މަސްދޯނިފަހަރުގެ ފަޅުވެރިންނަށް ހާއްސަކޮށްގެން ހިންގަން ނިންމާފައިވާ ރެސްކިއު ޑައިވަރުން ތަމްރީނު ކުރުމުގެ ޕްރޮގްރާމްގައި ޑައިވަރުން ތަމްރީނުކޮށް ދޭނެ އިންސްޓްރަކްޓާ ކޮންސަލްޓަންޓުން ހޯދަން ފިޝަރީޒް މިނިސްޓްރީން އިއުލާންކޮށްފި އެވެ.
އެ މިނިސްޓްރީން ބުނީ މިކަމަށް ޝައުގުވެރިވާ ފަރަތްތަކުން އަންނަ މަހުގެ 4 ގައި މައުލޫމާތު ސާފުކުރުމަށް ފަހު، އަންނަ މަހުގެ 9 ގައި ޕްރޮޕޯސަލް ހުށަހަޅަން ޖެހޭ ކަމަށެވެ. މިކަމާ ގުޅޭ އިތުރު މައުލޫމާތު 3339231, 3339239 އަދި 3339227 އިން ހޯދޭނެ އެވެ.
ރެސްކިއު ޑައިވަރުން ތަމްރީނުކުރަން މިނިސްޓްރީން ނިންމީ ޑައިވްކުރުމުގެ ތެރޭގައި މަސްވެރިންނަށް ކުރިމަތިވާ ހިތާމަވެރި ޙާދިސާތައް މަދުކުރުމުގެ މަގުސަދުގަ އެވެ. އެގޮތުން މަސްވެރިކަންކުރާ ކޮންމެ އުޅަނދެއްގައި ހަރަކާތްތެރިވާ ފަޅުވެރިންގެ ތެރެއިން މަދުވެގެން އެއް ފަޅުވެރިޔަކީ ރެސްކިޔު ޑައިވިން ފެންވަރުގެ ސަނަދެއް ހާސިލްކޮށްފައިވާ މީހަކަށް ހަދަން ބޭނުންވާ ކަމަށް މިނިސްޓްރީން ބުންޏެވެ.
މިއީ ރައީސް ޑރ. މުހައްމަދު މުއިއްޒުގެ ރިޔާސީ ވައުދެއް ވެސް މެ އެވެ. އެހެންވެ އެ ވައުދު ފުއްދުމަށް އެ މަނިކުފާނުގެ ހަފްތާ-14 ނުވަތަ ފުރަތަމަ 100 ދުވަހު ހާސިލް ކުރަން ބޭނުންވާ ލަނޑުދަނ ތަކުގެ ތެރޭގައި ރެސްކިއު ޑައިވަރުން ތަމްރީނު ކުރުމުގެ ޕްރޮގްރާމެއް ހިންގުން ހިމަނާފައިވެ އެވެ.