ހުޅުމާލޭގެ މުނިސިޕަލް ޚިދުމަތްތައް މާލެ ސިޓީ ކައުންސިލުގެ ދަށަށް ބަދަލު ކުރުމަށް ސަރުކާރުން ނިންމައިފިއެވެ.
މިއަދު ބޭއްވި ކެބިނެޓު ބައްދަލުވުމުގައި މިކަމާއި މަޝްވަރާ ކުރެވި ނިންމާފައިވާކަން ރައީސުލްޖުމުހޫރިއްޔާ ޑރ. މުހައްމަދު މުއިއްޒު ވަނީ ހާމަކުރައްވާފައެވެ. މިކަން ހާމަކޮށް އެމަނިކުފާނު ވިދާޅުވީ، މި ބަދަލުގެ ގެނައުމުގެ މަސައްކަތް މާދަމާ، 1 ޖެނުއަރީ 2024 ވަނަ ދުވަހުން ފެށިގެން ކުރިއަށްދާނެ ކަމަށެވެ. އަދި މިއީ ޤާނޫނުގައި އެކަން ބަޔާންވެފައިވާ ގޮތް ކަމަށްވެސް އެމަނިކުފާނު ފާހަގަ ކުރެއްވިއެވެ.
މިމަސައްކަތުގެ ދަށުން ކުރިއަށް އޮތް މަހެއްހާ ދުވަހުގެ ތެރޭގައި މުވައްޒަފުންނާއި، މުނިސިޕަލް ބިންތަކާއި، އޮފީހާއި ޚިދުމަތް ދިނުމަށް ބޭނުން ކުރާ ވަސީލަތްތަކާއި މެޝިނަރީތައް ބަދަލު ކުރުމުގެ މަސައްކަތް ކުރެވޭނެ ކަމަށް އެމަނިކުފާނު ވިދާޅުވިއެވެ. އަދި 1 އަހަރު ދުވަހުގެ މުއްދަތައް، މުވައްޒަފުންނަށް މިހާރު ލިބެމުންދާ މުސާރައާއި އިނާޔަތްތައް މެދުނުކެނޑި ލިބެމުންދާނެ ކަމަށް އެމަނިކުފާނު ވިދާޅުވިއެވެ.
މިކަމާއި ގުޅޭ ތަފްސީލުގެ ކުރިއަށް އޮތް ދުވަސްތަކުގައި ހާމަކުރައްވާނެ ކަމަށް އެމަނިކުފާނު ވަނީ ވިދާޅުވެފައެވެ.
ހުޅުމާލޭގެ މުނިސިޕަލް ޚިދުމަތް މާލެ ސިޓީ ކައުންސިލުގެ ދަށަށް ބަދަލު ކުރުމަކީ މާލެ ސިޓީގެ މޭޔަރުކަންވެސް ކުރައްވާފައިވާ ރައީސް، ޑރ. މުއިއްޒުގެ ރިޔާސީ ވަޢުދެކެވެ. އެމަނިކުފާނުގެ މޭޔަރު ކަމުގެ ދައުރުގައި ހުޅުމާލޭގެ މުނިސިޕަލް ޚިދުމަތް ސިޓީ ކައުންސިލް ދަށަށް ބަދަލުކޮށް ދިނުމަށް އެދި އެކަމަށް ވަރަށް ބޮޑަށް ވަނީ ވަކާލާތު ކުރައްވާފައެވެ.
ހުޅުމާލޭގެ މުނިސިޕަލް ޚިދުމަތްތައް ދެމުންދަނީ އާބަންކޯއިންނެވެ.