮށް ހުންނަވައިގެން ބޭއްވުމާ ގުޅިގެން އޭނަގެ ފެންވަރާ މެދު ސުވާލު އުފައްދައި ޖޯކް ޖަހަން ފަށައިފި އެވެ.
އެ ބައްދަލުވުމުގެ ފޮޓޯއަކާ އެކީ ސޯޝަލް މީޑިއާގައި ކުރީގެ މިނިސްޓަރު މުހައްމަދު މަލީހު ޖަމާލު ވިދާޅުވީ އަދުރޭ އަކީ އެމްކިއުއޭ ފަދަ ތަންތަނަށް ވައްދާ ވަރުގެ މީހެއް ނޫން ކަމަށެވެ.
"ބައެއް ކަންކަމަށް ނޫނެކޭ ބުނަން ޖެހޭ. ކޮލިފިކޭޝަން އޮތޯރިޓީގެ އެ ގޮނޑީގައި އެއްވެސް ކޮލިފިކޭޝަނެއް ނެތް މީހަކު އިށީނުމަކީ ރާއްޖޭގެ ތައުލީމީ ނިޒާމަށް ޖެހި ގޮމެއް،" އޭނަ ވިދާޅުވި އެވެ. "އެއީ ދަށު ދަރަޖައިގެ އަމަލެއް. ބޯހަލާކު."
އެމްއޭކިއުގެ ވެރިންނާ އެކީ އަދުރޭ ބޭއްވި ބައްދަވުމާ ގުޅިގެން އޭނަ އަކީ ގްރޭޑް 7 ގެ ފެންވަރު ނެތް ކަމަށް މީހެއް ކަމަށް ބުނެ އެތައް ބަޔަކު ސޯޝަލް މިޑިއާގައި މަލާތްކޮށްފައިވެ އެވެ. ކުރިން ފޮނަދޫ ދާއިރާގެ މަޖިލިސް މެންބަރުކަން ވެސް ކުރެއްވި އަދުރޭ އަކީ މި ސަރުކާރުގެ ޓޫރިޒަމް މިނިސްޓަރު އިބްރާހީމް ފައިސަލްގެ ބައްޕަ އެވެ.
އެމްއޭކިއު އަކީ ރާއްޖޭގެ މަތީ ތައުލީމާ ގުޅޭ ކަންކަން ވިލަރެސް ކުރާ އިދާރާއެކެވެ. އެތަނުގެ ވެރިންނާ އަދުރޭ ބައްދަލުކުރެއްވީ ދާއިރާގައި މި ވަގުތު ހުރި މައްސަލަތަކާ ގުޅޭ ގޮތުން ހިޔާލާއި މަޝްވަރާ ހޯއްދެވުމަށެވެ.