ރައީސް އޮފީހުގެ ތަރުޖަމާނު ކަމަށް އައްޔަން ކުރިތާ މަސް ދުވަސް ނުވަނީސް އެ މަޤާމުން ކުރީގެ ނޫސްވެރިޔާ މުހައްމަދު ޝަހީބު ވަކިކޮށްފިއެވެ.
އޭނާ ސްޕޯކްސްޕާސަންގެ މަޤާމުން ވަކިކޮށްފައިވާއިރު، ރައީސް އޮފީހުގެ ވެބްސައިޓުން މިހާރު ދައްކާ ގޮތުން ޝަހީބު އަކީ ފޮރިން މިނިސްޓްރީގެ ސްޓޭޓް މިނިސްޓަރެކެވެ. މި ބަދަލު ގެނެސްފައިވަނީ މިއަދު ކަމަށް މަައުލޫމާތު ލިބެއެވެ.
ޝަހީބު ރައީސް އޮފީހުގެ ތަރުޖަމާނަކަށް އައްޔަންކޮށްފައިވަނީ މިދިޔަ ޑިސެމްބަރު މަހުގެ 13 ވަނަ ދުވަހުއެވެ. އޭނާ އެ މަޤާމުގައި ހުންނެވި އިރު ބައެއް ނޫސްވެރިންގެ ބައްދަލުވުންތައް ކުރިއަށް ގެންދެވި ގޮތުން ބައެއް ފަރާތްތަކުން ހާއްސަކޮށް ނޫސްވެރިންގެ ފަރާތުން ފާޑުކިއުންވެސް ސަރުކާރަށް އަމާޒުވިއެވެ.
ޝަހީބު ފޮރިން މިނިސްޓްރީގެ ސްޓޭޓް މިނިސްޓަރަކަށް އައްޔަންކުރިއިރު، އޭނަ 30 އަހަރަށް ވުރެ ގިނަ ދުވަހު އެންމެ މަތީ ފެންވަރުގައި ނޫސްވެރިކަން ކުރައްވާފައިވާ ބޭފުޅެކެވެ. އެގޮތުން، 2004 ގައި އަހަރު، ޚަބަރާއި މަޢުލޫމާތު ފެތުރުމުގެ ދާއިރާއިން؛ ނޫސްވެރިކަމުގެ ރޮނގުން ހިތްވަރުދިނުމުގެ ޢާންމު ޚިދުމަތުގެ އިނާމު ޝަހީބަށް ލިބިވަޑައިގެންފައިވެ އެވެ. މީގެ އިތުރުން ވެސް 2007 ވަނަ އަހަރު، ދިވެހި އަދަބިއްޔާތަށް ޚިދުމަތް ކުރުމުގެ ދާއިރާއިން؛ ދިވެހިބަހަށް ޚިދުމަތް ކުރުމުގެ ރޮނގުން ހިތްވަރުދިނުމުގެ ޢާންމު ޚިދުމަތުގެ އިނާމުވެސް ލިބިވަޑައިގެންފައިވެ އެވެ.
ދެހާސް ނަވާރައިގައި ނޫސްވެރިކަމުގެ އަލިމަސް ގަލަން ވެސް ޝަހީބު ވަނީ ހާސިލުކުރައްވައިފަ އެވެ. މީގެ ކުރިން އެނާ ވަނީ ބްރޯޑްކާސްޓިންގް ކޮމިޝަންގެ ރައީސްކަންވެސް އަދާކުރައްވާފައެވެ.