އާ އަހަރާ ކުރިމަތިލާން ވަގުތު ކުޑަތަންވަމުން އަންނަ އިރު، ރާއްޖޭގައި އާ އަހަރުގެ ފެށުން ފެނަށް ވެދާނެ އެވެ.
މުޅި ރާއްޖެ އަށް މޫސުން ވަރަށް ގޯހެވެ. މިއަދު ވަރަށް ހެނދުނުން ފެށިގެން މެޓް އޮފީހުން އޮތީ ވައިޓް އެލާޓް ވެސް ނެރެފަ އެވެ. ބޯކޮށް ވާރޭ ވެހޭނެ ކަމަށް ލަފާކޮށް، އެ އެލާޓް ނެރެފައި އޮތީ މެންދުރު ފަހު 1:30 އާ ހަމައަށެވެ. މިދިޔަ ހަފުތާގެ ފަހުކޮޅުން ފެށިގެން ރާއްޖޭގެ އެކި ހިސާބުތަކަށް މޫސުން ވަރަށް ގޯހެވެ.
އެގޮތުން ރާއްޖޭގެ އެންމެ ދެކުނުން އައްޑު އާއި ފުވައްމުލަކަށް ބޯކޮށް ވާރޭ ވެހި، ފެންބޮޑުވެ، ގެތަކަށް ވެސް ފެން ވަދެ އެކި ވަރުގެ ގެއްލުންތަކާ ކުރިމަތިފައިވެ އެވެ.
އާ އަހަރަށް މަރުހަބާ ކިޔަން ރާއްޖޭގެ އެކި ހިސާބުތަކުގައި ތަފާތު އެކިއެކި ހަރަކާތްތައް ވެސް ބާއްވަން ޕްލޭންކުރަމުން އައިސްފައިވެ އެވެ. އެގޮތުން އާ އަހަރު ފާހަގަކުރަން ފަސް ރަށެއްގައި ހަވާ އެރުވުމުގެ އިތުރަށް މާލެ ސަރަހައްދުގައި ބާއްވަން ނިންމި މިއުޒިކް ޝޯ އާއި އެ ނޫން ވެސް އެކި ހަރަކާތްތައް މިހާރު ވަނީ މޫސުން ގޯސްވުމުގެ ސަބަބުން ފަސްކޮށްފަ އެވެ.
ރާއްޖޭގެ މޫސުން މިހާރު އޮތް ގޮތުން އާ އަހަރަށް މަރުހަބާ ކިޔަން މިރޭ ދަންވަރު 12:00 ގައި ވެސް މާ ބޮޑު ކަންތައްތަކެއް އޮންނާނެ ކަމަކަށް ނުބެލެވެ އެވެ. އަބަދު ވެސް އާ އަހަރަށް މަރުހަބާ ކިޔަން އަލިފާނުގެ ތަފާތު ހަރަކާތްތައް ރާއްޖޭގައި ބާއްވަ އެވެ. ނަމަވެސް މޫސުން އޮތް ގޮތުން މި ފަހަރު މިއީ އާ އަހަރު ފެނަށް ވެދާނެ ފަހަރެކެވެ.
މި ވަގުތު އާންމުންނަށް ޖެހިފައި އޮތީ ވިއްސާރައިގައ ލިބިދާނެ ގެއްލުންތަކުން ސަލާމަތްވުމަށްޓަކައި ތަފާތު ފިޔަވަޅުތައް އެޅުމަށެވެ. ކަމާބެހޭ އިދާރާތަކުން ވެސް އަންނަނީ އެފަދަ އިރުޝާދުތައް ދެމުންނެވެ.