ރާއްޖޭގައި ގޭންގްތަކާ ގުޅި، ކުށްތައް ކުރާ ކުދިން ފުލުހަށް ނަގައި އެ މީހުން އިސްލާހުކުރަން ޕްރޮގްރާމެއް ހިންގާނެ ކަމަށް އާ ޕޮލިސް ކޮމިޝަނަރު އަލީ ޝުޖާއު ވިދާޅުވެއްޖެ އެވެ.
އޭނަގެ މަގާމަށް އައްޔަންކުރި ފަހުން މީޑިއާތަކަށް ދިން ފުރަތަމަ ސްޓޭޓްމަންޓްގައި މިއަދު ވިދާޅުވީ ގްރޫޕުތަކުން ރެކްރޫޓުކޮށް، ގޭންގުތަކަށް 18 އަހަރުން ދަށުގެ ކުދިން ވައްދާކަމުގެ މައުލޫމާތު ވެސް ފުލުހުންނަށް އަބަދު ލިބޭ ކަމަށެވެ. ސީޕީ ވިދާޅުވީ އެފަދަ ކުދިން ފާހަގަކޮށް ފުލުހުންގެ ބެލުމުގެ ދަށަށް ނަގާނެ ކަމަށެވެ.
އެގޮތުން ކުރިން ފޭދޫފިނޮޅުގައި ކުދިން ރިހިބިލިޓޭޓް ކުރަން ހިންގި ފަދަ ޕްރޮގްރާމެއް އަލުން ފެށުުގެ ވިސްނުން ގެންގުޅުއްވާ ކަމަށް ވިދާޅުވި އެވެ. ސީޕީ ވިދާޅުވީ މިކަން ކުރިއަށް ގެންދާނީ ޑިޕާޓްމަންޓް އޮފް ޖުވެނައިލް ޖަސްޓިސްއާ ގުޅިގެން ކަމަށެވެ. އެގޮތުން އެ ޑިޕާޓްމަންޓުގެ ބެލުމުގެ ދަށުން އެފަދަ ކުދިން ރީހެބިލިޓޭޓްކުރުމުގެ މަސައްކަތް ފެއްޓުމަށް މަޝްވަރާކުރެވެމުން އަންނަ ކަމަށް ވިދާޅުވި އެވެ.
"މިކަމަށް ފުލުހުންގެ ފަރާތުން ދޭން ޖެހޭ ހުރިހާ އެއްބާރުލުމެއް ދޭނެ." ސީޕީ ވިދާޅުވި އެވެ.
ޝުޖާއު ވިދާޅުވީ ގޭންގުތައް ހިންގާ ބޮޑުންނާ ހަމައަށް މި ސަރުކާރުގެ ފަސް އަހަރުގެ ތެރޭގައި ވާސިލްވާނޭ ކަމަށާއި އެކަން ކުރެވޭ ގޮތަށް ފުލުހުންގެ އޮޕަރޭޝަންތައް ބައްޓަން ކުރައްވާނެ ކަމަށެވެ.
ރާއްޖޭގައި ތަފާތު އެކު ބާވަތުގެ ކުށްތައް ކުރުން އިތުރުވެފައިވާ އިރު، އާންމުންގެ އެންމެ ބޮޑު ބިރަކީ ގޭންގްތަކުގެ ނުރައްކާ ބޮޑުވަމުން ދިއުމެވެ. ހާއްސަކޮށް އާބާދީ ބޮޑެތި ސަރަހައްދުތަކުގަ އެވެ.